Адил Ъямил
124
***
Kökləri dirəndi sarı torpağa -
Əkdiyim ağaclar böyümədi heç.
Boylanıb əlimlə saldığım bağa
Ömrümdə bircə yol öyünmədim heç.
Əməyim zay oldu, əziyyətim puç-
Vaysınıb, çırpınıb, döyünmədim heç…
***
Hər qərib axşamın, kövrək gecənin
Ürək sehrləyən bir tilsimi var.
Keçmişə çevrilən olub-keçənin
Sinələr göynədən sarı simi var.
Dünyada insanın insandan özgə
Özünüz söyləyin, axı kimi var?!
1983
Сечилмиш ясярляри
125
GÖZƏLİM, GÖYÇƏYİM XƏZƏR
Yuxuda gördüm ki, Xəzərin suyu azalır.
Əslində əksinə olduğunu bilsəm də həmin
təşviş mənə bu şeiri yazdırdı…
Alagözlü balıqların
Su vətəni - Xəzərim hey!
Göz vurulan, könül sevən
Mavi donlu gözəlim hey…
Azalan gördüm suyunu,
Qısalan gördüm boyunu…
Burum-burum buruqların
Ey dibsiz dibçəyi Xəzər,
Od hənirli torpağımın
Göyümsov göyçəyi Xəzər,
Sən beləcə buxarlansan
Suyunda «bitən» balıqlar
Qopar dalğa «budağından»,
Üzə bilməz Narginəcən,
Dözə bilməz dar günəcən -
Çevrilib qağayı olar…
Gözəlim, göyçəyim Xəzər,
Uğrunda başımı verrəm.
Suyun azalmasın deyə
Gözümün yaşını verrəm…
1983
Адил Ъямил
126
İLK DƏRS
Qızım Xəyaləyə
Məktəbə gedirsən, qızım, ilk dəfə,
Sabah imtahandır bu günün dərsi.
Ağköynək uşaqlar düzülüb səfə -
Bir sevinc işığı bürüyüb ərzi.
Gedirsən… arxanca boylanıram mən,
Baxıram ağ çiçək açıb saçların.
Gedirsən… üstündən keçib-gedirsən
Bir zaman mən çəkən ehtiyacların…
Gedirsən… xəyalım gedir keçmişə -
Belə olmayıbdır mənim o çağım.
Heyran qalmamışam qırmızı «beş»ə,
Dərdinə qalmışam odun-ocağın.
Cığırım çayırdan, qaratikandan,
Bəzən də burulub çəməndən keçib.
Məni buyurubdur hərə bir yandan -
Atam nə quzudan, nə məndən keçib…
Uçub qar-yağışda məktəb binası,
Üç sinif olubdur bir sinif orda.
Sovuşub dünyanın xata-bəlası,
Yenə ürəyimiz isinib orda.
Xoşbəxtsən, ay qızım, gözün dolmayıb -
Həmişə, hər yerdə görünənin var.
Mənim qabağıma çıxan olmayıb,
Səninsə arxanca sürünənin var…
1985
Сечилмиш ясярляри
127
NƏNƏM OĞUL AXTARIR
Cəbhədən qayıtmayanların xatirəsinə
Gözündə, könlündə zəif bir ümid,
Başında fikrinin bulud yığını,
Nə vaxtdır itirib rahatlığını
Nənəm oğul axtarır…
Ağlayır: - «Bir dəfə görəydim barı
Qəlbimi ikiyə bölən oğlumu…»
Üzünün qırışı - cəbhə yolları,
Göz yaşı - bu yolla gələn oğlumu?
Bilmir ki, o zaman yaşasın deyə,
Oğlunu sağ bilib oxşasın deyə
Ondan gizlədilər «qara» kağızı,
Bütöv ölüm boyda para kağızı…
…Gözündə, könlündə zəif bir ümid,
Başında fikrinin bulud yığını,
Çoxdan itirsə də axtardığını
Nənəm yenə axtarır,
Nənəm oğul axtarır…
1979
Адил Ъямил
128
BU DA BİR ÖMÜRDÜR
Bütün tramvaylar tanıyır onu,
Bütün sərnişinlər ona tanışdır.
Qocanın sinəsi söz xəzinəsi -
Qazanmaq istəsən onu danışdır…
Onu belə gördüm illərdən bəri,
Düşməz dodağından o qarğı tütək.
Çalar təmənnasız, oxuyar pulsuz,
Hərdən pul verən də tapılar tək-tək.
Əlini uzatmaz qəpiyə tərəf,
Heç vədə boylanmaz qapıya tərəf,
Köksündən nəğmələr uçurar qoca,
Nəfəsi titrəyər, səsi titrəyər,
Tənha ağac kimi uçunar qoca.
Dərdini nəğməylə qaçırar qoca,
Baharı oxuyar, qışı oxuyar.
Toyda yüzə, minə oxuyanlardan
Bu qoca min dəfə yaxşı oxuyar.
…Un kimi ağarıb saqqalı, saçı,
Nəğməsi şirindir, taleyi acı.
Dizi bükülməyib hər ehtiyaca,
Ağlaya-ağlaya yaşamaqdansa
Oxuya-oxuya yaşayır qoca…
1978
Сечилмиш ясярляри
129
AĞLAMAQ İSTƏYİRƏM
Qoyub qabağıma kədər balamı
Doyunca ağlamaq istəyirəm mən.
Gözümü yandıran isti göz yaşım
Soyuq ürəklərin qapılarını
Döyüncə ağlamaq istəyirəm mən.
Ömründə bircə yol gülməyənlərin,
Ömründə ağlamaq bilməyənlərin
Dərdinə ağlamaq istəyirəm mən.
Kədərin sevincdən, qəmin nəşədən
Fərqinə ağlamaq istəyirəm mən.
Dünyanın bir ucu ölüm-itimdir -
Ölümü-itimi görüb ağlaram.
Ağlayan yetimi görüb ağlaram.
Ağlaya-ağlaya gülərəm də mən,
Gülərəm ağlayıb kiriyənlərə,
Gülərəm gülməkdən çürüyənlərə,
Sonra da görərəm güldüyüm bəsdir, -
Doyunca ağlamaq istəyirəm mən.
Arada qıvrılıb yatan Arazın
Boyunca ağlamaq istəyirəm mən.
Əlim qardaşımın həsrət əlinə
Dəyincə ağlamaq istəyirəm mən…
…Siz Allah, deməyin kişi olan kəs
Gözünün yaşını saxlasın gərək…
- Dərd var ki, qadınlar ağlamalıdır,
Dərd var ki, kişilər ağlasın gərək…
1980
Dostları ilə paylaş: |