82
BAKI UNİVERSİTETİNİN XƏBƏRLƏRİ
№2
Sosial-siyasi elmlər seriyası
2011
UOT 101.1
ELMİN İNKİŞAFINDA VARİSLİK PRİNSİPİ
V.S. SƏLİMOV
Bakı Dövlət Universiteti
s.vuqar@yahoo.com
Məqalədə elmin inkişafında varislik prinsipi, onun xüsusiyyətləri və təzahür etmə
formaları araşdırılır. Ənənələrlə innovasiyalar arasındakı dialektik münasibətlərin elmi
subyektlərin (alimlər, elmi məktəblər, elmi istiqamətlər və s.) fəaliyyətinə təsiri təhlil olunur.
Elmin inkişafında varislik prinsipinin pozulmasının elmi ənənələr və təcrübələr arasında
rabitənin qırılmasına gətirib çıxardığı göstərilir. Bu məsələ keçmiş sovetlər birliyi dövründə
humanitar elmlərin timsalında şərh olunur. Elmi inkişafın mühüm mərhələlərində fəlsəfənin
xüsusi aktuallıq kəsb etməsi səbəbləri göstərilir. Elmlərin diferensiasiyasında və inteqrasiya-
sında, elmi biliklərin empirik, nəzəri və metanəzəri səviyyələrində varislik prinsipinin yeri və
rolu məsələsi analiz olunur.
Açar sözlər: varislik prinsipi, ənənələr, innovasiyalar, elmi biliklər, elmi idrak, elmi
subyektlər
Elmdə varislik prinsipinin tədqiq edilməsi elm tarixinin, onun inkişaf
qanunauyğunluqlarının sosial-fəlsəfi və metodoloji baxımdan dərindən başa
düşülməsində mühüm əhəmiyyət daşıyır. Bu prinsip elmi biliklərin inkişafının
fundamental qanunauyğunluğu olaraq özündə elmi ənənələrin və dəyərlərin
nəsillərdən-nəslilərə ötürülməsi mexanizmini ifadə edir. Elmi varislikdə sa-
bitliklə transformasiya, fasiləsizliklə fasiləlik dialektik şəkildə bir-biri ilə
qarşılıqlı əlaqədədir.
Elmin dialektik qanunauyğunluqlardan irəli gələrək irəliyə doğru inkişaf
etməsi mexaniki, keçmiş ideyaların yeni mərhələdə sadəcə köçürülməsi, yaxud
nəzəriyyə və tədqiqat metodlarının sərf-nəzər edilmədən qeyri-yaradıcı şəkildə
əxz olunması demək deyildir. Elm həm xüsusi fəaliyyət forması, biliklər
sistemi, həm də sosial institut olaraq (1, 83) ənənələrlə novasiyaların qarşılıqlı
təsirini və mübarizəsini əks etdirən fasiləsiz yaradıcılıq sahəsidir. Ənənələr
həm elmi fəaliyyət vasitəsilə elmi təcrübələrin ötürülməsini təmin edir, həm də
elmdə yeninin formalaşması bazası olaraq onun məzmununun müəyyənləşmə-
sinə mühüm təsir göstərir. Ənənələrin elmi biliklərin əsaslandırılması və sübut
olunması zamanı mühüm meyar kimi çıxış etməsinin ciddi əsasları vardır.
Çünki ənənələr vasitəsilə “cəmiyyətin sistemində elmin statusunu təmin edən
elmi meyarlar, normalar və dəyərlərin qorunmasına çalışılır” (2, 5). Buna görə
83
də elmi biliklərin həqiqiliyinin müxtəlif vasitələrlə yoxlanılmasında keçmişdə
qazanılmış təcrübələr və ənənələr böyük əhəmiyyət daşıyır.
Elmi subyektlərin (alimlər, elmi məktəblər, istiqamətlər və s.) ənənələr-
dən və elmi əxzetmədən kənar fəaliyyət göstərməsi mümkün deyildir. Elmi
ideyalar keçmişə məxsus olan ənənələrin, nəzəriyyələrin və s. sərf-nəzər edil-
məsi, onlardan mütərəqqi olanların əxz edilməsi yolu ilə formalaşır. Elmi
ənənələrin zənginliyi yeni nəsil tədqiqatçılara səmərəli elmi araşdırmalar
aparmaları üçün geniş imkanlar yaradır.
Cəmiyyətdə ictimai münasibətlərin xarakterinin və elmi təfəkkür para-
diqmalarının dəyişməsi elmi fəaliyyət ənənələrində də yeniləşmələrə səbəb
olur. Ənənələrin özündə zəngin informasiya və elmi problemlərin həlli təcrü-
bəsini daşıması alimlərin yeni elmi tədqiqat istiqamətləri seçməsində mühüm
rol oynayır.
