İqlim və energetika sahəsində milli siyasətin



Yüklə 39,88 Kb.
tarix21.04.2018
ölçüsü39,88 Kb.
#39864

İqlim və energetika sahəsində milli siyasətin həyata keçirilməsi

və inkişafında ictimaiyyətin iştirakı

İradə Yaqubova,

«ELS» Müstəqil Araşdırmalar Mərkəzi

XX əsrin ikinci yarısından ən çox müzakirə olunan problemlərdən biri olan qlobal istiləşmə artıq öz fəsadları ilə bəşəriyyəti yeni iqlim şəraitinə uyğunlaşmaq məcburiyyətində qoyub. Alimlər tərəfindən işlənilən iqlim dəyişmələrinin bəzi modelləri 2100-cü il üçün havanın dünya üzrə orta temperaturu 1,4-5,80C arta biləcəyini göstərir. Mütəxəssislərin pronozlarına əsasən Qrenlandiya buzlaqlarının əriməsi dəniz səviyyəsinin 7 metr artmasına gətirə bilər. Hələlik isə özünü, həm də buzlaqların əriməsində büruzə verən qlobal istiləşmə su hövzələrinin səviyyəsinin xeyli artmasına və nəticədə sahilyanı torpaqların su ilə basılması, içməli suyun azalması və s. kimi böyük təhlükələr yaratmaqdadır. İqlim dəyişmələri nəticəsində quraqlıq və yaxud əksinə yağıntıların artması səbəbindən daşqınlar və sellər, sayı çoxalan güclü qasırğalar və bu kimi baş verən digər iqlim anomaliyaları insanların ənənəvi həyat tərzinə, sağlamlıqlarına əhəmiyyətli dərəcədə təsir göstərməkdədir. Energetik, sənaye və humanitar böhranlarla müşaiyət olunan iqlim dəyişmələri ölkələrin ekoloji təhlükəsizliyini sual altına qoyurlar.

Qlobal təhlükəni nəzərə alaraq 1992-ci ilin iyun ayında Rio-de-Janeyroda 150 ölkə İqlim dəyişməsinə aid BMT-nin Çərçivə Konvensiyasına imza atmışlar. Səyləri davam etdirərək 1997-ci ilin dekabr ayında Kiotoda inkişaf etmiş və keçid iqtisadiyyatlı ölkələri istixana qazlarının atılmasını 1990-cı il ilə müqayisədə 2008-2012-ci illərdə ən azı 5% azaltmağı (Protokolun 3.1 maddəsi) təklif edən BMT-nin iqlim dəyişməsinə aid Çərçivə Konvensiyasına əlavə beynəlxalq sənəd - Kioto Protokolu, qəbul edilmişdir. 2009-cu ilin mart ayının 26-na olan vəziyyətə görə Protokol 181 ölkə tərəfindən ratifikasiya edilmişdir.

Azərbaycan digər sahələrdə də olduğu kimi dünyada gedən proseslərdən kənarda qalmamış və 1992-ci ilin iyun ayında qeyd olunan Çərçivə Konvensiyasına qoşulmuşdur, 1995-ci ildə isə onu ratifikasiya edərək Konvensiyanın Tərəfdaşı olmuşdur. 1997-ci ilin aprelində ölkə Prezidentinin Sərəncamı ilə iqlim dəyişməsi üzrə Dövlət komissiyası yaradılmışdır. Ölkəmiz 2000-ci ildə Kioto Protokoluna qoşulmuşdur və hazırda bu sənədin mövcud üç mexanizmindən birində-Təmiz İnkişaf Mexanizmində fəal iştirak edir. Konvensiyadan irəli gələn öhdəlik və vəzifələrin yerinə yetirilməsi ilə əlaqədar Qlobal Ekologiya Fondu (QEF) və BMT-nin İnkişaf Proqramının maliyyə yardımı ilə “Azərbaycan Respublikasının Birinci Milli Məlumatları” hazırlanmış və Konvensiyanın Katibliyinə təqdim edilmişdir. “Birinci Milli Məlumatlar” layihəsinin birinci fazasında iqlim dəyişmələrinin təsirinin minimuma endirilməsi üçün müvafiq tədbirlər planı hazırlanmış, ikinci fazada isə iqtisadiyyatın prioritet sahələrində istilik effekti yaradan qaz tullantılarının azaldılması üçün ekoloji cəhətdən təmiz texnologiyalara dair tələbatlar qiymətləndirilmiş və həmin texnologiyaların tətbiqinə dair təkliflər hazırlanmışdır. Hazırda “Azərbaycan Respublikasının İkinci Milli Məlumatları” hazırlanır. Bu mərhələdə əsas diqqət insan sağlamlığı, ekosistemlərə təsir, təmiz inkişaf mexanizmi üzrə layihələrin seçilməsinə yönəldilməkdədir.

