Gözəl ana, vəfalı ömür-gün yoldaşı, in-
tellektual keyfiyyətləri özündə birləşdirən
ziyalı, dünya tibb elminə əvəzolunmaz
töhfələr vermiş böyük oftalmoloq alim
Zərifə xanım Əliyevanın həyatı, elmi və
yaradıcılıq fəaliyyəti ilə daha yaxından ta-
nış olduqca, haqqında xatirələri oxuduqca
yaddaşımızda Ulu Tanrının bu ən yüksək
mənəvi xüsusiyyətləri bəxş etdiyi böyük
insanın obrazı canlanır, gözlərimiz önündə
onun portreti yaranır.
Zərifə xanım Əliyeva elə insan idi ki, bir
dəfə ünsiyyətdə olanlar onu ömrü boyu
unuda bilmirdilər. Bu böyük şəxsiyyət elə
ilk andan onunla ünsiyyətdə olanların yad-
daşında yüksək vətəndaşlıq, humanizm və
ürək saflığının mücəssəməsi kimi əbədi qa-
lırdı. Onun insanlara məhəbbəti qeyri-adi
dərəcədə hüdudsuz idi. Zərifə xanım sevib
seçdiyi, ömrünü həsr etdiyi sənəti ilə bu is-
tedadını tam gerçəkləşdirə bilirdi.
Aprelin 28-də XX əsr Azərbaycan ta-
rixinin görkəmli simalarından biri Zərifə
xanım Əliyevanın anadan olmasının 92-ci
ildönümü tamam olur. Zərifə xanım 1923-
cü il aprelin 28-də qədim Naxçıvanın Şah-
taxtı kəndində görkəmli ictimai və dövlət
xadimi, xalqımızın böyük oğlu Əziz Əliyevin
ailəsində dünyaya göz açmışdır. 1947-ci
ildə N. Nərimanov adına Azərbaycan Dövlət
Tibb İnstitutunu bitirmişdir. Azərbaycan
Elmi-Tədqiqat Oftalmologiya İnstitutunda
elmi işçi, 1969-cu ildən isə Ə.Əliyev adına
Azərbaycan Həkimləri Təkmilləşdirmə İns-
titutunda göz xəstəlikləri kafedrasının do-
senti, professor, görmə orqanlarının peşə
patologiyası laboratoriyasının müdiri, oftal-
mologiya kafedrasının müdiri (1982-1985)
vəzifələrində çalışmışdır.
Z. Əliyevanın Azərbaycanda oftalmolo-
giya elminin inkişafında müstəsna xidmətləri
vardır. O, vaxtilə Azərbaycanda geniş ya-
yılmış traxomanın, dünya təcrübəsində
birincilər sırasında peşə, xüsusilə kimya
və elektron sənayelərində peşə fəaliyyəti
ilə bağlı göz xəstəliklərinin öyrənilməsi,
profilaktikası və müalicəsinə, habelə of-
talmologiyanın müasir problemlərinə dair
bir çox sanballı tədqiqatların, o cümlədən
"Terapevtik oftalmologiya", "İridodiaqnos-
tikanın əsasları" kimi nadir elmi əsərlərin
müəlliflərindən biri, 12 monoqrafiya,
dərslik və dərs vəsaitinin, 150-yə yaxın elmi
işin, 1 ixtira və 12 səmərələşdirici təklifin
müəllifidir. Z.Əliyeva yüksək ixtisaslı səhiyyə
kadrlarının hazırlanmasına da böyük əmək
sərf etmişdir.
Akademik Zərifə Əliyevanın alim kimi
qazandığı böyük uğurlar Azərbaycan tibb
elminin tarixində ayrıca bir mərhələ təşkil
edir. Onun elmi fəaliyyəti çox zəngin və
əhatəli olub. İstedadlı alim kimi oftalmo-
logiyanın aktual mövzularına həsr edilmiş
çoxprofilli tədqiqatlar aparıb və dəyərli
elmi-tədqiqat işləri yazıb.
Müxtəlif göz xəstəliklərinin müalicə və
profilaktika tədbirlərinin işlənib hazırlan-
ması ilə məşğul olan Zərifə xanım özünün
tədqiqat işlərini traxomanın müalicəsi ilə
bağlı məsələlərə, habelə traxomanın və
onun ağır nəticələrinin müalicəsi zamanı o
dövrdə yeni olan antibiotiklərin imkanların-
dan səmərəli istifadə etməyin öyrənilməsinə
həsr edib.