Elmi ənənələrlə novasiyaların qarşılıqlı mübarizəsi və vəhdəti elmin
inkişafının mühüm tərəflərindən birini təşkil edir. Elmi biliklərin dialektik
inkişafı zamanı keçmiş ənənələrə məxsus olan müsbət dəyərlər novasiyaların
tərkib hissələrindən birinə çevrilir. Daha doğrusu, elmi novasiyalar yeniliyi
ifadə etsə də, özünün ilkin mənbəyini elmi ənənələrdə tapır.
Elmin inkişafında varisliyin pozulması uzun illər ərzində toplanılmış
elmi ənənələr və təcrübələr arasında qarşılıqlı əlaqələrin qırılmasına gətirib
çıxarır. Fikrimizcə, bunu keçmiş Sovetlər birliyi dövründə humanitar elmlərin
timsalında bir qədər ətraflı izah etmək yerinə düşərdi. 1917-ci ilin oktyabr
inqilabından sonra siyasi-ideoloji səbəblərdən irəli gələrək sovet məkanında
əsasən humanitar elmlər sahəsində varislik prinsipi pozuldu. Həmin dövrdən
başlayaraq 70 il ərzində bu elmlər qarşısında belə bir vəzifə qoyuldu ki, onlar
marksizm-leninizm ideologiyasının müəyyənləşdirdiyi çərçivələr daxilində
formalaşmalıdır. Bundan kənara çıxmaq isə həmin ideologiyanın əleyhinə
getmək demək idi. Həmin dövrdə ABŞ və Qərb ölkələrində yaranan fəlsəfə,
sosiologiya, psixologiya və digər humanitar elmlər burjua ideoloqlarının
kapitalizmə xidmət edən uydurmaları hesab olunurdu.
Buna görə də, keçmiş sovet məkanında ABŞ və Qərb ölkələrinə məxsus
filosof, sosioloq və psixoloqların marksizm-leninizm ideologiyasına zidd olan
əsərlərinin tərcümə olunması, hətta müsbət mənada onlara istinad belə
qadağan edilmişdi. Sovet tədqiqatçısının həmin əsərlərlə tanış olmasına nəyin
bahasına olursa-olsun maneçilik yaradılır və bu niyyətə düşənlərə “burjuaziya-
nın nökərləri”, “sovet xalqının düşmənləri” epitetləri yapışdırıldı. Ümumiyyət-
lə bu məsələləri təhlil edərkən təbii olaraq belə bir sual ortaya çıxır: Əgər
marksizm-leninizm ideologiyasının termini ilə desək, “burjua filosofları, so-
sioloqları, tarixşünasları” mənasız və yaxud reallıqdan uzaq araşdırmalarla
məşğul olurdusa, onda nə üçün onların əsərlərinin tərcüməsi və yayılması
qadağan edilmişdi, sovet tədqiqatçılarının onlarla bilavasitə yaxından tanış
olması yolverilməz idi? Yaxşı olmazdımı ki, sovet alimlərinin “burjua”
humanitar elmlərindəki “mənasız və uydurma” fikirlərlə tanış olmasına imkan
84
yaradılaydı? Axı, əslində bu yol marksizm-leninizm ideologiyasının iddia
etdiyi kimi sovet humanitar elmlərinin üstünlüyünü aşkara çıxara bilərdi və
belə olan halda bu vasitədən nə üçün istifadə olunmurdu? Cavab birmənalı
şəkildə aydındır. Çünki Qərb ölkələrində humanitar elmlərin inkişafı, bu
sahədə aparılan tədqiqatların zənginliyi, onların istiqamətləri və məzmunu
sovet siyasi sisteminin rəhbərliyinə məlum idi. Ona görə də belə hesab edilirdi
ki, məsələn, sovet alimi Qərb fəlsəfəsi ilə marksizm-leninizm fəlsəfəsi arasın-
da müqayisələr aparıb ikincinin zəif cəhətlərini aşkara çıxara bilər (lakin nəzə-
rə almalıyıq ki, marksizm-leninizm fəlsəfəsini bütövlükdə inkar etmək də düz-
gün olmazdı, çünki onun elmi-metodoloji baxımdan əhəmiyyətli xüsusiyyətlə-
ri də vardır).
