10
Birinci mərhələdə YGB-də göstərilən məlumatlara formal-məntiqi nəzarət həyata keçirilir. Bunun üçün
yük şöbəsi tərəfindən bəyannamənin bütün qrafalarının doldurulmasının düzgünlüyü yoxlanılır, bəyan edilmiş
gömrük rejimi və malların adına müvafiq olaraq gömrük nəzarəti üçün tələb olunan sənədlərin mövcudluğu
müəyyən edilir. YGB yoxlanıldıqdan sonra ona nömrə verilir və aşkar edilmiş səhvlərin düzəldilməsi üçün
deklaranta qaytarılır.
İkinci mərhələdə YGB-də göstərilən xarici valyutada ödənc-hesablaşma əməliyyatları nəzarət predmeti
olur. Eyni zamanda xarici-iqtisadi fəaliyyət iştirakçısı tərəfindən valyuta nəzarəti qanunvericiliyinə riayət
olunması yoxlanılır.
Üçüncü mərhələdə gömrük ödənişlərinin hesablanma dəqiqliyi, gömrük güzəştləri verilməsinin
qanunamüvafiqliyi yoxlanılır, ödənişlərin gömrük orqanlarının hesabına daxil olmasına nəzarət edilir.
Dördüncü mərhələdə statistika şöbəsi gömrük statistikası üçün mühüm olan qrafaların doldurulmasını
yoxlayır.
Nəhayət, beşinci mərhələdə yük şöbəsinin səlahiyyətli vəzifəli şəxsi malın gömrük müayinəsi
(yoxlaması) barədə qərar qəbul edir.
Gömrük nəzarətinin bütün mərhələləri bitdikdən sonra yük sənədinə “Buraxılışa icazə verilir” ştampı
vurulur. Bu ştamp və YGB-nin nömrəsi (yük sənədinin yuxarı sağ küncündə) şəxsi nömrəli möhürlə təsdiqlənir.
Azərbaycan Respublikası gömrük orqanları gömrük nəzarətini həyata keçirərkən, bir qayda olaraq,
icrasına nəzarət Azərbaycan Respublikasının gömrük orqanlarına həvalə edilmiş Azərbaycan Respublikasının
gömrük işi haqqında qanunvericiliyinə, Azərbaycan Respublikasının digər qanunvericiliyinə və beynəlxalq
müqavilələrinə riayət edilməsini təmin etmək üçün kifayət edən gömrük nəzarəti formalarından istifadə edə
bilər.
Gömrük orqanlarının vəzifəsi gömrük sərhədindən keçirilən bütün mallara gömrük nəzarəti təşkil
etməkdir. Gömrük nəzarəti predmetinin spesifikası bəzi hallarda gömrük nəzarətinin özünün təşkilində mühüm
əhəmiyyətli xüsusiyyətləri şərtləndirir. Belə ki, valyuta və valyuta qiymətlilərinin gömrük sərhədindən
keçirilməsinə nəzarət edərkən, gömrük orqanları qanunvericilikdə nəzərdə tutulmuş digər orqanlarla birlikdə
dövlət valyuta nəzarətinin həyata keçirilməsində iştirak edir.
Xarici ticarət obyekti olan bəzi spesifik malların gömrük nəzarətinə cəlb edilməsi əlahiddə yanaşılma
tərzi tələb edir. Məsələn, xam neft, qaz, neft və qaz məhsulları, enerji və s. Belə hallarda gömrük nəzarəti
mexanizmi nəinki malların xüsusiyyətlərini, həmçinin nəqletmə üsullarını da nəzərə almalıdır.
Bunun üçün gömrük orqanlrı qanunvericilikdə nəzərdə tutulmuş qaydada fiziki qüvvə, müxtəlif texniki
vasitələr, odlu silah və digər vasitələr tətbiq edə bilər.
Bir qayda olaraq, mal və nəqliyyat vasitələri gömrük nəzarətinin başlandığı andan onun seçilmiş
gömrük rejiminə uyğun olaraq bitməsinə qədər gömrük nəzarəti altında yerləşir. Başqa sözlə mal və nəqliyyat
vasitələrinin gömrük nəzarəti altında yerləşməsi müddəti bilavasitə seçilmiş gömrük rejimindən asılıdır. Əgər
mallar sərbəst dövriyyəyə buraxılış üçün bəyan edilirsə bu müddət günlərlə ölçülür, əgər misal üçün gömrük
anbarı rejimi altında bəyan edilirsə bu müddət üç ilə qədər ola bilər. Bu halda gömrük nəzarətinin müddəti də
rejim başa çatana qədər uzadılmış olur.
