Xvii-bob. Ilk o`rta asrlar tarixshunosligi
Yüklə 393,79 Kb. Pdf görüntüsü
|
| 211 XVII-BOB. ILK O`RTA ASRLAR TARIXSHUNOSLIGI V-VI asrlarda O`zbekiston tarixi Eftaliylar davlati tarixi bilan bog`liq. Eftaliylar saklar va massagetlarning avlodlaridir. Eftaliylar juda katta hududda o`z hukmronliklarini o`rnatdilar. 563-567 yillari turk hoqoni Istemi (Dizovul) Eron hukmdorlari bilan ittifoq tuzib, Eftaliylar davlatiga zarba beradi va ularga qarashli yerlarni bo`ysundirishga muvaffaq bo`ladi. VI asr o`rtalarida Turk hoqonligi zaminida ilk katta yer egaligi munosabatlari shakllana boshladi. O`zaro urushlar natijasida bo`linib ketgan G`arbiy turk hoqonligi markazlashmagan davlat bo`lib, 15 ga yaqin mustaqil hokimliklardan, So`g`dda yuechji xalqidan chiqqan jabg`u, Buxoroda mahalliy buxorxudot, Farg`onada ixshidlar kabilardan tashkil topgan edi. Hoqonlik tarkibiga kirgan xalqlar bir qismi So`g`d, Xorazm, Toxariston, Farg`ona dehqonchilik, shahar aholisi hunarmanchilik va savdo-sotiq bilan, uning tog`li va cho`l tumanlarida istiqomat qiluvchi katta qismi esa chorvachilik bilan shug`ullangan. O`rta Osiyo davlatlari bilan Turk hoqonligi o`zaro munosabatlari tarixini T.Saidqulov, L.N.Gumilev, Abushiy Xasan Ato va Turon Usmon asarlari orqali bilib olishimiz mumkin. Bu asarlar orasida Nasimxoning «Turk hoqonligi» nomli asari alohida o`rinni egallaydi. Garchi olim filolog bo`lsada, qadimgi turkiylarning imon-e`tiqodi, madaniyati, turmush tarzi haqida qiziqarli ma`lumotlarni keltiradi. Ushbu asarning e`tiborli joyi shundakim, N.Ya.Bichurin, S.G.Klyashtorniy, V.A.Livishits kabi tarixnavislarning ilmiy merosini yangicha yondashuv asosida talqin qila olgan. Arablar O`zbekiston hududiga 674 yildan boshlab bostirib kira boshladilar. 705 yildan boshlab arablarning O`zbekiston ustiga istilochilik yurishlari kuchaydi. Bunga arablarning Xurosondagi noibi Qutayba ibn Muslim (715 yili hozirgi Andijon viloyatining Jalolquduq tumanida, hozirgi Shurunch mozor, aslida Qilich mozor temir yo`l bekati yonida o`ldirilgan) boshchilik qildi. Arab istilosi O`zbekistonning ijtimoiy-iqtisodiy va madaniy taraqqiyotiga katta zarar yetkazdi, ko`plab katta va boy shaharlarning kuli ko`kka sovurildi, ming-minglab kishilarning «yostig`i quridi», Marv, Buxoro, Samarqand va Xorazm kutubxonalarida saqlanayotgan juda ko`p noyob asarlar yo`q qilindi. O`zbekiston xalqlari arab istilochilariga qarshi bir necha bor qo`zg`olon ko`tardilar. Shular sirasida 769-776 yillarda butun Movarounnahrni larzaga solgan Muqanna (783 yili o`ldirilgan) boshchiligida bo`lib o`tgan qo`zg`olon tarixshunosligi mustaqillik yillarida alohida o`rganildi. Masalan G`ulom Karim «Muqanna qo`zg`oloni muarrixlar talqinida» // Ma`rifat, 2003 yil 8 fevral, 15 fevral, 15 may sonlarida. 