Qeyd etməliyik ki, bəzi ölkələrdən fərqli olaraq ekoloji duruma və iqlim dəyişməsinə həmçinin ölkəmizin rəhbərliyi tərəfindən ciddi diqqət yetirilir (bu günədək Azərbaycan Respublikası ətraf mühitin mühafizəsi sahəsində 15 beynəlxalq Konvensiyanı ratifikasiya etmişdir) və yaranan problemlərin aradan qaldırılması məqsədilə bir sıra müvafiq sənədlər qəbul edilib. Burada ilk növbədə Azərbaycan Respublikası Prezidentinin Sərəncamları ilə təsdiq edilmiş və həyata keçirilən bir sıra kompleks tədbirlər proqramlarını göstərmək olar. Bu «Azərbaycan Respublikasında ekoloji cəhətdən dayanıqlı sosial-iqtisadi inkişafa dair Milli Proqram»ı və «Azərbaycan Respublikasında meşələrin bərpa edilməsi, artırılmasına dair Milli Proqram»ı (sənədin ikisi də 18 fevral 2003-cü il tarixli 1152 saylı Sərəncamla təsdiq edilmişdir), «Azərbaycan Respublikasında yanacaq-energetika kompleksinin inkişafına dair Dövlət Proqramı (2005-2015-ci illər)» (14 fevral 2005-ci il tarixli 635 saylı Sərəncam), «Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı» (28 sentyabr 2006-cı il tarixli 1697 saylı Sərəncam) sənədlərdir ki, burada mövcud ekoloji problemlərin həllinə yönəldilmiş tədbirlər və bu tədbirlərin həyata keçirilməsinə cavabdeh olan qurumlar konkret olaraq göstərilmişdir. Bu Proqramlarda iqlim dəyişməsi probleminə də yer ayrılmış, cavabdeh qurum kimi Ekologiya və Təbii Sərvətlər Nazirliyi, Sənaye və Energetika Nazirliyi, Nəqliyyat Nazirliyi, Daxili İşlər Nazirliyi və digər rəsmi strukturlar göstərilmişdir. Tədbirlər siyahısında ekoloji vəziyyətə antropogen təsiri azaltmaq məqsədilə istifadə olunan texnologiyaların təkmilləşdirilməsi və yüksək effektivli və az enerjitutumlu texnologiyaların tətbiqi və digərləri nəzərdə tutulmuşdur. Qlobal ekoloji problemlərə dair bölmədə isə tədbirlər arasında iqlim dəyişmələrinin əhalinin sağlamlığına, ətraf mühitə təsirinin qiymətləndirilməsi və müvafiq adaptasiya tədbirlərinin işlənib hazırlanması da göstərilmişdir (1152 saylı Sərəncam, bölmə 37).

Beləliklə, iqlim dəyişməsinin təsirinin azaldılması istiqamətində tələb olunan rəsmi tədbirlər müvafiq dövlət qurumları tərəfindən həyata keçirilir. Şübhəsiz məhz bu sahədə mövcud qərarların həyata keçirilməsində ictimaiyyətin rolu, enerji resurslarının qənaətli istifadəsinə dair əhalinin məlumatlandırılması və maarifləndirilməsi mühüm rol oynayır. Bu məsələnin həllinə nazirliklərin qeyri-hökumət təşkilatlarını cəlb etmələri, onlarla birgə əməkdaşlıq qurmaları yaxşı nəticələrin əldə etməsinə köməklik göstərir.

