229
- Emin bəylə 1945-ci ildə Almaniyada tanış oldum. Haqqında çox
eşitmişdim. Amma özünü ilk dəfə 1945-ci ildə gördüm. Hadisə belə oldu.
Stansiyada dayanıb qatar gözləyirdim. Qatar gələndə gördüm ki, bir adam tez
qapını açıb məni səslədi. Baxdım ki, həmyerlim Məhəmməd Kəngərlidir. Dedi ki,
Emin bəy də burda vaqondadır. Gedək tanış ol. Sonra Türkiyəyə gəldik. Ara-sıra
görüşürdük onunla. 1952-ci il idi. Emin bəy gəlmişdi İstanbula. Yanına gedib
görüşdüm. Dedim ki, sabah sizi evimdə plov yeməyə dəvət edirəm. Cavab verdi ki,
yox, mən İstanbul plovu yemirəm. Soruşdum ki, niyə? Dedi:—Bu İstanbul plovu
yeməməyimin maraqlı tarixçəsi var. 1911-ci ildə İrandan təzəcə Türkiyəyə
gəlmişdim. Dostlarımla getdik yeməkxanaya plov yeməyə. Gətirib bizə saqqız
kimi plov verdilər. Biz təəccübləndik. Axı bizim Azərbaycanda plova min bir
ədviyyat vururlar. Ona görə də İstanbul plovundan yeyə bilmədim. Dostlarımdan
biri dedi ki, eybi yox, Emin bəy, allah qoysa Azərbaycan milli hökumətimizi
quranda Osmanlı hökumətinə bir bəyanat verərik ki, İstanbulda belə plov
bişirməsinlər.
Hamımız gülüşdük. O zamandan bəri mənim İstanbul plovu ilə aram
yoxdur.
Emin bəy geniş qəlbli, səmimi bir insan idi.
Növbəti görüşəcəyimiz adam Sami Yavrucuq bəydir. Bu adam haqqında
məlumatı Türk dünyasını Araşdırmalar Vəqfinin sədri Turan Yazqan verib.
Sami bəy müşavir işləyir. Əvvəlcədən zəng etmişik. Saat ikidə İnönü
caddəsində yerləşən iş yerində bizi gözləyəcəyini deyib.
...Səmimiyyətlə, mehribanlıqla görüşür bizimlə. Tez Yusif bəydən
soruşur:—Yusifcan, qardaşımız çörək yeyibmi, ac deyil ki?
...Sonra Sami bəy ötən günlərin xatirələrini danışır:
—Müharibədən sonra Türkiyədə mühacirlərin siyasi bir iş görməyi çətin idi.
Çünki o zaman vəziyyət gərgin idi. Turançılıq qadağan idi. Müəyyən adamlar da
vardı ki, müstəqilliyini itirib Türkiyəyə gələnlərin geniş təbliğat aparmağını
istəmirdi. Ona görə də məcbur olduq ki, mübarizəmizi qol götürüb oynamaqdan
başlayaq. İlk vaxtlar ancaq mədəni tədbirlərlə işimizi məhdudlaşdırırdıq. Bax, bu
sözləri ona görə deyirəm ki, rəhmətlik Emin bəyin necə çətin şəraitdə «Azərbaycan
davası»nı apardığını biləsiniz. Emin bəyi ilk dəfə 1949-cu ildə Azərbaycan Kültur
Dərnəyinin konqresində gördüm. Elə ilk görüşümüzdən də məndə xoş təəssürat
oyatdı. Səmimi insan idi. Gözəl natiqliyi vardı. Əgər rəhmətlik bilsəydi ki, bir gün
həmişə həsrətində olduğu Azərbaycandan gəlib onu soraqlayacaq, axtaracaqlar.
Heç bilirsinizmi necə sevinərdi?
Görüşəcəyimiz növbəti adam ginekoloq-həkim İldəniz Qurtulandır. İldəniz
bəy haqqında Yusif bəy dostlarının birindən öyrənib. İldəniz bəyə zəng edirik.
Razılaşırıq ki, istirahət günü onun evində görüşək.
İldəniz bəyin qaldığı yer uzaqdadır. İstanbulda qaldığım bu neçə gündə ilk
dəfədir ki, belə uzaq yol gedirik. «Qazlıçeşmə»də minirik qatara. «Eminönü»
230
limanına gəlirik. Limanda «Kadıgöy» gəmisinə minirik. 10 dəqiqəyə qədər
Mərmərə dənizinin gözəlliyinə baxa-baxa gedirik. Kadıgöydə gəmidən düşüb
avtobusla «Anadolu sitəsi»nə —İldəniz bəyin evinə üz tuturuq.
