11
itiləşmiş və anlaşılmaz olur. Zahirən belə nitq bir çox hallarda şizofaziyanı (nitqin
qırıqlığı) xatırlada bilər, lakin diqqətlə təhlil etdikdə, məlum olur ki, burada
təfəkkürün qırıqlığından fərqli olaraq müəyyən fikir ardıcıllığı və məzmun vardır.
Belə hal MDP-nin maniakal fazası üçün xarakterikdir.
2)Təfəkkürün ləngiməsi. Təfəkkürün sürətlənməsinin əksinə olaraq bu zaman
xəstələr çətinliklə danışır, fikirlər sanki tormozlanmış olur. Xəstələr bəzən qeyd
edirlər ki, fikirlərinə heç nə gətirə bilmirlər,”deməyə sözləri yoxdur”. Bir qayda
olaraq, həkimin suallarına “hə” və ya “yox” deyə cavab verirlər, həm də bu sözləri
demək üçün xeyli fikirləşirlər. Belə xəstələr bütün günü danışmaya bilər, sanki
onların danışmağa marağı yoxdur. Təfəkkürün ləngiməsi MDP-nin depressiv
fazasında digər depressiyalarda, şizofreniya xəstəliyində rast gəlir.
3)Təfəkkürün patoloji müfəssəlliyi. Nitqin (fikirlərin) ləngiməsi, eyni zamanda
uzunçuluğu ilə diqqəti cəlb edir. Belə pozuntusu olan şəxslər bir söhbətdən
digərinə keçə bilmir, üçüncü dərəcəli (lazımsız) fikirlərlə doldurur, belə adamları
dinləmək yorucu olur.
Bir nəfər epilepsiya xəstəliyinə tutulmuş qadın şahid sifərilə məhkəmə prosesinə
dəvət olunur. Hakimin: “Qonşuluğunuzda məktəb binasının yanması təvsilatı
haqqında nə deyə bilərsiniz? Sualına belə cavab vermişdir: “Həmin gün adətim
üzrə səhər saat 7-də yuxudan oyandım, gedib qazı yandırdım, çay qoydum, sonra
əl-üzümü yuyub səhər yeməyi yedim, saat 8-ə 15 dəqiqə qalmış nəvəmi məktəbə
yola saldım, mətbəxə gedib günorta yeməyi hazırlamaq üçün soyuducunu açıb
oradan ət və digər lazım olan ərzağı çıxartdım...Hadisə gecə saat 12-də baş
vermişdir, şəxs o ərəfədə görüb-bildiklərini danışmaq əvəzinə, gündüz olan
hadisələr haqqında saatlarla danışmış və nəhayət demişdir: “Həmin gün saat 11-də
yuxuya getmişəm, yanğının nə vaxt və necə baş verdiyini görməmişəm. Səhər
qonşulardan eşitmişəm kməktəb binası yanıb...” Bir çox hallarda təfəkkürün
patoloji müfəssəlliyi olan xəstələrin nə demək, hansı fikri anlatmaq istədiklərini
başa düşmək olmur. Belə pozuntu epilepsiya xəstəliyinə tutulmuş şəxslərdə tez-tez
rast gəlinir.
4)Təfəkkürün perseverasiyası. Təfəkkürün müfəssəlliyindən fərqli olaraq burada
xəstənin öz cavablarını təkrar etməsi nəzəri cəlb edir. Bəzən xəstə eyni söhbətləri
bir neçə dəfə təkrar edir, müxtəlif suallara eyni məzmunlu cavablar verir.
Epilepsiyada, beyinin orqanik pozuntularla əlaqədar baş verən psixozlarında rast
gəlinir.
12
5)Təfəkkürün steriotipiyası. Eyni sözlərin və fikirlərin məcburi təkrar olunması
kimi özünü göstərir. Bəzən eyni hərəkətlərin təkrarı ilə birlikdə təzahür edir. Bir
xəstə əllərini bir-birinə vuraraq, başını yana hərəkət etdirməklə dəfələrlə “mən
bilirəm, mən bilirəm...” sözlərini təkrar edirdi. Tibb işçiləri isə əbəs yerə xəstəni
sakitləşdirməyə çalışırdı. Belə vəziyyət şizofreniya xəstəliyində tez-tez rast gəlinir.
6)Rezonyorluq boş mühakimələr, mənasız sözlərdən nitq formasında özünü
göstərir. Xəstələrdən biri yoldaşı ilə söhbət edərkən müxtəlif formada, dəfələrlə
aşağıdakı sözləri təkrar etmişdir: “...mənim kim olduğumu hamı çox gözəl bilir.
Kimliyimi heç kəsə sübut etmək fikrində deyiləm, onsuz da hamı bilir mən
kiməm...”
7)Məntiqsiz təfəkkür. Fikirlərin məntiqsizliyi. Bəzən əlaqəsizliyi ilə xarakterizə
olunur. Hadisələri izah edərkən belə şəxslər nəinki səhv edir, mənasız, ziddiyyətli
mülahizələr yürüdür, eyni zamanda ağıla sığmayan söhbətlər danışırlar. Məsələn,
bir xəstə demişdir: “Mən gənc yaşlarımda at belində çox gəzmişəm, ona görə də E
vitamininə ehtiyacım olmayıb”. Başqa birisi isə demişdir: “Mən heç vaxt dəvə əti
yeməmişəm, ona görə də dişlərim tüz tökülüb və riyaziyyatı çətin qavramışam”.
8)Təfəkkürün (nitqin) qırıqlığı. Fikirlərin dolaşıqlığı, əlaqəsizliyi, “söz yığımı”
şəklində təzahür edir. Bu pozuntu dərəcəsinə görə 3 formada rast gəlinir: a)nitqin
assosiasiyası; b)qrıqlığı; v)şizofaziya (söz yığımı). Assosiativ pozuntu zamanı fikir
tamlığı, məzmunun bütövlüyü olmur. Qırıqlıqda cümlələr arasında, şizefaziya
zamanı isə hətta sözlər arasında əlaqə olmur. Bir xəstədən soruşduqda şikayətiniz
nədir, o belə cavab vermişdir: “Başım ağramır, şor qabından, nahaq danışma, nə
danışırsan, həkimkimdi, poçtalyon gəlmədi, Ərəbzəngi mənəm, çıx get”.
Təfəkkürün qırığlığının bütün formaları, o cümlədən şizofaziya şizifreniya zamanı,
ağır infeksion, intoksikasion psixozlarda rast gəlinir.
9)Aytistik təfəkkür real həyatdan uzaqlaşmaq, xəstənin daxili aləmi ilə (səhv
təsəvvürləri ilə) bağlı, obyektiv təcrübəyə əsaslanmayan, dialektik izaha tabe
olmayan təfəkkür formasıdır. Bu vəziyyət şizofreniya xəstəliyinin xarakter
əlamətlərindən biri olan autizm (özünə qapanma) sindromu çərçivəsində rast
gəlinir.
10)Təfəkkürün ambivalentliyi (qoşalaşması) xəstədə eyni vaxtda bir-birinə ziddi
fikirlərin meydana çıxmasıdır. Məsələn, xəstə ona vurulan iynəni ən güclü
müalicəvi təsirə malik dərman, həm də xərçəng xəstəliyinə səbəb olan maddə
hesab edir.