Bu sırada ilk növbədə Ekologiya və Təbii Sərvətlər Nazirliyini (ETSN) göstərmək olar ki, ekologiya sahəsində fəaliyyət göstərən qeyri-hökumət təşkilatları ilə müxtəlif formalarda iş birliyini qurmuşdur. Bu təşkilatların bir qisminin siyahısı nazirliyin saytındakı ekoloji təbliğat səhifəsində ictimaiyyətlə əlaqələr bölməsində yerləşdirilmişdir. Müntəzəm olaraq QHT-lər nazirliyə dəvət olunaraq ölkə üçün vacib olan sənədlərin layihələrin ictimai müzakirələrini keçirir, nazirlərlə görüşürlər. QHT nümayəndələri nazirliyin həyata keçirdiyi layihələrdə və müxtəlif məsələlər üzrə təşkil olunmuş işçi qruplarda iştirak edirlər. Belə ki, BMT-nin İnkişaf Proqramı çərçivəsində həyata keçirilən «Azərbaycanda Təmiz İnkişaf Mexanizmi Potensialının Gücləndirilməsi» layihəsinin əlaqələndiricisi «Ekoyl» Elmi-Ekoloji İctimai Birliyinin rəhbəri Müslüm Qurbanovdur. “Azərbaycan Respublikasının BMT Konvensiyası çərçivəsində qlobal iqlim dəyişməsinə dair İkinci Milli Məlumatı” layihəsi çərçivəsində "EkoSfera" Sosial-Ekoloji Mərkəzi (rəhbər Firüzə Sultan-zadə) Bakının orta və ali məktəblərində iqlim dəyişməsi probleminə həsr olunmuş Dəyirmi Masalar və treninqlər, səyyar aksiyalar keçirmişdir, BDU magistraturasının tədris proqramına müvafiq mövzunun əlavə edilməsinə nail olmuşdur.

Digər qeyri-hökumət təşkilatları ilə sıx əməkdaşlıq quran Azərbaycan Respublikasının Dövlət Neft Şirkətinin Ekologiya İdarəsidir (ARDNŞ Eİ). QHT-lər müxtəlif layihələrin icrasına cəlb edilir. Məsələn, «Abşeron yarımadasında neftlə çirklənmiş ərazilərin irimiqyaslı xəritəsinin tərtibi» layihəsində ARDNŞ «Beynəlxalq Ekoenergetika Akademiyası» QHT-ni (rəhbər Fəqan Əliyev) iştirak etmişdir. 2008-ci ildə «Neftlə çirklənmiş torpaqların yuyulması» layihəsinin ictimai dinləmələri keçirilmişdir. 2008-ci ilin noyabrın 3-4 tarixində ARDNŞ-nin Ekologiya İdarəsinin təşkilatçılığı ilə “Çirklənmiş torpaqların bərpası - təklif olunan üsullar” mövzusunda keçirilmiş konfransda qeyri-hökumət təşkilatları fəal iştirak etmişlər. "EkoSfera" Sosial-Ekoloji Mərkəzi ARDNŞ Eİ və Dünya Bankının dəstəyi ilə 2008-ci ildə «Bax, mən burada yaşayıram! (neftlə qonşuluqda)» layihəsini həyata keçirmişdir. Layihə çərçivəsində Bakının orta məktəblərində maarifləndirici treninqlər keçirilmişdir. ARDNŞ və «Azersun-Holding» kampaniyalar qrupunun dəstəyi ilə AME-nın Zoologiya İnstitutu və «Ekostil-Azərbaycan» qeyri-hökumət təşkilatı (rəhbəri Elman Yusifov) 2008-ci ildə Babadağa qalxaraq ölkəmizin yüksək dağlıq ekosistemlərinin bioloji təhlükəsizliyi və buzlaqların vəziyyətinin monitorinqini həyata keçiriblər.