Göründüyü kimi bu qadağalarla keçmiş SSRİ məkanında humanitar
elmlərin inkişafı dar bir çərçivəyə salınır, onlar müasir dünya fəlsəfi və
sosioloji fikrindən məhrum edilirdi. Bu baxımdan keçmiş sovetlər birliyində
humanitar elmlər Qərb fəlsəfəsi, sosiologiyası, elmşünaslığı və digər sahələr-
dəki araşdırmaların və nəzəriyyələrin mahiyyətindən bir növ bixəbər şəkildə
inkişaf etməyə məcbur idi. Həmin dövrdə sovet alimlərinin apardığı tədqi-
qatlar marksizm-leninizm ideologiyasının müəyyənləşdirdiyi hüdudlardan
kənara çıxa bilmədi, bu səddi keçmək istəyənlər isə repressiyalara məruz
qalaraq cəzalandırıldı. Buna görə də keçmiş sovetlər birliyi dövründə
humanitar elmlərə, o cümlədən marksizm-leninizm fəlsəfəsinə alternativ olan
fəlsəfi sistemlər, nəzəriyyələr və istiqamətlər yarana bilmədi. Həmin dövrdə iş
hətta o yerə çatmışdı ki, əsərlərində marksizm-leninizm nəzəriyyəsi nümayən-
dələrinin fikirlərinə geniş yer verən humanitar elm sahələrinin alimləri möv-
cud ideoloji çərçivələrdən kənar, ötəri mülahizələr işlətdikdə belə repressiyala-
ra məruz qalırdılar. Yalnız keçmiş sovetlər birliyi dağıldıqdan sonra postsovet
məkanında humanitar elmlərin, xüsusilə fəlsəfənin ideoloji qadağalardan azad
inkişafı üçün geniş imkanlar yarandı.
Tarixi təcrübələr göstərir ki, tranzitar cəmiyyətlərdə sosial və humanitar
elmlər sahəsində baş verən dəyişiklərin, yeni metodoloji yanaşmaların
yaranmasının özünəməxsus xüsusiyyətləri vardır. Bu isə, hər şeydən əvvəl,
onunla bağlıdır ki, “sosial və humanitar elmlərin obyektləri təbiət elmlərinin
obyektləri ilə müqayisədə xüsusi ontologiyaya malikdir. Bu da öz növbəsində,
elmlər üçün ənənəvi olan koqnitiv formaların yenidən mənalandırılmasını
tələb edir” (3, 44). Buna görə də, keçmiş SSRİ süquta uğradıqdan sonra
ictimai elmlərin cəmiyyətdə gedən proseslərə yeni nəzəriyyələr prizmasından
yanaşaraq təhlil etməsi xüsusi aktuallıq kəsb etdi.
1990-cı ilin əvvəllərindən etibarən postsovet məkanında gedən ictimai-
siyasi, mənəvi-əxlaqi və sosial-iqtisadi proseslərin mahiyyətinin Qərb huma-
nitar elmlərinə məxsus hansı nəzəriyyələr və konsepsiyalar vasitəsilə tədqiq
edilməsi məsələsi ətrafında müxtəlif müzakirələr başladı. Aydın oldu ki,
“sosial-humanitar biliklər sahəsində mövcud nəzəri-dərketmə situasiyası icti-
mai şüurda və elmdə özünü qabarıq şəkildə göstərən ziddiyyətlərlə xarakterizə
85
olunur” (4, 92). Buna görə də “Sovet İttifaqı dağıldıqdan sonra bütün post-
sovet ölkələrində olduğu kimi, bizdə də ideologiyasızlaşdırma deyilən prinsip
bəyan edildi. Bu prinsip marksizm-leninizm ideologiyası ilə bağlı nə varsa,
hamısından tamamilə imtina olunmasını nəzərdə tuturdu və totalitarizmin,
kommunist ideologiyasının təzədən baş qaldırmasına imkan verməməli idi.
Lakin həmin dövrdə baş verən mürəkkəb proseslər nəticəsində yaranmış
boşluğu qısa müddətdə müxtəlif növ surroqat ideya və yanlış ideologiyalar
doldurdu” (5, 2).
İctimai elmlər sahəsində zamanın tələblərinə uyğun olan yeni metodoloji
yanaşma və prinsiplər formalaşdırılarkən elmi ənənələrin və təcrübələrin
nəzərə alınması məqsədəuyğun məsələlərdən biridir. Elmi-fəlsəfi nəzəriyyələr
real gerçəkliyi o halda adekvat izah edir ki, onlar keçmiş elmi ənənələri və
təcrübələri diqqət mərkəzində saxlayır. Buna görə də müasir dövrdə Azər-
baycanda ictimai elmlərin, xüsusilə fəlsəfənin inkişafı mütərəqqi elmi-fəlsəfi
ənənələr və təcrübələrlə dünya fəlsəfi fikrinin sintezini, onlar arasında
qarşılıqlı əlaqələrin mövcud olmasını tələb edir. Azərbaycanda fəlsəfə elminin
bu müstəvidə inkişafının məqsədəuyğun olmasının ciddi əsasları vardır. Çünki
elmlərin inkişaf dialektikasının başa düşülməsində və öyrənilməsində fəlsəfə
xüsusi yer tutur. Məhz fəlsəfə vasitəsilə elmin inkişafını ləngidən “standartla-
rın və mühakimələrin qəbul olunmazlığı aşkara çıxarılır” (6).
