31
zülmkardır. Hər ikisi xalqları əsarət altında saxlamağa meyllidir. Hər iki üsul-idarə
arasında fikir müxtəlifliyi
və hətta düşmənçilik də olsa, azərbaycanlıların birləşmək
istəyi güclənəndə, azadlıq hərəkatı genişlənəndə onlar ümumi dil tapıb yaxınlaşır.
Məmməd Əmin Rəsulzadə çar imperiyasının bir xain istəyini də anlamışdı:
imperatorluq hər iki Azərbaycanı ələ keçirməyə meyllidir.
Səttar xanın iki qüvvətli düşmənə qarşı apardığı mübarizəyə Türkiyədən də
kömək gəldi. Məşhur Xəlil bəy bir dəstə millətçiləri başına toplayıb Səttar xanı
müdafiə edirdi. Türkiyədən gələn qan qardaşlarını Azəri türkləri bağrına basır, göz
yaşı içində qucaqlaşırdılar. Dar günün, çətin zamanın köməyini yalnız damarında
eyni qanı axan, sinəsində eyni ürək döyünənlər edər.
Həmin görüşdə cəsur Xəlil bəy gözəl və şirin İstanbul ləhcəsiylə bu sözləri
demişdi: «Arkadaşlar, qorxmayın, vurun. Arxanızda qardaşlarınız varıq. Qardaş
yardımı davam edəcək. Məşrutə bayrağını yerdə qoymayın».
Məmməd Əmin Rəsulzadə xalqın bu coşğunluğunun birləşmək, bütün türk
aləmi ilə əl-ələ vermək istəyinin şahidiydi. Səttar xanın cəsurluğunu,
qəhrəmanlığını alqışlayırdı. Səttar xanın adına mahnılar qoşulur, igidliyi, cəsurluğu
dillərdə dastan olurdu.
Lakin həyatın bir amansız məntiqi hökmü var: düşmən sayca çoxdursa, azın
məğlubiyyəti labüddür. İgidliyin, cəsurluğun son dayanış yeri namərdin topalaşıb
qabaq kəsməsidir. Mərdin, cəsurun igidliyini qiymətləndirən dövran çoxdan ötüb
getmişdi. İndi zaman xainlərin, fırıldaq və bicliyi bacaranların idi. Mərdliyi gedən
dünya indi başqa hava ilə nəfəs alırdı.
Şahın çar Rusiyası ilə birləşən qüvvələri məşrutə hərəkatını qan içində
boğdu. Edamlar, qətllər, hürriyyət yolunda şəhid olanların axan qızıl qanı göylərin
rəngini qızartdı. Azəri xalqının hürriyyət istəyi beləcə qanla boğuldu. Məşrutə
hərəkatının tərəfdarları istibdada məruz qaldılar.
Belə vəziyyətdə İranda qalmaq təhlükəli idi. Məmməd Əmin Rəsulzadəni
təkcə İran hökuməti deyil, həmçinin çar Rusiyası da axtarır, həbs etməyə çalışırdı.
Çünki Məmməd Əmin Rəsulzadə adı həm İran, həm də çar Rusiyası üçün qorxulu
idi. Böyük mühərrirlik və siyasi təbliğatçılıq bacarığı olan Məmməd Əmin
Rusiyada və İranda mövcud quruluşa qarşı mübarizə aparmış, başına çoxlu adam
toplamışdı. Onun həmfikirləri çox idi və xalqın müəyyən təbəqələri arasında güclü
nüfuzu vardı. Belə adamları «zərərsizləşdirmək lazımdı».
Təzyiqin getdikcə artdığını və həyatının təhlükədə olduğunu görən
Məmməd Əmin Rəsulzadə İranı tərk etməyə məcbur oldu.
* * *
Azadlıq yolunda şəhid olub, ömrü yarıda qırılanların ağrısı içərisini
göynədə-göynədə İrandan ayrılırdı. Yol boyu görünən adamlara baxırdı. Hamısı
qəm dəryasına batıb, fikirli halda başlarını aşağı salmışdılar. Sanki sağ