212 Ibn Xalikkon Muqannaning nomi Ato bo`lgan deb yozadi. O`rta asrlarda yashagan arab muarrixi turkiy «ota» so`zini shunday yozgan bo`lishi mumkin. O`sha zamonda islomni qabul qilgan turonliklar asl turkiy va sug`diy nomlaridan tashqari, arabcha ism yoki laqablar ham olishi urf bo`lgan edi. Shu narsa diqqatga sazovorki, qadimgi tarixiy manbalarda ham Muqanna qo`zg`oloniga turlicha munosabat bilan yondoshish hollari bo`lgan. O`rta asrlarda oq kiyimlilar harakatiga maxsus bag`ishlab yozilgan asarlar qatorida Abubakr Narshaxiyning «Buxoro tarixi», Ibrohim ismli muarrixning «Axbori Muqanna» («Muqanna haqida xabarlar») kitoblari tilga olinadi. Akademik V.V.Bartoldning taxminicha, bu asar muallifi asli kelib chiqishi turkiy xonadondan bo`lgan va arab tilida ijod qilgan mashhur shoir Ibrohim ibn Abbos as-Suliy bo`lishi kerak. Abu Rayhon Beruniy «Qadimgi xalqlardan qolgan yodgorliklar» asarida: «Muqanna haqidagi xabarlarni forschadan arabchaga tarjima qildim va ularni «Oq kiyimlilar va narmatiylar haqidagi xabarlar» nomli kitobimda to`la bayon etdim», deb ma`lum qiladi. Oq kiyimlilar qo`zg`oloniga, shuningdek, o`rta asrlarning Tabariy, Bal`aviy, Ibn Xallikon, Gardiziy, Abulfaraj Yahudiy, Ya`qubiy, Ibn al-Asir kabi ulkan muarrixlari o`z asarlaridan joy ajratishgan. Muqanna qo`zg`oloni zamonaviy tadqiqotchi va adiblarni ham ilmiy va badiiy asarlar yaratishga ilhomlantirib kelmoqda. O`tgan XX asrda «oq kiyimlilar» harakati haqida Sadriddiy Ayniy, A.Yakubovskiy, T.Qodirova va Poyon Ravshanovlarning muhim tadqiqotlari yuzaga keldi. Atoqli shoir Hamid Olimjon «Muqanna» tarixiy dramasi, yozuvchi Mirzapo`lat Toshpo`latov «Sanam tog`idagi gulxan» tarixiy qissasini yozdi. Xorijiy mamlakatlarda ham ilmiy tadqiqotlar yaratilgan bo`lib, Eron yozuvchisi Saif Nafisiy va argentinalik jahonga mashhur adib Xorxe Luis Borxesning Muqanna haqida hikoyalar yozishgani ma`lum. Arablar bosqini tarixiy bilimlar rivojiga ta`sir qilmasdan qolmadi. Insoniyat tarixida xalqlar hech qachon bir-biridan uzilib qolgan holatda yashamaganlar. Hayot dialektikasiga binoan bunday bo`lishi ham mumkin emas edi. Arab xalifaligi tarkibiga kirgan xalqlarning iqtisodiy va madaniy taraqqiyotidagi katta tafovutlar, mahalliy aholi va bosqinchilar o`rtasidagi ziddiyatlarning tobora kuchayib borishi tufayli Movarounnahrda Somoniylar (819 y) hokimiyat tepasiga keldilar. Bu hol mamlakatning iqtisodiy va madaniy yuksalishiga yo`l ochdi. Movarounnahr maxsus geografik termin sifatida arablar o`rtasida VII-VIII asrdan, aniqrog`i, arab istilolari boshlanish davridan ma`lum va «Daryo orqasidagi (Amudaryo ortidagi) yerlar» ma`nosini anglatgan. Darhaqiqat, shundan boshlab Movarounnahrning shon-shuhrati jahonga namoyon bo`ldi. Movarounnahr ilmu ziyo markazi