Tarixi təcrübələr göstərir ki, fəlsəfənin elmi inkişafın böyük dəyişiklik-
lərə səbəb olan mərhələlərində xüsusi aktuallıq kəsb etməsi hər şeydən əvvəl
onun özündə daşıdığı genetik keyfiyyətlərdən irəli gəlir. Çünki “fəlsəfə
özünün meydana gəlməsinin ilkin momentlərindən başlayaraq ciddi elm olmaq
iddiası ilə çıxış etdi. Bu iddia istər böyük, istərsə də kiçik enerji ilə çıxış etsə
də heç vaxt yox olmadı. O, hətta xalis nəzəriyyəyə maraqların itməsi təhlükəsi
yarandıqda və yaxud dini qüvvələrin elmi tədqiqat azadlıqlarını sıxışdırdığı
vaxtda belə yox olmadı” (7, 669). Fəlsəfə yaranmış elmi situasiyanın izah
olunmasında və başa düşülməsində əhəmiyyətli rol oynayır. O, elmlə yanaşı,
həm də daha geniş miqyasda, “mədəniyyətin universaliləri üzərində refleksiya-
nı həyata keçirir” (8). Ən böyük elmi nailiyyətlər fəlsəfi ümumiləşdirmələrin
aparılmasını tələb edir.
Elmi idrakın inkişaf dialektikasına uyğun olaraq müxtəlif elmlər və bir-
biri ilə qarşılıqlı əlaqə və təsir şəraitində inkişaf edir. Elmi biliklərin intensiv
inkişafı və zənginləşməsi elmlərin diferensiasiyasına və inteqrasiyasına gətirib
çıxarır. Ənənələrlə novasiyalar arasındakı qarşılıqlı təsir elmlərin diferensiasi-
yası və inteqrasiyası prosesində özünü göstərən mühüm faktora çevrilir.
Elmlərin diferensiasiyası təbiətdə, cəmiyyətdə və təfəkkürdə gedən proseslərin
ətraflı şəkildə öyrənilməsində və elmi tədqiqatçıların fəaliyyət sahələrinin
konkretləşməsində mühüm rol oynayır. Diferensial varislik elmlərin diferen-
siasiyası prosesində elmi biliklər arasındakı əlaqələri qoruyub saxlayır.
Mürəkkəb və qlobal problemlərin həlli isə elmlərin inteqrasiyasını
şərtləndirən mühüm amil kimi çıxış edir. Elmlərin inteqrasiyasında varislik
86
elmi faktların və hadisələrin izah olunması prosesində informasiyaların qar-
şılıqlı mübadiləsini, vahid effektiv tədqiqat metodlarının və yeni elm
sahələrinin yaranmasını təmin edir. Məsələn, cəmiyyətdə gedən sosial-iqtisadi,
ictimai-siyasi proseslərin dərindən və ətraflı şəkildə öyrənilməsi zərurətindən
irəli gələrək fəlsəfə, sosiologiya, politologiya və psixologiya elmlərinin
inteqrasiyası nəticəsində sosial fəlsəfə, sosial psixologiya, siyasi sosiologiya
və s. elm sahələrinin yaranmasında inteqral varislik özünəməxsus yer tutur.
Elmi biliklər sistemli xarakter daşıdığından onlar elmi nəzəriyyələrin
mühüm əsaslarından birini təşkil edir. Elmi nəzəriyyələr “elmi təsəvvürlərin
əsaslandırılmış və konseptual təşkil olunmuş sistemi” (9, 225) və nəzəri
təfəkkürlə empirik müşahidələrin birgə məhsulu kimi əsasən nəzəri problemlə-
rin həlli dövründə yaranır. Bu zaman keçmişə məxsus elmi meyarların hamısı
rədd edilmir və onların səmərəli olanlarından elmin yeni inkişaf mərhələsində
istifadə olunur. Varislik prinsipi nəzəriyyənin əsasında dayanan empirik
faktların toplanılması və yoxlanılmasında, onun komponentləri arasındakı
qarşılıqlı əlaqənin təmin olunmasında xüsusi yer tutur. Bu prinsip nəzəriyyə-
nin əsas müddəalarının dərindən əsaslandırılmasına kömək etməklə onun
praktiki tətbiq olunması səmərəliliyini artırır.
