Microsoft Word Zamanin axari 2
Yüklə 1,64 Mb. Pdf görüntüsü
|
85 həqiqətləri həyata keçirmək istəmişəm» deyən Cavad Heyət 1954-cü ildə ürək əməliyyatları aparmağa başlayıb. 1961-ci ildə İran mühiti üçün böyük uğur sayılan, ilk dəfə böyük müvəffəqiyyətlə keçən açıq ürək əməliyyatı da Cavad Heyətə aiddir. O, İranda eksperimental cərrahiyyənin bünövrəsini qoyub, ilk dəfə ürək qapaqlarını dəyişdirib. Tehranda ilk böyrəkköçürmə əməliyyatları da məhz Cavad Heyətin adı ilə bağlıdır. Bu nailiyyətlərə görə o, 1963-cü ildə Beynəlxalq Cərrahlıq Akademiyasının üzvü seçilib. Az vaxtda ürək cərrahiyyəsinin öncülü kimi məşhurlaşan Cavad Heyət 1983-cü ildə dünyanın ən şöhrətli cərrahiyyə qurumu olan Paris Cərrahiyyə Akademiyasına üzv seçilib. Tibbə aid çoxlu sayda sanballı kitabın, cərrahiyyəyə aid üç cildlik dərsliyin müəllifi, 12 il «Daneşe pezeşki» – «Tibb elmi» dərgisinin naşiri olan doktor Cavad Heyət 1988-ci ildən Azad İslam Universitetinin cərrahiyyə professorudur, Universitetin cərrahlıq şöbəsinin rəhbəridir. Bu, həm də o deməkdir ki, yeni Cavad Heyətlər yetişir, Cavad Heyət öz elmini, öz biliyini əsirgəmədən tələbələrinə öyrədir. Demək, «Çalışmışam ki, həyatda elm öyrənəm və elm öyrədəm. İnsan həyatda biliklə yaşamalıdır» deyən Cavad Heyət, həm də böyük müəllimdir. İslam dünyasının böyük şəxsiyyəti Həzrəti Əlinin belə bir fikri var: «Kim mənə bir hərf öyrətsə, ömrüm boyu ona qul olaram». Bu mənada, tələbələri Cavad Heyətə çox borcludurlar. Bütün bu sadaladıqlarımın hamısı, bəlkə də, dildə çox asan səslənir. Amma bunların arxasında yuxusuz gecələr, gərgin və hərtərəfli çalışmalar, nəzəriyyə və bu nəzəriyyəyə əsaslanan praktika, böyük səbir, təmkin, iradə dayanır. Özünün dediyi kimi, bu işlər ona həyəcan, emosiya, stress, iztirab bahasına başa gəlib. Hər bir sənət sahibi ilk addımını həyəcanla xatırlayır:
86 istər həkim, istər yazıçı, şair, istərsə də digər peşə sahibləri. Cavad Heyət də keçirdiyi ilk cərrahiyyə əməliyyatını, özü də çox uğurlu əməliyyatı həm sevinə-sevinə, həm həyəcanla xatırlayır. Bunun özü də xoşbəxtlikdir. Dünyaşöhrətli korifey cərrahlardan biri olan doktor Cavad Heyətin elmi fəaliyyəti təkcə təbabətlə məhdudlaşmır. O həm də böyük tarixçi alim və filoloqdur. Ömrünün önəmli bir hissəsini Azərbaycan-türk tarixinin, dil və ədəbiyyatının tədqiqinə həsr edib, elmi türkoloji araşdırmalarla məşğul olub, naşirlik edib. Cavad Heyət sənəti, ədəbiyyatı, dilçiliyi, tarixi də bir həkim kimi tədqiq edib və özü demişkən, bunun da xeyrini görüb. Cavad Heyətin ən böyük xidmətlərindən biri də onun «Varlığ»ıdır. İranda İslam İnqilabının qələbəsindən sonra verilən nisbi dil azadlığından bəhrələnən alovlu vətənpərvər ziyalı dostları ilə birgə «Varlıq» dərgisinin nəşrinə başlayır. Nə