sifatida butun dunyoga tanildi. U islom ulamolarini yetishtirgan, xususan, tarixshunos va geograf olimlar Vatani 213 sifatida olamda shuhrat qozongan muqaddas yurtdir. Vatanimizning IX-XII asrlaridagi madaniy yuksalishini tarixshunoslar sharq uyg`onish davriga mengzaydilar. Bo`riboy Ahmedovning «O`zbekistonning atoqli tarixshunos olimlari» (Toshkent, 2003) risolasida O`zbekistonda VIII-XIX asrlarda yashab ijod qilgan tarixshunoslar, ularning ilmiy faoliyati va muhim asarlariga qisqacha to`xtalib o`tiladi. Risola ikki qismdan iborat. Birinchi qismga tarixshunos va geograf olimlar kiritilgan bo`lib, ikkinchi qismida biograf olimlar va ularning muhim asarlari (tazkiralari, manoqiblari) haqida umumiy ma`lumot beriladi. Risolada IX-XII asrlarda yashab, ijod qilgan 8 ta yirik, madaniy yuksalishga hissa qo`shgan, tarixshunoslar haqida ma`lumotlar beriladi. Bular quyidagilardir: Abu Abdulloh Muhammad al-Xorazmiy – VIII-IX asrlarda (789-850 yy.) o`tgan xorazmlik qomusiy olim. Al-Xorazmiyning tarixiy asari – «Kitob ut-tarix» bo`lib, ayrim parchalari at-Tabariy (839-923 yy.) va Ibn-al-Asir (1160-1234 yy.)ning kitoblari orqali bizgacha yetib kelgan. Bal`amiy – X asrda o`tgan buxorolik tarixnavis va davlat rabobi. Somoniylar qo`lida vazir vazifasida xizmat qilib, Tabariyning «Tarix ul-anbiyo» va – r-rasul va-l-xulofo» nomli asarini fors tilida muxtasar qilib qaytadan yozgan, natijada asardan foydalanish osonlashtirilgan. Abu Nasr Muhammad Utbiy (961-1022 yy.) X asrning yirik arabiynavis tarixshunos olimi. «Tarixi yaminiy» (Yamin-arab, o`ng qo`l; Sulton Mahmudga xalifa al-Qodir (991-1031) tarafidan berilgan) nomli asarni yozgan. Asar o`rta asr tarixshunosligiga xos va oid og`ir uslub-saj bilan yozilgan. Abu Hafs an-Nasafiy (1142-43 yy. vafot etgan) Samarqandlik tarixchi olim. Uning «Kitob ul-qand fi tarixi Samarqand» nomli asari mavjud. Bu asarda Samarqandning osoru atiqalari va ulamolarining tarjimai holi haqida ma`lumotlar beriladi. Baxtga qarshi asarning arabcha nusxasi saqlanmagan. Bizgacha yetib kelgani «Kichik qandiya» nomi bilan ataladi. Sam`oniy XII asrda yashab o`tgan mashhur qomusiy olim. Sam`oniy o`zidan katta yodgorlik qoldirib ketgan. U ikkita yirik asar «Kitob ul-ansob» («Nasablar haqida kitob») hamda yigirma jildlik «Tarixi Marv» kitoblarining muallifidir. Abubakr Muhammad ibn Ja`far ibn Zakariyo ibn Xattob ibn Sharik an Narshaxiy (899-959) X asrda yashab o`tgan buxorolik yirik tarixshunos olim. Narshaxiy asli Buxoroning Narshax (hozirgi Vobkent yonida) qishlog`idan chiqqan. Narshaxiy «Tarixi Buxoro» deb shuhrat topgan qimmatli bir asar yozib qoldirgan. Mazkur asar aslida arab tilida yozilgan, lekin arabcha matni saqlanmagan. Bizgacha uning qisqartirilgan forsiycha tarjimasi yetib kelgan, xolos. 