Elmi varislik elmi inkişafın hər bir keçid mərhələsində elmi anlayışlar,
tədqiqat metodları və prinsiplər arasında qarşılıqlı əlaqə yaradır. Elmin inkişa-
fının mühüm tərəflərindən birini mütləq və nisbi həqiqətlərin qarşılıqlı
dialektikası təşkil edir. Hər bir nisbi həqiqət və elmi nəzəriyyə öz başlanğıcını
mütləq həqiqətdə tapır. Elmin inkişafında nisbi həqiqətlərdən mütləq
həqiqətlərə keçid, o cümlədən keçmiş həqiqətlərin və nəzəriyyələrin yeni
metodlarla dialektik inkarı varislik prinsipi vasitəsilə təzahür edir.
Hər bir elmin sistem kimi dayanıqlığında onun tərkib hissələri arasındakı
qarşılıqlı əlaqələri və asılılığı təmin edən varislik əlaqəsi əhəmiyyətli rol oy-
nayır. Bu əlaqə elmin sosiomədəni fenomen kimi inkişafı üçün elmi nəzəriyyə
və konsepsiyalardan aktual və mühüm olanların seçilməsinə imkan yaradır.
Eyni zamanda o, yeni elmi istiqamət və elmi metodların yaranması prosesində
fundamental qanunauyğunluq kimi özünü göstərir.
Elmi biliklər mütəmadi şəkildə yeniləşir və varislik burada müxtəlif
formalarda (universal-anlayış, ənənəvi, normativ, elmi-idarə olunan və s.)
təzahür edərək elmi idrakın inkişaf mərhələləri arasında qarşılıqlı əlaqəni
təmin edir. Qeyd edək ki, varisliyin müxtəlif formalarda təzahür etməsi ictimai
münasibətlərin xarakteri, obyektiv və subyektiv amillərin təsiri ilə sıx şəkildə
bağlıdır. Elmi irsin sistemləşdirilməsi və qorunması prosesi varisliyin uni-
versal-anlayış forması sayəsində reallaşır. Elmi nailiyyətlərin mənimsənilməsi
və əxz olunmasının tənzimlənməsi mexanizminin əsasında varisliyin ənənəvi
forması dayanır. Burada aparıcı rol ənənələrə məxsus olduğundan istənilən
yenilik mövcud normalardan kənara çıxmaq kimi mənalandırılır. Elmdə indi
ilə keçmiş arasındakı münasibətlərin bu cür formada tənzimlənməsi öz əksini
elmi fəaliyyətdə də tapır.
87
Elmi məsələlərin kortəbii və təsadüfü həlli metodları müəyyən qanuna-
uyğunluqlar əsasında elmi metodlarla əvəzlənir ki, bu prosesdə varislik kor-
təbii və dərkedici formalarda təzahür edir. Elmdə varisliyin kortəbii forması
əvvəlcədən nəzərdə tutulmayan elmi biliklərin mənimsənilməsini və yenidən
işlənməsini ifadə edir. Əvvəlcədən qarşıya qoyulmuş məqsədlərə uyğun olaraq
elmi biliklərin dərk edilməsi isə “dərkedici varislik” anlayışı ilə ifadə olunur.
Əxz olunan elmi biliklərin dəyər-informasiya əhəmiyyəti elmdə varis-
liyin müsbət və mənfi momentləri ilə müəyyənləşir. Bu əsasda isə varisliyin
iki növü (perspektiv və loyal) bir-birindən fərqlənir. Varisliyin perspektiv
növü cəmiyyətin inkişaf səviyyəsinə cavab verən elmi biliklərin yaranmasında
və zənginləşməsində təzahür edir. Elmi biliklərin qarşısında dayanan perspek-
tiv vəzifələrin həllində isə loyal varislik özünü göstərir. Varisliyin bu növün-
dən irəli gələrək elmi biliklər konkret zaman çərçivəsində əxz olunur.
Hər bir elm özünün tədqiqat obyektindən asılı olaraq real gerçəkliyin
müxtəlif sahələrini adekvat əks etdirməyə çalışır. Tədqiqat obyektinin xüsusiy-
yətləri də öz növbəsində onu öyrənən elmin məzmununa təsir göstərir.
