Mavzu: Gap bo‘laklari sanalmaydigan birliklar. Dars rejasi

Mavzu: Gap bo‘laklari sanalmaydigan birliklar.
Dars rejasi:

1. 
   Gap bo`lagi sanalmaydigan birliklar haqida ma’lumot
   
2. 
   Gap bo`lagi sanalmaydigan birliklarning sintaktik belgilari
   
3. 
   Undalma va uning o`ziga xos xususiyatlari
   
4. 
   Kirish so`z, kirish birikma va ular ifodalagan ma’no-mazmun xususida
   
5. 
   Kirish gap va ularda tinish belgilarining ishlatilishi
   

Tavsiya etiladigan adabiyotlar:
1. Hamrayev M.A. Lisoniy tahlil qoliplari. – T.: TDPU, 2014-yil.
2. Hamrayev M.A. Jadvalli mashqlar to‘plami. – T.: TDPU, 2014-yil.
3. Sh.Rahmatullayev. Hozirgi adabiy o‘zbek tili. “Universitet” nashriyoti. –T.: 2006 .
4. А.Мухторов, У.A.Muxtorov, U.Sanaqulov. O‘zbek adabiy tili tarixi. “O‘qituvchi” nashriyoti. –T., 1995.
5. H.A.Jamolxonov. Hozirgi o‘zbek adabiy tili. 2-qism. –T., 2004,.
6. Q.Sapayev. “Hоzirgi o‘zbек tili (mоrfеmikа, so‘z yasаlishi vа mоrfоlоgiya)” T., 1999.
7. M.Hamroyev, D.Muhamedova, D.Shodmonqulova, X. G‘ulomova, Sh. Yo‘ldosheva, Ona tili. – Toshkent: MOLIYA-IQTISOD, 2007.
8. R.Ikromova, D.Muhamedova, M.Hamrayev. Ona tilidan mashqlar to‘plami
– Toshkent: TDPU, 2009
Gap tarkibida ba’zan shunday so‘zlar va so‘z birikmalari hatto gaplar qo‘llanadiki, ular gapning biror bo‘lagi bilan grammatik jihatdan aloqaga kirishmaydi. Shu tufayli bunday so‘z yoki so‘z birikmalari gap bo‘laklari hisoblanmaydi. Undalma, kirish so‘z, kirish birikma va kiritma gap ana shunday xususiyatga ega.
Undalma
So‘zlovchining nutqi qaratilgan shaxs (yoki predmet)ni anglatadigan so‘z yoki so‘z birikmasi undalma deyiladi. Undalma bayon qilinayotgan fikrga tinglovchining diqqatini tortish uchun xizmat qiladi.
Undalma o‘zi ishtirok etgan gap bilan grammatik jihatdan bog‘lanmaydi. U bosh kelishik shaklidagi ot yoki otlashgan so‘z bilan ifodalanadi. Bu jihatdan undalma egaga o‘xshaydi, biroq u gapning kesimi bilan grammatik jihatdan bog‘lanmasligiga ko‘ra o‘ziga xos undosh intonatsiyasi, pauza (to‘xtash) bilan aytilishiga ko‘ra egadan farq qiladi. Masalan: Aziz o‘g‘lim, yomonlar bilan suhbatdosh bo‘lma, ulardan asrlondan qochganday qoch, hammaga rahm va shafqat ko‘zi bilan qara ... («Oz-oz o‘rganib, dono bo‘lur»). Yurak, sensan mening sozim, tilimni nayga jo‘r etding. (U.Nosir).
Undalma ba’zan -ey, -u (-yu) kabilar bilan birga qo‘llanadi: Luqmon hakim o‘g‘liga nasihat qilib aytdi: - Ey o‘g‘il, odamlr so‘zga ustomonliklari bilan maqtansalar, sen sukuting bilan maqtan. («Oz-oz o‘rganib, dono bo‘lur»).
Undalma vazifasida atoqli otlar, shaxs otlari, qarindoshlik, kasb, hunar kabilarni anglatuvchi so‘zlar keladi. Masalan: - Onajon, Xonzoda begim ham sizning suyukli farzandingiz-ku (P.Qodirov). Kechagi maqola nima bo‘ldi, Rahim aka?! (F.Musajonov). Siz mendan ko‘ra qo‘ylaringizni ko‘proq o‘ylang, cho‘pon aka! (P.Qodirov).
Undalma otlashgan sifat, otlashgan undov so‘z, so‘z birikmasi va shu kabilar bilan ham ifodalanishi mumkin: O‘ynashma, puchuq, tek tur, hamma yog‘ing suv bo‘ldi... (O.Yoqubov). -Hoy, biron gap topib keldingmi? (S.Ahmad). Yaxshilik ... yaxshilikning ham bahosi bor, o‘rtoq Zargarov (A.Muxtor).
Undalma gap boshida, o‘rtasida, oxirida keladi va yozuvda gapning boshqa bo‘laklaridan, odatda, vergul bilan ajratiladi: - Olim bola, rayhonlarni bir silkitib chiqmaysizmi ... (J.Abdullaxonov). Ey rais, bu kitobni avval bir o‘qib ko‘ring. (S.Ahmad). Nima qilasiz, dada, bolaning yuragini ezib. (S.Ahmad). Mening etti pushtim bog‘bon o‘tgan, o‘g‘lim. (J.Abdullaxonov).
Undalma kuchli his-hayajon bilan aytilsa, undan so‘ng, undov belgisi qo‘yiladi: -Xolbek! Qanisan? – dedi Eshmurot aka. – Kelsang-chi, kutib qoldik-ku. (P.Qodirov).