STENOQRAM
Səfir Riçard Morninqstarın Çıxışı
Xəzər Neft və Qaz Sərgisi qəbul mərasimi
Bakı, Azərbaycan
3 iyun, 2014-cü il
Bütün iştirakçıları ABŞ Səfirliyi, Britaniya Səfiri cənab İrfan Siddiq və
Londondan bura səfər
etmiş professor, Baş Nazirin Ticarət Nümayəndəsi Çarlz
Hendrinin adından salamlayıram.
Çıxışıma başlamazdan öncə burada iştirak edən bütün sponsorlara təşəkkür
etmək istəyirəm. Onların adları arxada yerləşdirilmiş plakatda qeyd edilmişdir.
Sponsorların dəstəyi olmasaydı, bu tədbir baş tutmazdı. Eyni zamanda
“AzerSun” tərəfindən göndərilmiş böyük gül buketini də xüsusilə qeyd etməyə
bilmərəm.
Bu, Xəzər Neft və Qaz Sərgisinin keçirilməsinin 21-ci ilidir. 19-cu dəfədir ki,
Britaniya və Amerika Səfirlikləri Xəzər Neft və Qaz Sərgisinin şərəfinə təşkil
olunmuş qəbul mərasimi keçirirlər. Məncə onların əksəriyyətində mən
olmamışam, lakin on doqquz qəbul mərasiminin bir çoxunda iştirak etmişəm.
Bütün bu vaxt ərzində enerji istehsalçısı kimi Azərbaycanın rolu əhəmiyyətli
dərəcədə dəyişmişdir. Bakı-Tbilisi-Ceyhan boru kəmərinin inşası ilə
Azərbaycan dünya bazarlarının əsas neft təchizatçısına çevrilmişdir. Hazırda biz
Azərbaycanın Avropanın əsas qaz təchizatçısına çevrilməsinə imkan verəcək
Cənub Qaz Dəhlizinin inşasının şahidi oluruq.
Son iyirmi il ərzində ABŞ-ın regiondakı enerji siyasətinin məqsədi dəyişməz
olaraq qalmışdır. Birincisi, biz həmişə Azərbaycanın güclü və müstəqil dövlətə
çevrilməsi üçün enerji resurslarının işlənilməsində ona kömək etmək istəmişik.
Güclü və sabit Azərbaycan regional sabitliyə töhfə verir və qlobal enerji
2
bazarları ilə münasibətdə region, eləcə də Avropa və bütün dünya bundan
faydalanır.
İkincisi, biz hər zaman Azərbaycanın enerji resurslarının Avropaya və dünya
enerji təchizatına töhfə verməsini istəmişik. Qlobal enerji təchizatının
şaxələndirilməsindən hər kəs faydalanır.
Aydındır ki, ötən iyirmi il ərzində bu məqsədlərə nail olunması istiqamətində
böyük tərəqqi əldə edilmişdir. İndi heç kəs Azərbaycanın qlobal enerji
təchizatına verdiyi əhəmiyyətli töhfəni şübhə altına ala bilməz.
Belə bir tədbirdə qeyd etmək yerinə düşərdi ki, Azərbaycanın enerji sektorunun
inkişafında Azərbaycan hökuməti ilə birgə əməkdaşlıq əsasında fəaliyyət
göstərən böyük operatorlardan və böyük şirkətlərdən tutmuş kiçik sub-
podratçılara qədər bir çox şirkətlərin əməyi olmuşdur.
Bu cür böyük şirkətlərin bir çoxu bugünkü qəbul mərasiminin keçirilməsinə də
töhfə vermişlər. Bir daha sizə
təşəkkür edirəm, diqqətinizə görə minnətdarlığımı
bildirirəm və ümid edirəm ki, bu axşam hər biriniz üçün maraqlı və məhsuldar
keçəcəkdir və mən mikrofonu Səfir Siddiqə ötürürəm.
###