Məsələn, iqtisadiyyat elmi tədqiqat obyekti kimi iqtisadi sistemi, onun mahiy-
yətini və xüsusiyyətlərini araşdırır. Əgər iqtisadi inkişafda innovativ meyllər
artırsa, bu halda tədqiqat obyektinin əks olunmasının adekvatlığından irəli gə-
lərək iqtisadiyyat elminin özündə innovativ yanaşmaların mövcud olması zə-
rurətə çevrilir (10, 29).
Ümumiyyətlə hər bir elmin irəli sürdüyü anlayışlar, kateqoriyalar, kon-
sepsiyalar və s. əvvəlcə innovasiyalar kimi çıxış edirlər. Onlar elmi birlik
tərəfindən qəbul olunduqdan və verifikasiya prosesində həqiqət kimi təsdiq
edildikdən sonra elmin anlayışlar və kateqoriyalar aparatına daxil olur.
Elmi biliklərin inkişafının inqilabi və qeyri-inqilabi situasiyalarında
statik (kəmiyyəti) və dinamik (keyfiyyəti) varislik bir-birindən fərqlənir. Buna
görə də elmi biliklərin inkişafına müəyyən sistem çərçivəsindən və eyni
zamanda yeni sistemə keçid aspektindən yanaşmaq olar. Birinci halda kə-
miyyət dəyişmələri baş verir ki, burada sistemin informasiya həcmi artsa da
onun strukturu köklü dəyişikliklərə məruz qalmır. İkinci halda isə keyfiyyət
dəyişmələri özünü göstərir ki, burada bir sistemdən digərinə keçid baş verir.
Qeyd edək ki, varisliyin elmi biliklər arasındakı əlaqələri əks etdirməsi elmi
fəaliyyətin sistemli xarakter daşımasına təsir göstərən mühüm faktordur.
Elmi biliklərin inkişafı bir-biri ilə dialektik şəkildə bağlı olan mütərəqqi
və reqressiv varislik formalarında da təzahür edir. Mütərəqqi varislik sistem
kimi götürülmüş elmin inkişafını müəyyənləşir ki, onun əsas xüsusiyyəti elmi
biliklərin aşağı formalardan daha yüksək və təkmil formalara keçidlə bağlıdır.
Əgər elmin inkişafında faydalı olan biliklərin zənginləşməsi dinamik xarakter
daşımırsa, bu halda elmi biliklərin strukturunun dayanıqlığını, bütövlükdə
elmin sistem kimi mövcudluğunu və sabitliyini təmin edən əlaqələr zəifləyir
ki, bu prosesdə varislik reqressiv formada təzahür edir.
Elmi biliklərin strukturunda empirik və nəzəri biliklər varislik prin-
88
sipinin empirik və nəzəri formalarda təzahürünü şərtləndirir. Bu prinsip elmi
biliklərin göstərilən səviyyələri ilə yanaşı, onlarla müqayisədə daha ümumi və
“iki alt səviyyədən: 1) ümumi elmi biliklər və 2) elmlərin fəlsəfi əsaslarından”
(11) ibarət olan metanəzəri səviyyədə də təzahür edir. Elmi fəaliyyət
nəticəsində qazanılmış təcrübələr, əldə olunan nailiyyətlər biliklərin empirik,
nəzəri və metanəzəri səviyyələri arasında qarşılıqlı əlaqə yaradır. Buna görə də
elmi biliklərin bütün səviyyələri üzrə tədqiqatlar aparılarkən elmi təcrübələrin
və metodoloji yanaşmaların məqsədəuyğun olanlarından istifadə edilir.
Elmdə pozitiv varislik elmin inkişafının müxtəlif mərhələlərində onun
struktur elementləri, forma və metodlarını qoruyub saxlayan qanunauyğun
əlaqəni göstərir. Pozitiv varisliyin neqativ varisliklə mübarizə şəraitində
olmasını nəzərə alması elmi tədqiqatçının öz axtarışlarında düzgün mövqe
tutmasına kömək edir. Bunun nəticəsində dövrün tələblərinə cavab verən elmi
irs qorunub saxlanılaraq zənginləşir.
Elmi dəyərlərin yaradıcı və pozitiv şəkildə tədqiq olunmasında varisliyin
elmi-idarəolunan növü xüsusi yer tutur. Nəzərə alınmalıdır ki, “əgər dəyərlər
istənilən fəaliyyətin ayrılmaz elementidirsə, elmi idrak xüsusi fəaliyyət for-
ması kimi onlardan ayrı ola bilməz” (12). Mütərəqqi elmi dəyərlərin hər
şeydən əvvəl “klassik aksiologiyanın prezumpsiyası kimi çıxış etməsi” (13,
399) onların qorunub saxlanılmasının əhəmiyyətini artırır. Varisliyin elmi-
idarəolunan formasının əsas xüsusiyyəti elmi biliklərin nizamsız şəkildə deyil,
dəqiq hesablamalar əsasında elmi dövriyyəyə daxil olmasını təmin etməsidir.
