Xülas
ə
.
Məqalədə tank əleyhinə vasitələrin effektivlik əmsalının təyin edilməsi sahəsində
mövcud problemin mahiyyəti açıqlanır, effektivlik əmsalının onların taktiki-texniki xüsusiyyətlərinin
xətti kombinasiyası kimi göstərilməsi və bunun əsasında həmin kateqoriyaya aid olan yeni silahların
effektivlik əmsalının hesablanması üçün metod təklif olunur. Qurulmuş riyazi modeldən istifadə
etməklə bir sıra tank əleyhinə vasitələr üçün effektivlik əmsalları hesablanır, mövcud effektivlik
əmsalları ilə müqayisə edilir və riyazi modelin münasib olduğu göstərilir. Eyni zamanda, xətti
kombinasiya üçün müəyyən edilmiş əmsallarla müvafiq taktiki-texniki xüsusiyyətin silahın
effektivliyinə olan təsiri arasında “uyğunsuzluğu” araşdırmaq məqsədilə taktiki-texniki xüsusiyyət
göstəricilərinin öz aralarında və onların hər biri ilə effektivlik əmsalının göstəricisi arasında
korrelyasiya əlaqəsi öyrənilir, həmin göstəricilər üçün Pirsonun xətti korrelyasiya əmsalları
hesablanır. Effektivlik əmsalının döyüş xüsusiyyətlərindən - silahın atəş gücü, mobilliyi, yaşama
davamlılığı və tətbiqiliyindən, onların isə, öz növbəsində taktiki-texniki xüsusiyyətlərdən asılılığı
modelləşdirilir, taktiki-texniki xüsusiyyətlərin təsirini xarakterizə edən əmsalların işarə və
qiymətlərində müşahidə olunan “uyğunsuzluq” onların döyüş xüsusiyyətlərinə müxtəlif cür təsiri ilə
izah edilir.
Açar sözlər:
tank əleyhinə vasitə, döyüş xüsusiyyətləri, taktiki-texniki xüsusiyyət göstəriciləri,
effektivlik əmsalı, neyron şəbəkəsi, ən kiçik kvadratlar metodu, xətti korrelyasiya əmsalı.
Giriş
Digər silah və hərbi texnika kateqoriyalarında olduğu kimi, tank əleyhinə vasitələrin də
effektivliyi dedikdə, onun taktiki-texniki xüsusiyyətlərindən irəli gələn və əsas funksional xassələri
ilə əks etdirilən döyüş imkanlarının inteqral xarakteristikası nəzərdə tutulur [1, s.4]. Tank əleyhinə
vasitələrin effektivlik əmsalları bölmələrin döyüş potensialının, başqa sözlə, düşmənin zirehli
texnikasına qarşı döyüş imkanlarının hesablanması üçün ilkin verilənlər rolunu oynayır. Təlimnamə,
dərslik və digər mənbələrdə bu əmsallar, adətən cədvəl şəklində hazır verilir. Lakin bu cədvəllərdə
göstərilmiş tank əleyhinə vasitələrin siyahısı tam olmur və nümunə kimi, yalnız bir neçə silahın
effektivlik əmsalı verilir. Qeyd etmək lazımdır ki, müxtəlif mənbələrdə eyni bir tank əleyhinə vasitəni
xarakterizə edən effektivlik əmsalları bir çox hallarda fərqli olur. Bundan başqa, silahlanmaya yeni
daxil olan tank əleyhinə vasitələrin effektivlik əmsalının müəyyənləşdirilməsi problemlər yaradır və
hər hansı bir mənbədən bu əmsalların əldə edilməsi uzun müddət mümkün olmur, cədvəllərdə belə
öz əksini tapmır.
Digər tərəfdən müxtəlif cədvəllərdə verilən bu cür əmsalların hesablanma metodu və ya
mənbəyi göstərilmir. Bəzi mənbələrdə [1, 2, 3, 4] effektivlik əmsalının hesablanma metodu təklif
edilsə də, bu metodlardakı bir sıra çatışmazlıqlar silahlanmaya yeni daxil olan tank əleyhinə
vasitələrin effektivlik əmsalının təyin edilməsini çətinləşdirir. Bunlardan aşağıdakıları göstərmək
olar:
eyni bir tank əleyhinə vasitə üçün müxtəlif metodlarla hesablanan əmsallar bir-birindən
fərqlənir;
metodlarda istifadə olunan düstur, qrafik və cədvəllər əsaslandırılmır, onların doğruluğunu
yoxlamaq mümkün olmur;
|