214 «Tarixi Buxoro»da Zarafshon vohasining quyi oqimida joylashgan shahar va qishloqlarning geografik holati, mahalliy aholining VII-X asrlardagi turish- turmushi, Buxoroning diqqatga sazovor joylari, O`rta Osiyoning arablar tarafidan istilo etilishi, mamlakatning Somoniylar hukmronligi (819-1005 yy.) yillaridagi siyosiy tarixi voqealarigina qisqa tarzda bayon etilgan. «Buxoro tarixi»ning hozirgi tarixshunoslik uchun qimmatli manba ekanligi shubhasizdir. Bizgacha yetib kelgan «Buxoro tarixi» so`z boshisida yozilishicha, kitobni 1128 yili arab tilidan quvalik Abu Nasr Ahmad ibn Muhammad ibn Nasr al-Quboviy o`z do`stlari taklifiga binoan fors tiliga tarjima qilgan. Quboviyning yozishicha, u tarjima jarayonida kitobdagi ortiqcha tasvir va keraksiz joylarni qisqartirgan, ammo asl mohiyati va mazmunini qoldirib, keyingi tarixiy voqealar bayonini o`zidan qo`shgan. Asar 1966 yili o`zbek tilida Sodiq Mirzaev tarjimasida Toshkentda nashr etildi. Eng so`nggi o`zbek tilidagi nashri 1991 yilda Bo`riboy Ahmedov tahririda chop etilgan bo`lib, tarixiy voqealarning xolisona bayoni uni qimmatli manba darajasiga ko`taradi. O`rta Osiyodan yetishib chiqqan olimlar tomonidan jahon ilm xazinasiga qo`shilgan hissaning naqadar buyukligi tarixchilar tomonidan qayd etilgan, tarixshunoslar tomonidan esa muntazam targ`ib qilib kelinadi. Hozirgi bizga ma`lum «arab raqamlari» aslida Muhammad Muso Xorazmiy tomonidan hind raqamlari asosida ishlab chiqilgan bo`lib, Rim papasi Sil‘vester II (999-1003 yillar) buyrug`i bilan Ovrupo mamlakatlarida joriy etiladi. Bu davrgacha o`ta noqulay rim raqamlari qo`llanilar edi. Sil‘vester yoshligida Ispaniyada ta`lim olgan, arab tilini bilgan zamonasining o`qimishli vakili edi. Dastlabki Ovrupa universitetlarining faqat tibbiyot bo`limlarida matematika o`rganilgan. O`rta asrlarda ko`pchilik shifokorlar matematik ham bo`lganlar. Ibn Sino nomini tarjimonlar o`z tillarida Aben Sena deb yozadilar. Bu nom oddiy tilda Aven Sina shaklida qo`llanilib, lotin transkriptsiyasida Avitsenna bo`lgan. Bizning tushunchamizdagi shifoxonalar Ovrupada faqat 1500-yillarda tashkil topadi. Ular bemorlarni Ibn Sino va ar-Roziy usullari bilan davolaydilar. «Al-Qonun», 1500- yilgacha hali kitob bosish ishi endigina amalga oshirila boshlagan davrda 16 marta chop etiladi. Bu XVII asr oxirigacha Ovrupada yagona qo`llanma va darslik sifatida qo`llanilgan. O`rta Osiyo olimlarining ilmiy taraqqiyotidagi xizmatlarini hozirgi zamon tarixshunosligi fani nuqtai nazaridan tahlil qilish barobarida ularning ijodiy merosini falsafiy-metodologik nuqtai nazardan o`rganish ham dolzarb vazifa. Aslida bu ham ana shu merosni istifodaga kiritishning yana bir yo`lidir. O`rta Osiyo olimlari yunon, hind olimlari erishgan natijalarni o`zlashtirish barobarida, fanni butunlay yangicha yondashuvlar, o‗ziga xos g`oyalar bilan boyitgani borasida dalillar yetarli. 