Bu baxımdan daha geniş mənada götürsək, bəşəriyyəti narahat edən qlobal
problemlərin həllində elmi-idarəolunan varislik mühüm əhəmiyyət daşıyır.
Elmi tədqiqatçıların əxz olunan obyektin mahiyyətinə dərindən və fəal
şəkildə nüfuz etməsi varisliyin intensiv növü ilə bağlıdır. Elmi professio-
nallıqla sıx şəkildə əlaqəli olan varisliyin bu növünün reallaşmasında elmi
subyektlərin qarşısında dayanan məqsəd və vəzifələr mühüm rol oynayır.
Varisliyin ekstensiv növü isə əsasən seyrçi müşahidələr zamanı özünü göstərir
ki, bu halda elmi mülahizələrdə qeyri-dəqiqliyə, bəzən də yanlışlığa yol verilir.
Varislik prinsipi elmi tədqiqatçıların dünyagörüşünə, onların profes-
sional fəaliyyətinin formalaşmasına və inkişafına ciddi təsir göstərir. Elmi
tədqiqatçı yaşadığı dövrün çərçivələri və imkanları ilə məhdudlaşmamalı
zamanın fövqündə dayanaraq elmi uzaqgörənliklə gələcəyə baxmalıdır. Qeyd
edək ki, elmi biliklərin inkişaf meyarları onların “mütərəqqi toplanmasının və
yaxud ekstensiv artmasının sadə sxemləri” (14, 152) ilə məhdudlaşmır. Buna
görə də elmi tədqiqat zamanı keçmişdə qazanılan empirik təcrübələrə və nəzəri
yanaşmalara əsaslanmaq elmi idrakın inkişaf qanunauyğunluqlarının, onun
bütün tərəflərinin nəzərə alınması deməkdir.
Elmi fəaliyyət nəticəsində formalaşmış paradiqmaların və sosiomədəni
modellərin gələcək nəsillərə ötürülməsi normativ varislik sayəsində mümkün
olur. Bu halda varislik mövcud elmi normaların və dəyərlərin rasional dərk
edilməsini tələb edir. Varisliyin bu formasının elmi fəaliyyət subyektinə elmi
89
dəyərləri mənimsəmək üçün seçim imkanı verməsi onun fəallığını və
təşəbbüskarlığını stimullaşdırır.
Elmi biliklərin nəsillərdən-nəsillərə ötürülməsi elmi subyektlər tərəfin-
dən həyata keçirilir ki, burada elmi irsin qavranılması və zənginləşməsi onların
professionallığı, sosial statusu ilə sıx şəkildə bağlıdır. Bu zaman “alimin və
elmi birliyin dəyər yönümü idrak prosesində, elmi tədqiqatların istiqamətlə-
rində və xarakterində əhəmiyyətli rol oynayır. ... Bu eyni dərəcədə həm
humanitar, həm də təbiət elmlərinə aiddir” (15, 493). Elmi biliklər, istiqamət-
lər və məktəblərin yaranması elmi fəaliyyət praktikasının təkmilləşməsində
xüsusi yer tutur. Elmi məktəblərdə elmi ənənələr və dəyərlər qorunmaqla ya-
naşı, alimlərin yaradıcılıq enerjisi konsentrasiya olunur.
Elmi məktəblər yaranarkən onun əsasını qoyan alimin fərdi elmi kon-
sepsiyası kollektiv fəaliyyətin əsasını təşkil edir. Məsələn, buna misal kimi
Azərbaycanda dilçilik elmi sahəsində M.Şirəliyevin dialektoloji məktəbini,
M.Hüseynzadənin müasir dil məktəbini, Ə.Dəmirçizadənin dil tarixi və üslu-
biyyat məktəbini və s. göstərmək olar. Azərbaycan dilçiliyinin inkişafında
əvəzsiz xidmətləri olan bu alimlər dilçiliyin müxtəlif tərəfləri ilə bağlı müx-
təlif konsepsiyalar irəli sürdülər. Bu məktəblərin davamçıları isə onların
əsasında gələcək tədqiqatların aparılması istiqamətlərini müəyyənləşdirdilər.