İqlim dəyişməsinə təsir göstərən tullantıların mənbələrindən biri nəqliyyat olduğundan Dövlət Proqramında nəzərdə tutulan tədbirlərin icraçıları sırasında Daxili İşlər Nazirliyi də göstərilmişdir. Bu nazirliyin Baş Dövlət Yol Polisi idarəsi fəaliyyətində qeyri-hökumət təşkilatların imkanlarını düzgün qiymətləndirərək onlarla səmərəli əməkdaşlıq qurublar. QHT-lər ilk növbədə əhali arasında maarifləndirmə işini quraraq Dövlət Yol Polisinin əhatə dairəsini dəfələrlə çoxaltmışlar. Məsələn, «ELS» Müstəqil Araşdırmalar Mərkəzinin 2006-2008-ci illərdə «Bakı şəhərinin yol infrastrukturunun təşkilinin monitorinqi» layihəsi çərçivəsində monitorinqdən əlavə 2 İnternet-forum, 6 Dəyirmi Masa, 4000 nəfəri əhatə edən 8 rəy sorğusu, Bakı şəhərinin orta məktəblərində Dövlət Yol Polisinin əməkdaşlarının iştirakı ilə 14 görüş, debatlar, açıq dərslər, radio və televiziya verilişlərində çıxışları və digər tədbirlər yol infrastrukturunun düzgün təşkili, istismarı və atmosferin çirklənməsinin qarşısının alınması sahəsində xeyli sayda əhali maarifləndirilib. Bundan başqa Dövlət Yol Polisi ilə birgə əməkdaşlıq göstərən bir sıra QHT göstərmək olar: «Gülüm» Uşaq Ekoloji Təşkilatı (İradə Quliyeva), «Gənc liderlər» Uşaq təşkilatı (rəhbər Fərid Şahbazi), «Təhlükəsiz yol əhalinin maarifləndirilməsi» İctimai Birliyi (rəhbər Aydın Xudiyev) və digərləri.

Təəssüflə bildirməliyəm ki, digər nazirliklərin QHT-lərlə iş birliyinin qurulması barədə mümkün olan yollarla məlumat əldə etmək olmadı.

Beləliklə, üç rəsmi strukturun timsalında ictimaiyyətlə uğurlu əməkdaşlığın qurulması hallarını izləyə bilərik. Lakin qlobal istiləşmə və dəyişən iqlim şəraitinə uyğunlaşma probleminin effektiv həlli üçün ayrı-ayrı uğurlu layihələr yox, məqsədyönlü fəaliyyət təşkil edilməlidir. Bunun üçün ilk növbədə enerji resurslarının qənaətli istifadəsinə dair məlumatlandırıcı, maarifləndirici və təşkilatı tədbirlərdən ibarət kompleks plan tərtib edilməlidir. Hər bir insanın yaşadığı müddətdə enerji istehlakçısı kimi çıxış edərək məhsul və xidmətlərdən istifadə etməsi nəticəsində istixana qazlarının tullanmasına səbəb olması, buna görə də hər birimizin həyat tərzinin iqlim dəyişməsi problemilə mübarizədə vacib olması tam, aydın və hər bir sadə insana aydın şəkildə açıqlanmalıdır. Dövlət səviyyəsində qəbul edilən və həyata keçirilən bütün qərarların müsbət nəticələr verməsi üçün cəmiyyətdə iqlim dəyişməsi probleminin həllinin ilk növbədə enerji resurslarından qənaətli istifadəsi məsələsi ilə bağlı olduğu aşılanmalıdır. Bunun ekoloji duruma təsiri, maliyyə cəhətdən əlverişliyi, gələcək nəsillərin təhlükəsiz və firavan yaşayış şəraitinin yaradılması üçün əhəmiyyəti hər bir vətəndaşa çatdırılmalıdır. Ona görə də, məlumatlandırma və maarifləndirmə tədbirlərinin həyata keçirilməsi zamanı bu sahədə bacarıqlara malik qeyri-hökumət təşkilatlarla sıx əməkdaşlıq qurulmalı və onların təcrübəsindən istifadə edilməlidir. Məhz belə halda maarifləndirmə kampaniyasında ictimaiyyətin geniş iştirakını təmin etmək olar.