215 O`rta Osiyo hududlarining tarixiy-geografik tavsifiga oid asarlarda tarixdagi ob`yektiv taraqqiyot qonunlarini ochib bermasdan, voqealarni faqat tashqi bog`lanishi va izchilligiga qarab tasvirlovchi (pragmatizm) oqimi ham mavjud bo`lgan. Bu yo`nalishning ham o`ziga xos murakkabliklari mavjud. U nafaqat Sharq olimlari asarlarini chuqur o`rganib chiqishni, ayni paytda G`arb falsafasining o`rta asrlardan to bugungi kungacha bo`lgan rivoji davomida ko`tarilgan g`oyalarning genezisi bilan tanishishni va qiyosiy tahlil qilishni talab etadi. Bu esa o`z navbatida oliy o`quv yurtlari uchun tarixshunoslik darsliklarini nashr qilishni talab etadi. Bunday o`quv qo`llanmalarda O`rta Osiyo mumtoz fani natijalarini hozirgi zamon nuqtai nazaridan baholashimiz kerak bo`ladi. Markaziy Osiyo ilk o‗rta asrlar (V - VIII) tarixi o‗ziga xos taraqqiyoti va mintaqaviy jarayonlari bilan ajralib turadi. Bu davr jarayonlarini aniqlashda sug‗dshunoslik sohasiga asos solgan va uni rivojlantirgan garb, rus, sovet va postsovet, sharq va o‗zbek olimlarnipg beqiyos xizmatlari bor. XIX asr oxiri XX asr boshlarida Sharqiy Turkiston vohalarida olib borilgan arxeologik tadqiqotlar natijasida moniy, suryoniy va uygur tiliga yaqin alifbolarda yozilgan yozma yodgorliklar topilgan. Bu noma‘lum "pahlaviy dialekti" yozuvini F.K. Anders, X asrga oid Beruniyning "Qadimgi xalqlardan qolgan yodgorliklar" asaridai sugdiy oy va kunlarning nomlanishini hujjatlardagi nomlar bilan qiyoslab tikladi. Bu xaqda 1904 yilda eronshunos F.V.K. Myullerga xabar berildi. Shu yildan boshlab sug‗d tili va yodgorliklarni o‗rganishga kirishilib, yangi soha sug‗dshunoslikka asos solindi. Sohaga F.K. Anders, P. Pelo, Myuller tamal toshini qo‗yishdi. Ular topgan aksariyat matnlar diniy-falsafiy mazmunda bo‗lib, Sharqiy Turkistondagi turk-sug‗d jamoalari tomonidan sug‗diy tilga sanskrit va xitoy tilidan qilingan tarjimalar olindi. Bu sohada boshlangan ishni, sug‗diy-suryoniy (xristian) matnlari asosida, K.G. Zaleman, 1906 yilda A.Steyn tomonidan Dunxuandan topilgan "Ko‗hna xatlar" ustida R. Plio, G. Rayxelt, keyinchalik V.B. Xeyaning, Ya. Xarmatta, V. Lens kabi olimlar davom ettirdilar. Sug‗diy til qonuniyatlarini P. Tedesko, sugdiy-buddaviy, sug‗diy-moniy va sug‗diy-suryoniy matnlardagi sug‗diy tili qonuniyatlari, yozuvlar shakli uslubi, tarjimasi, izohi bilan E. Benvenist, I. Gershevich, S. Telegdi, O. Xansen, F. Veller, D.N. Makkenzi, M. Shvars, N. Sims-Vilyams kabi olimlar ishlab chiqdilar. Jumladan, N. Sims- Vilyams so‗nggi yillarda topilgan sug‗d yozma yodgorliklarining o‗qilishi va talqini masalasida F.Grene bilan hamkorlikda ish olib