Elmi məktəblərdə ideyaların və fəaliyyətin ənənələrin hesabına təmin
olunması heç də təsadüfi deyil. Çünki “ənənələr elmin bütün sahələrini əhatə
etdiyindən, onlardan kənar hər hansı novatorluq və yaradıcılıq ola bilməz” (16,
37). Daha geniş mənada götürsək, elmi ənənələr əsasında formalaşan sosio-
mədəni münasibətlər elmi fəaliyyət istiqamətlərinin müəyyənləşməsində mü-
hüm rol oynayır.
ƏDƏBİYYAT
1.
Лешкевич Т.Г. Философия науки: традиции и новации. М.: ПРИОР, 2001, 428 с.
2.
Наука в эпоху перемен (тема этоса) // Философия науки. М., 2005, вып. 11, с. 5-10.
3.
Микешина Л.А. Эпистемологическое оправдание гипостазирования и реификации
Вопросы философии, М., 2010, №12, с. 44 -54.
4.
Чешков М.Л. Дореволюционная Россия и Советский Союз: анализ преемственности
и разрыва // Общественные науки и современность. М., 1997, №1, с. 92 – 104
5.
Mehdiyev R.Ə. İctimai və humanitar elmlər: zaman kontekstində baxış. Bakı: Xalq qəzeti,
2009, 9 dekabr,
6.
Павлов К.А. Каким может быть понимание философии сегодня // VOX Философ-
ский журнал. М., 2010, №8.
http://vox-journal.org/html/issues/vox8/112
7.
Гуссерль Э. Логические исследования. Философия как строгая наука. М.: ACT,
2000, 752 с.
8.
Стёпин В.С. Философия, культура, личность философа //Драма советской филосо-
фии (Книга – диалог). М., 1997, 239 с.
http://iph.ras.ru/uplfile/root/biblio/1997/Drama.pdf
9.
Ушаков Е.В. Введение в философию и методологию науки. М.: Экзамен, 2005, 528 с.
10.
Землянухина С.Г. Инновационность и преемственность в развитии экономической
науки // Журн. Инновационная деятельность. 2007, №1, с. 19-35.
11.
Лебедев С.А. Уровни научного знания // Журн. Вопросы философии, 2010, №1, с. 62 -75.
90
12.
Ивин А.А. Современная аксиология: некоторые актуальные проблемы // Философ-
ский журнал. М., 2010, №1. iph.ras.ru/page27846343.htm
13.
Шохин В.К. Философия ценностей и ранняя аксиологическая мысль. М.: РУДН,
2006, 457 с.
14.
Шульга Е.Н.Природа научного познания и критерии рациональности // Философия
науки. М., 2004, в. 10, с. 151 – 170
15.
Гайденко П.П. Научная рациональность и философский разум. М.: Прогресс-Тра-
диция, 2003, 528 с.
16.
Грезнева О.Ю. Научные школы. М.: РАО, 2003, 69 с.
ПРИНЦИП ПРЕЕМСТВЕННОСТИ В РАЗВИТИИ НАУКИ
В.С.САЛИМОВ
РЕЗЮМЕ
В статье исследуется принцип преемственности в развитии науки, его особеннос-
ти и формы проявления. Анализируется влияние связи традиционных и инновационных
диалектических отношений на деятельность научных субъектов (ученые, научные шко-
лы, научные направления и т.д.). Указывается, что нарушение принципа преемствен-
ности в развитии науки приводит к срыву связи между научными традициями и опы-
том. Этот вопрос рассматривается на примере гуманитарных наук во время бывшего
Советского союза. Указываются причины, способствующие влиянию философии на
научное развитие, которые приводят к большим изменениям. В процессе дифференциа-
ции и интеграции наук, на эмпирическом, теоретическом и метатеоретическом уровнях
научных знаний анализируется место и роль принципа преемственности.
Ключевые слова: принцип приемственности, традиции, инновации, научные
знания, научные познание, научные субьекты
INHERITANCE PRINCIPLE IN THE DEVELOPMENT OF SCIENCE
V.S. SALIMOV
SUMMARY
The article investigates the inheritance principle in the development of science, its
features and manifestation forms. The author analyzes the influence of dialectic relations of
customs and innovations on scientific subjects (scientists, scientific schools, scientific
directions etc.) and notes that disorder of the inheritance principle in development of science
causes disintegration of the communication between scientific traditions and experiences. This
problem is explained on the samples of humanitarian sciences during the post-Soviet period.
The causes conditioning the infunce of Philosophy on scientific development, which lead to
great changes are analyzed.
In the process of differentiation and integration of sciences, the position and the role of
interitance are investigated from empiric, theoretical and metatheoretical aspects of scientific
knowledge.
Key words: inheritance principle, traditions, innovations, scientific knowledge, scienti-
fic subjects.
Dostları ilə paylaş: |