Əldə edilən nəticələrin daha da əhəmiyyətli olması üçün maarifləndirmə işi ilə bərabər enerji resurslarının qənaətli istifadəsinə xidmət edən tədbirlər həyata keçirilməlidir. Məsələn, xaricdə suyun qənaətli istifadəsinə çağırış geniş reklam edilən suyun sərfini dəfələrlə azaldan su kranlarına püskürdücü taxmaların satışı və uğurlu tətbiqi ilə müşaiyət olunur. Bu taxmaların Azərbaycanda istehsalını təşkil etmək və geniş reklam edərək tətbiqi suyun qənaəti sahəsində müsbət nəticələrin əldə edilməsinə kömək edər.

Başqa bir misal. Hazırda məişət tullantıların əsas və ayrılmaz hissəsini təşkil edən polietilen paketlərin problemi göz önündədir. Bu problemin həlli üçün bir tərəfdən paketlərin pulsuz verilməsini qadağan etməklə zibilliyə atılan sayının azaldılması, digər tərəfdən isə polietilenin emalı üçün mövcud texnologiyaları tətbiq edərək kiçik emal müəssisələrinin təşkili və onların fəaliyyəti üçün əlverişli şəraitin yaradılması ətraf mühitə vurulan zərərin azaldılmasına xidmət edər.

Daha bir misal. Elektrik enerjisinin qənaətli istifadəsi çağırışları əhalinin nəzərində yalnız lazım olmayan lampaların söndürülməsi kimi başa düşülür. Lakin burada həm də texnoloji vasitələr var ki, onların tətbiqi həm energetik təhlükəsizliyini, həm də maliyyə cəhətdən sərfəli olaraq problemin effektiv həllinə xidmət edir. Məsələn, ABŞ, Kanada, Yaponiya, Yeni Zellandiyanın artıq üzləşdiyi yelpikvari açılmaların mütəxəssislərin rəyinə görə dünyanın digər ölkələrində də təkrarlanması ehtimalı var, çünki elektrik enerjisinə artan tələbatı ödəmək getdikcə çətinləşir. Buna görə də bir çox ölkələrdə hazırda elektrik enerjisinin istehlakının sutka ərzində bərabər paylanmasını təmin etmək məqsədilə müxtəlif üsullardan istifadə edirlər. Məsələn, pik saatlarda elektrik enerjisi daha baha qiymətə satılır. Bu məqsədlə iki-üç tarifli sayğaclardan istifadə edilir. Fikrimcə, artıq ölkəmizə də, xüsusən də Bakıda belə sayğacların istifadəsi elektrik xətlərinin yüklənməsi qrafikini optimallaşdırmağa imkan yaradar.

Bundan başqa 2009-cu ilin sentyabr ayından Avropada 100 Vt-lıq közərmə lampalarından, 2010-cu ildən - 75 Vt-lıq, 2011-ci ildən - 60 Vt-lıq, 2012-ci ildən isə 40 və 25 Vt-lıq lampaların istifadəsini qadağan olunacaq. Bu qərar Avropa iqtisadiyyatının enerji səmərəliyinin 2020-ci il üçün 20% artırılması məqsədilə Avropa Şurası tərəfindən qəbul edilib. Közərmə lampaları əvəz edən enerji qənaətli lampalar artıq Azərbaycanda satılır, son vaxtlar televiziya ilə geniş reklam edilir və mağazalardan əldə etdiyimiz məlumatlara əsasən bu lampaların satışı artıb. Lakin yuxarıda qeyd edilən Avropada gedən prosesləri və közərmə lampasına nisbətən yeni lampaların 5 dəfə baha olmasını nəzərə alsaq, qısa müddətdə yeniliyin geniş tətbiqi üçün məlumatlandırma və maarifləndirmə fəaliyyətini intensivləşdirmək və genişləndrimək lazımdır.