bordi. Ular Janubiy Qozog‗istondan topilgan sug‗diy yozuvli Kultepa bitigini tahlil qilishdi. Sug‘dshunoslik sohasiga Osiyo olimlari tomonidan munosib hissa qo‗shilmoqda. Yapon olimlaridan Y. Yoshida Ipak yo‗li va u yerdagi sug‗diylarning savdo koloniyalari masalalarini so‗nggi yillarda topilgan yangi 216 materiallar asosida o‗rgangan bo‗lsa, K. Enoki ilk o‗rta asrlar Markaziy Osiyodagi etnik jarayonlar bilan shug‗ullandi. Eronlik olim B. Garib sug‗diy, forsiy va ingliz tillaridagi lug‗ati bilan sug‗dshunoslik uchun katta xizmat qildi. So‗nggi yillarda fransuz tadqiqotchisi F. Grene sug‗d yozma yodgorliklari va sug‗diylarning Markaziy Osiyo tarixi masalasida ilmiy tadqiqotlar olib bormoqda. U Sug‗d arxeologiyasi, tarixi va madaniyatiga oid qator ilmiy ishlarni chop ettirdi. Yevropa olimlarning barcha sug‗diy madaniyatni, eron madaniyatining bir qismi deb talqin qilib, xatoga yo‗l qo‗ymoqdalar. Vaholanki, sug‗diy madaniyat o‗ziga xos bo‗lib, bu madaniyat turkiy muhitda shakllangan va turkiy madaniyat bilan simbioz holatida faqat Markaziy Osiyoga xos turk-sug‗d madaniyatining ajralmas qismidir. Chunki Markaziy Osiyo sivilizatsiyasini sug‗diy (eroniy) yoki turkiy madaniyat sifatida alohida o‗rganish va tadqiq qilish mumkin emas. XX asr ikkinchi choragidan sobiq SSSRda sug‗dshunoslik bo‗yicha qator ishlar qilindi. XIX asr oxirlarida yevropalik olimlar qatori Sharqiy Turkiston arxeologiyasida ishtirok etgan Rossiya Fanlar akademiyasi Sharqiy bo‗limining arxeologik jamiyatining vakillari A.I. Koxanovskiy, N.I. Krotkova, S.F. Oldenburg va V.I. Roborovskiylar tomonidan bir qator buddaviy, moniy va xristian dinlari mazmunidagi matnlarning parchalari kolleksiyasi jamlandi. Mazkur noyob matnlar parchasidan iborat kolleksiyani L.N. Ragoza nashrga tayyorlab, chop etgirdi. 1932- 1933 yillarda Tojikistonning Panjikent shahri yaqinidagi Mug‗ qal‘asi xarobalaridan topilgan VIII asr boshlariga oid arxiv hujjatlari sovet sug‗dshunosligi uchun katta manba bo‗ldi. N.A. Vasilevning Mug tog‗i arxivi haqidagi ma‘lumotlari, A.A. Freyman ekspeditsiyasi aniqlagan 74 ta hujjat (teri, qog‗oz va yogoch parchasidagi shaxsiy va diplomatik xatlar, bitimlar, taqvimlar, xo‗jalik va hisob qaydlari, bitta arabcha, uchta xitoycha va bitta runiy yozuvidagi arxiv) 1934 yildan nashr etila boshlandi. 1962 yilda A.A. Freyman mazkur hujjatlarning tavsifi, nashri va tadqiqoti bo‗yicha o‗z ilmiy natijalarini nashr ettirdi. I.Yu. Krachkovskiy Mug‗ arxivining arab tilli hujjatlarini tarjimasi va talqinini e‘lon qildi. XX asr ikkinchi yarmidagi sug‗dshunoslik taraqqiyotiga V.A. Livshis katta hissa qo‗shdi. U nafaqat Mug‗ tog‗i arxivi hujjatlarini, balki sug‗diy matnlarning katta kompleksini amaliy o‗rgandi. Uning sohaga oid nashrlari orasida