az, nə çox, düz 26 ildir ki, Azərbaycan-türk dili, ədəbiyyatı, tarixi və folklorunu bu jurnal vasitəsilə yayır. Mən «varlığımızın ifadəsi və sənədi olan» azadlıq quşu «Varlıq» haqqında xüsusi danışmaq istəyirəm. «Varlıq»! İnanmıram indi kiminsə bu dərgi haqqında informasiyası, məlumatı, bilgisi olmasın. İnanmıram, indi kimsə bu dərgi haqqında eşitməmiş olsun. İnanmıram, indi kimsə bu dərgi ilə öyünməsin, fəxr etməsin. Bu öyüncü, bu qürur hissini bizə bəxş edən isə sözün həqiqi mənasında, böyük azərbaycanlı olan doktor Cavad Heyətdir. Və 26 ildir ki, bu jurnal bizimlədir. Bəlkə də, belə uzunömürlü ikinci bir jurnal, dərgi ağlımıza, xəyalımıza gətirə bilmərik. Mətbuat tariximizə nəzər salsaq görərik ki, mətbu orqanlarımızın əksəriyyəti çox qısa ömür yaşayıb. «Varlıq» isə 26 ildir ki, bizimlə yol gəlir. Biz indi Cavad Heyəti – ağsaqqal alimimizi,
87 böyük təbibimizi, görkəmli naşirimizi təkcə 80 illik yubileyi münasibətilə deyil, həm də təməlini, bünövrəsini qoyduğu bu jurnalın 26 illiyi münasibətilə təbrik edirik. Cavad Heyət gözünün nurunu, zəkasını, işığını, ömrünü, həm də bu jurnalın səhifələrində şam kimi əridib. Min bir zəhmətə, əziyyətə qatlaşaraq gözəl bir «övlad» da böyüdüb. Cavad Heyət bu layiqli «övlad»ın üstündə əsim-əsim əsib və onu bütöv türk aləminə bəxş edib. Öz doğma dilində yazan «Varlıq», həqiqətən də, varlığımızın aynasına, mövcudluğumuzun güzgüsünə çevrilib. Digər tərəfdən, bu dərgi də öz naşirinə, öz yaradıcısına borclu qalmayıb, onu öz səhifələrinin yaddaşına həkk edib. Özü də həmişəlik. Cavad Heyət İran inqilabından sonra Tehranda «Varlıq» dərgisini çap etdirməklə türk mənəvi birliyinə qapı açdı, həm də bir məktəbə çevrildi. Bu jurnal az vaxtda böyük uğur qazandı: milli fikrin formalaşması, ədəbi dilin yayılması, o tay-bu tay məsələsində öz sözünü dedi. Cavad Heyətin yaratdığı «Varlıq» məktəbi İran türklərinin milli mədəniyyətini hansısa ideologiyaya bağlılıqdan azad etdi. Bundan başqa, İranda unudulmuş fikir sahibləri, ədəbiyyat və mədəniyyət xadimlərinin adları və əsərləri «Varlıq» vasitəsilə tanıdıldı, təbliğ olundu. Stokholmda yaşayan soydaşımız Əlirza Ərdəbilinin təbirincə desək, «Varlıq» məktəbi mənəvi dünyamızın coğrafiyasını bizə tanıtdırmaqla dünya xəritəsində durduğumuz yerin koordinatları ilə bizi tanış etdi. Nə gözəl ki, bu gün ən kütləvi mətbuat orqanı olan «Varlıq» hər sayında öz oxucularını elmin, ədəbiyyatın, folklorun seçmə nümunələri ilə tanış edir, dilimizi təbliğ edir. Burada çap olunan silsilə məqalələr dilimizin tarixini, qrammatikasını, ədəbiyyat tariximizi, folklorumuzu əks etdirir. Həm də ana dilimizin nə qədər əzəmətli, zəngin, gözəl, musiqili bir dil olduğunu nümayiş etdirir, ədəbi dilimizin
Yüklə 1,64 Mb. Dostları ilə paylaş:
|