Dünyada iqlim dəyişməsi probleminin həllini ilk növbədə enerji resurslarının qənaətli istifadəsini görərək ictimaiyyəti bu problemin həllinə cəlb etmək məqsədilə 2007-ci ildən «Yer Kürəsinin saatı» adlanan işıqların 1 saatlıq söndürülməsi qlobal aksiyası keçirilir. 2009-cu ilin martın 28-də bu aksiyada artıq 88 ölkənin 4000 şəhərinin sakinləri iştirak etmişlər. Əlbəttə, işığın bir saatlıq söndürülməsi ekoloji vəziyyəti əhəmiyyətli dərəcədə dəyişdirə bilməz, lakin qlobal istiləşmə probleminin gündəmə gətirilməsi, elektrik enerjisinin qənaətinin yaşadığımız planetin atmosferinə zərərli tullantıların miqdarının azaldılmasına birbaşa təsiri barədə məlumatın əhaliyə çatdırılmasının böyük rolu ola bilər. Ölkəmizin bu aksiyaya 2010-cu ildə qoşulması və aksiya ərəfəsində geniş maarifləndirmə kampaniyasının keçirilməsi səmərəli olardı.

Yuxarıda qeyd edilənlər həyati məsələ olan qlobal iqlim dəyişməsi və enerji resurslarından qənaətli istifadə probleminin həllində tətbiq edilənlərin bir qismidir. Belə çoxhəcmli və geniş miqyaslı işi reallaşdırmaq üçün dövlət səviyyəsində əhalinin enerji resurslarından qənaətli istifadəsi sahəsində maarifləndirilməsi, bunun üçün tələb olunan texnoloji tədbirlərin görülməsini nəzərdə tutan «Enerji resurslarından qənaətli istifadə» Milli Planı hazırlanıb qəbul edilməsi məqsədəuyğun olardı. Belə Planın həyata keçirilməsinə QHT-lər cəlb edilsə, ictimai sektorun maarifləndirmə işində təcrübəsi və bacarığı nəzərdə tutulan tədbirlərin daha da uğurlu nəticələr əldə etməsinə kömək edər.

Bundan başqa iqlim dəyişməsinin nisbətən qısa bir müddətdə baş verdiyi vaxtda hər bir insanın həyat tərzi və atdığı addımların ümumilikdə bütün cəmiyyətin ekoloji durumuna təsir etməsini dərk edərək bu məsələdə ictimaiyyətin imkanlarından istifadə etmək, ictimai nəzarət mexanizmini işləyib tətbiq etmək, dövlətin qlobal istiləşmə və iqlim dəyişməsi sahəsində siyasətinin həyata keçirilməsinə dəstək olardı.



Beləliklə, yuxarıda qeyd edilən beynəlxalq, dövlət və ictimai strukturların birgə əməkdaşlığının müsbət təcrübəsini nəzərə alsaq, deyə bilərik ki, iqlim dəyişməsi probleminin həllində ictimaiyyətin iştirakının dərinləşməsi və genişlənməsi davam etdirilməsə, müsbət nəticələrin əldə edilməsi mümkünsüzdür. Dövlət səviyyəsində qəbul edilmiş qərarların uğurla reallaşmasının qarantı ilk növbədə ictimaiyyət tərəfindən dəstəklənməsidir. Bu səbəbdən ictimaiyyətin iştirakı daimi xarakter daşımalı, fəaliyyət planının tərtib edilməsi mərhələsindən başlamalı və planın həyata keçirilməsinin bütün mərhələlərində davam etməlidir.
Yüklə 39,88 Kb.

Dostları ilə paylaş:




Verilənlər bazası müəlliflik hüququ ilə müdafiə olunur ©www.genderi.org 2024
rəhbərliyinə müraciət

    Ana səhifə