sugd yozuvi xillari va tili masalasi alohida o‗rin tutadi. V.A. Livshis Sharqiy eroniy tillar bo‗yicha mutaxassis L.A. Xromov bilan hamkorlikda sug‗d tilini maxsus tadqiq etdi. Sug‗dshunoslik sohasi rivojiga ulkan hissa qo‗shgan olima O.I. Smirnova 1962 yilda M.N. Bogolyubov bilan birga Mug‗ arxivining uchinchi qismini (xo‗jalik hujjatlarini) nashr ettirdi. U nafaqat Mug‗ arxivi hujjatlari ustida, balki ilk o‗rta asrlardagi Sug‗dning siyosiy tarixi, ijtimoiy-iqtisodiy hayoti, madaniyati va ayniqsa numizmatikasini o‗rganishda samarali ish olib bordi. Bu asarlarda 217 Sug‗dning mintaqada tutgan o‗rni, turk-sug‗d munosabatlarining siyosiy, ijtimoiy- iqtisodiy qirralariga daxldor ma‘lumotlar keltiriladi. So‗ngti yillarda Rossiyada sug‗dshunoslikning yangi avlodi yetishib chiqmoqda. Shulardan biri P. Lure hisoblanadi. Uning tadqiqotlari asosan sug‗diy toponimiyaning tarixiy-lingvistik tahlillariga bag‗ishlangan. O‗zbekistonda sug‗dshunoslik sohasiga XX asrning 70-yillarda asos solindi. V.A. Livshisning shogirdi M.M. Is‘hoqov O‗rta Osiyoda birinchilardan bo‗lib, sug‗dshunoslik bo‗yicha ilmiy tadqiqotlar olib borib, sug‗dshunoslik maktabini shakllantirmoqda. 2008 yilda M.M. Is‘hoqovning "Markaziy Osiyo dunyo yozuv madaniyati tizimida" nomli paleografik tadqiqotlarga bag‗ishlangan monografiyasi o‗zbek va jahon sug‘dshunosligining katta yutuqlaridan biri bo‗ldi. Uning shogirdlari O‗. Mansurov, Sh. Shoyoqubov, B.Mamarahimova, A. Xolmatov kabilar sug‗dshunoslikning kelajakdagi rivoji uchun hissa qo‗shishga kirishganlar. Ularning maqolalari va monografiyalarida sug‗diy hujjatlar, xususan Mug‗ arxivi izchil o‗rganilib, Sug‗dning ikki etnik birligi sug‗diylar va turkiylar o‗rni xolis yoritilganligi bilan xarakterlanadi. Sug‗d yozuvining mintaqadagi o‗rni va turkiy davlatchilikdagi ahamiyati G‗.B. Boboyorov tomonidan olib borilyotgan tangashunoslik tadqiqotlarida aks etmoqda. O‗zbekistonda sug‗dshunoslik sohasini rivojlantirish va o‗zbek olimlarining jahon sug‗dshunoslari bilan hamkorlik qilishi masalasi dolzarbligicha qolmoqda. Chunki, shu davrgacha qilingan sug‗dshunoslikka daxldor ilmiy maqolalar va ilmiy tadqiqot ishlari hozirda O‗zbekistonda mavjud manbalarga suyangan holda bajarilmoqda xolos. Vaholanki, so‗nggi yillarda Germaniya, Italiya, AQSh, Yaponiya va Xitoy kabi mamlakatlarda sug‗d yozma yodgorliklaring yangi namunalari asosidagi tadqiqotlar olib borilmoqda. O‗zbek olimlari ushbu jarayonga qo‗shilish uchun xalqaro internet tizimi, ilmiy mussasalar bilan hamkorlik va O‗zbekistonda sug‗d yozma yodgorliklari fondini yaratish uchun harakat qilishlari, soha bilan shug‗ullanuvchi mutaxassislarni bir markazga to‗plab faoliyat yuritishlari maqsadga muvofiq bo‗lar edi. Yüklə 393,79 Kb. Dostları ilə paylaş:
|