...İldəniz bəy evdə bizi gözləyir. Stolun üstündə çoxlu sənədlər, materiallar
qoyub. Diqqət edirəm. Məmməd Əmin Rəsulzadənin çıxardığı jurnalların hamısı
burdadır: «Yeni Qafqasiya», «Azəri türk», «Odlu yurd», «Qurtuluş»... İldəniz bəy
deyir ki, bunlar hamısı Mirzə Balanın arxivindəndir. Rəhmətliklə bir yerdə
çalışırdıq. Dünyadan köçəndən sonra arxivini qoruyub saxlamışam. Sonra
Məmməd Əmin Rəsulzadənin dəfn mərasimindəki şəkilləri göstərir. Nədənsə
halım pisləşir. Diqqətlə, diqqətlə baxıram matəm şəkillərinə. İldəniz bəy də, Yusif
bəy də əhvalımın dəyişdiyini hiss edirlər. İçəri ağrılarıma bürünmüş halda astadan
deyirəm: allah rəhmət eləsin.
Sonra
İldəniz bəy Məmməd Əmin Rəsulzadənin «Azərbaycan
cümhuriyyəti»ni yazarkan kağıza yazdığı qeydləri göstərir. Diqqətlə Məmməd
Əmin Rəsulzadənin öz xətti ilə yazdığı qeydlərə baxıram: «Göyçay alayı imiş,
Lənkəran deyil», «6-cı fəsil, 12-ci maddədə dəyişiklik etmək», «1918-ci il
yanvarın 12-də Nuru Paşaya verilən ziyafətin təfsilatını Məmməd Əlidən istəmək!»
Bu onun qeydləridir. İlk dəfədir ki, öz dəst-xəttini görürəm.
Sonra Mirzə Balanın o dövrün materiallarını, jurnal və qəzetlərini neçə
səliqə ilə toplamağına heyrət edirəm. Və düşünürəm ki, bu sənədlərin hamısında
Azərbaycanın nəfəsi var. Mirzə Bala doğma yurdu üçün az yanmayıb ki! Amma
indiyə kimi əsiri olduğumuz qanlı rejim qoyubmu ki, gəlib xalqımızın bu
vətənpərvər oğullarının nakam taleyi ilə maraqlanaq!
Sonra İldəniz bəy Məmməd Əmin Rəsulzadə haqqında xatirələrini danışır:
— Atam Əjdər Babazadə əslən Bakıdan—Çəmbərəkənddəndir. 1920-ci il
hadisələrindən sonra «gizli müsavat»ın üzvü olub. Vəziyyət pisləşdikcə onun da
başı üzərində ölüm təhlükəsi dolaşıb. İş o yerə gəlib çatıb ki, sağ qalmağına
ümidini tamam itirib. Bir təsadüf nəticəsində canını qurtaran atam sonradan həmişə
adının yanında «Qurtulan» yazdırıb.
Emin bəyin adını da ilk dəfə atamdan eşitmişəm. Bax, bu albomumdakı
uşaqlıq şəkillərimə diqqət edin. Burda üç rəngli milli Azərbaycan bayrağımız
görünür. Atam bu bayrağı əziz bir xatirə kimi asar, həmişə də məhəbbətlə Emin
bəydən danışardı. 28 mayı—Azərbaycanın istiqlal gününü atam evimizdə bayram
kimi qeyd edərdi. O zamandan qəlbimdə Emin bəylə tanış olmaq, onunla görüşmək
istəyirdim.
1953-cü ildə İstanbula getdim. Atamın həmyerlisi, yaxın dostu Mirzə Bala
ilə görüşdüm. Nəhayət, Ankaraya getdim. Emin bəylə tanış oldum. Çox səmimi,
xoşxasiyyət, şirin bir adam idi. Hərdən zarafatla deyərdi: «İldəniz xoşbəxt adamdır,
çünki həm tibb universitetində oxuyur, həm də Mirzə Balanın universitetində».
Emin bəydə şəkər xəstəliyi vardı. Yadımdadır ki, ömrünün son illərində
İstanbula gəlmişdi. Xaricə getməliydi. «Şehirparası» mehmanxanasında qalırdı.
Dostları ilə paylaş: |