Mal və nəqliyyat vasitələrinin gətirilməsi zamanı gömrük nəzarətinin başlanğıcı onların Azərbaycan
Respublikasının gömrük sərhəddini keçdiyi an hesab edilir. Mal və nəqliyyat vasitələrinin ölkədən çıxarılması
zamanı gömrük nəzarəti - gömrük bəyannaməsinin təqdim edildiyi andan başlanır.
Gömrük Məcəlləsində nəzərdə tutulan hallar istisna edilməklə, mallar və nəqliyyat vasitələri buraxıldığı
andan gömrük nəzarəti başa çatır. Azərbaycan Respublikasının gömrük ərazisindən kənara aparılan mallar və
nəqliyyat vasitələri buraxılarkən, onlar Azərbaycan Respublikasının gömrük sərhəddini keçdiyi andan gömrük
nəzarəti başa çatır.
Gömrük nəzarəti altında malların yerləşdirilməsinin minimum müddətlərinin müəyyən edilməsi Dövlət
Gömrük Komitəsinin səlahiyyətinə daxildir. Bu barədə texniki və texnoloji xarakterli qərarlar qəbul edilərkən
eyni zamanda mühüm ictimai-hüquqi prinsiplər nəzərə alınmalıdır:
- dövlət təhlükəsizliyinin təmin edilməsi;
- qanunun aliliyi;
- insan hüquq və azadlıqlarına hörmət və riayət edilməsi.
Təqdim edilmiş gömrük bəyannaməsinin, mal və nəqliyyat vasitələrinə gömrük nəzarəti üçün tələb
olunan digər sənədlərin yoxlanılması üçün mövcud qanunvericilik maksimum müddət olaraq on gün müəyyən
edir. Bu müddətin başlanğıcı olaraq gömrük bəyannaməsinin qəbul edildiyi və lazımi sənədlərin təqdim
olunduğu gün hesab edilir.
Əgər gömrük rəsmiləşdirilməsi prosedurası mal və nəqliyyat vasitələrinin təqdim edilməsini nəzərdə
tutursa, bu müddət belə təqdimetmə anından başlanır.
Mal və nəqliyyat vasitələrinin gömrük sərhədindən keçirən, yaxud gömrük orqanlarının nəzarət sahəsinə
aid fəaliyyətlə məşğul olan şəxslər gömrük nəzarəti üçün tələb olunan sənəd və məlumatları təqdim etməlidirlər.
11
Gömrük nəzarəti üçün tələb olunan məlumatları gömrük orqanları vergi və digər nəzarət orqanlarından
da ala bilərlər. Qanunvericilik gömrük orqanlarına bank və digər kredit idarələrindən
mal və nəqliyyat
vasitələrini gömrük sərhədindən keçirən şəxslərin, gömrük brokerlərinin, yaxud nəzarəti gömrük orqanlarına
həvalə edilmiş sahələrdə fəaliyyət göstərən digər şəxslərin apardığı əməliyyatlar, hesablarının vəziyyəti barədə
arayış və məlumatlar almaq hüququ verir.
Gömrük nəzarəti üçün tələb olunan sənədlər təyinatına görə aşağıdakı qruplar üzrə təsnifatlandırılır.
1. Ticarət sənədləri. Bu sənədlərə müqavilə, hesab, faktura, spesifikasiya (Spesifikasiya göndərişin
predmetini xarakterizə edən məlumatların, bəzi hallarda qiymət, göndərmə şərtləri, göndərmə müddətləri və
sairənin əks olunduğu, göndərmə müqaviləsinin mətninə qoyulan sənəddir. Spesifikasiya müqavilənin ayrılmaz
hissəsi sayılır), invoys (malların adı və qiyməti göstərilən sənəd), qablaşdırılma sənədləri və s. aiddir. Gömrük
nəzarətinin həyata keçirilməsi üçün müqavilələrin hər hansı, o cümlədən faksimil surəti və həmçinin, belə
müqavilələrdən çıxarışlar da qəbul edilə bilər. Lakin müqavilələrin surətləri və onlardan çıxarışlar müqaviləni
bağlayan təşkilatın rəhbərliyinin imzası və bu təşkilatın möhürü ilə təsdiqlənməlidir. Bununla belə təqdim edilən
sənədlərdə məlumatların dəqiq olmadığını güman etməyə kifayət qədər əsas olarsa, gömrük orqanının vəzifəli
şəxsləri müqavilələrin orijinal nüsxələrini tələb edə bilərlər. Müqavilə tərəfləri barədə məlumatların təsdiqi
üçün, qeydiyyat və bank rekvizitləri (latınca “regiuisitum” - “tələb olunan”, “lazım olan” deməkdir. Sənədin
həqiqiliyini tanımaq üçün lazım olan vacib məlumatlara rekvizitlər deyilir), göstərilmiş təşkilatın rəhbəri və baş
mühasibi tərəfindən imzalanmış, möhürlə təsdiq edilmiş məktub-ərizə qəbul edilə bilər.
2. Nəqliyyat sənədləri. Sadalanan nəqliyyat sənədlərinə əsasən mallar gömrük sərhədindən keçirilir:
konosament (konosament beynəlxalq gəmiçilikdə yüklərin daşınması prosesində daşıyıcı və yük sahibi
arasındakı münasibətləri müəyyən edən sənəddir), qaimə, dəmiryol nəqliyyatı üçün - yol-daşıma cədvəlləri,
vaqon vərəqi, təhvil cədvəlləri, baqaj qəbzləri.
3. Gömrük sənədləri. Belə sənədlər gömrük orqanlarının vəzifəli şəxsləri tərəfindən verilir və
şəhadətləndirilir. Gömrük bəyannamələri, təyinat gömrükxanasına təqdim edilməsi tələb olunan digər sənədlər
(çatdırılmaya nəzarət sənədləri), gömrük təminatları altında daşınmaya buraxılmış nəqliyyat vasitələrinin
şəhadətnaməsi, gömrük orqanları tərəfindən verilən müxtəlif lisenziyalar, ixtisas attestatları və s. gömrük
sənədləridir.
4. Gömrük nəzarəti üçün tələb olunan digər sənədlər. Belə sənədlərə xarici iqtisadi fəaliyyətlə məşğul
olmaq hüququ verən təsisat sənədləri; uyğunluq və keyfiyyət sertifikatları (latınca “certihico” - “təsdiq edirəm”
deməkdir. Müəyyən faktı təsdiq edən yazılı şəhadətnamə, sənəddir); digər dövlət nəzarət orqanları tərəfindən
verilən karantin, icazə sənədləri; sərhəd buraxılış vərəqələri və s. aid edilə bilər.
Malın idxalı (ixracı) üçün müəyyən gömrük rejimi barəsində bəyanat vermək lazımdır.
Gömrük rejimi Azərbaycan Respublikasının gömrük məqsədləri üçün (AR Gömrük Məcəlləsinin 17-ci
maddəsinin 12-ci yarımbəndi) gömrük sərhədindən daşınan malların və nəqliyyat vasitələrinin hüquqi statusunu
müəyyənləşdirən müddəalar məcmusudur. Azərbaycan Respublikasının gömrük sərhədindən daşınan bütün
mallar aşağıdakıları müəyyən etmək üçün gömrük rejimlərindən keçirilməlidir:
1) Azərbaycan Respublikası ərazisinə gətirilən və ya aparılan malın sahibinin səlahiyyətinin səviyyəsi;
2) mallara vergi qoyulması qaydası;
3) gömrük rejiminin bəyan edilməsi ilə əlaqədar mal sahibinə qarşı qoyulan tələblər, şərtlər və
məhdudiyyətlər;
Gömrük tənzimləmələri məqsədilə, Azərbaycan Respublikasının Gömrük Məcəlləsinə uyğun olaaq
aşağıdakı gömrük rejimləri müəyyənləşdirilmişdir:
1) sərbəst dövriyyə üçün buraxılış;
2) təkrar idxal;
3) tranzit;
4) gömrük anbarı;
5) rüsumsuz ticarət mağazası;
6) gömrük ərazisində emal;
7) gömrük nəzarəti altında emal;
8) müvəqqəti idxal (ixrac);
9) sərbəst gömrük zonası;
10) sərbəst anbar;
11) gömrük ərazisindən kənarda emal;
12) ixrac;
13) təkrar ixrac;
14) məhvetmə;
15) dövlətin xeyrinə maldan imtina.