Bu tədqiqatların nəticələri Zərifə xanım
Əliyevanın 1960-cı ildə “Sintomisin terapiya
metodlarının başqa birləşmələri traxomanın
müalicəsi” mövzusunda müvəffəqiyyətlə
müdafiə etdiyi namizədlik dissertasiyasının
əsasını təşkil edib.
1968-ci ildən başlayaraq Zərifə xa-
nım Əliyeva professional oftalmologiya-
nın problemləri ilə ciddi məşğul olub. Bu
sahənin əhatə dairəsinin çox geniş olma-
sına baxmayaraq, gözün peşə xəstəlikləri
probleminə dərin və çoxsahəli marağını
Zərifə xanım Əliyeva bütün həyatı boyu
itirməmişdir. Alim dünyada ilk dəfə ola-
raq peşə patalogiyasını araşdıran elmi-
tədqiqat laboratoriyası yaratmış və prakti-
ki olaraq elm aləmində yeni bir istiqamətin
- peşə oftalmologiyasının əsasını qoymuş-
dur. Apardığı tədqiqatların gedişində “Göz
yaşının axmasının fiziologiyası”, “Gözün
və görmə sinir yolunun yaşla əlaqədar
dəyişiklikləri”, “Gözün hidrodinamik siste-
minin anatomik fizioloji təbiəti” və s. kimi
onlarla elmi məqalə və monoqrafiyalar çap
etdirmişdir.
Uzunmüddətli
müşahidələrin
və
tədqiqatların nəticələri görkəmli həkimin
“Azərbaycanın kimya sənayesinin bəzi
müəssisələrinin işçilərinin görmə üzvünün
vəziyyəti” mövzusunda doktorluq disser-
tasiyasının əsasını təşkil edib. 1976-cı ildə
Q. Helmqolts adına Moskva Göz Xəstəlikləri
İnstitutunda
həmin
dissertasiyanın
müdafiəsi zamanı Sovet İttifaqının aparıcı
alimləri Zərifə xanımın elmi əsərlərini çox
yüksək qiymətləndiriblər.
Zərifə xanım Əliyevaya 1977-ci ildə tibb
elmləri doktoru elmi dərəcəsi adı verilib.
Görmə orqanının peşə patologiyası
sahəsində apardığı elmi tədqiqat işlərinin
uğurlu nəticələrinə görə akademik Zərifə
Əliyeva keçmiş SSRİ-nin oftalmologiya
sahəsində ən mötəbər mükafatı olan SSRİ
Tibb Elmləri Akademiyasının M.İ.Averbax
adına mükafatına layiq görülüb. Keçmiş
SSRİ-də bu mükafatı alan ilk qadın alim kimi
onun adı oftalmologiya elminin tarixinə dü-
şüb.
Akademik Zərifə Əliyeva həm də
görkəmli ictimai xadim idi. O, keçmiş
SSRİ Sülhü Müdafiə Komitəsinin üzvü,
Azərbaycan Sülhü Müdafiə Komitəsi
sədrinin müavini, Ümumittifaq “Bilik”
Cəmiyyəti İdarə Heyətinin, Ümumittifaq
Oftalmoloqlar Elmi Cəmiyyəti Rəyasət
Heyətinin üzvü olmuş, “Əməkdar Elm Xa-
dimi” fəxri adına layiq görülmüşdür.
Zərifə xanım Əliyeva 1985-ci il aprelin
15-də Moskva şəhərində vəfat edib. Zərifə
xanımın cənazəsi 1994-cü ildə Moskvanın
Novo-Deviçye qəbiristanlığından Bakıya
gətirilərək, Fəxri Xiyabanda, atasının qəbri
yanında dəfn olunmuşdur. Fəxri xiyabanda
məzarı üstündə tuncdan heykəli ucaldılmış-
dır. Bu gün Bakıda Göz xəstəlikləri İnstitutu,
Naxçıvan şəhər poliklinikası onun adını daşı-
yır. Bakının Binəqədi rayonu ərazisində adına
istirahət parkı salınmışdır. Bakı və Naxçıvan-
da Zərifə Əliyevanın adını daşıyan küçə var.
O, həkimlər professor Tamerlan Əliyev,
Akademik Cəmil Əliyev və Əməkdar
incəsənət xadimi, musiqiçi Gülarə Əliyevanın
bacısıdır. Azərbaycanın görkəmli dövlət xa-
dimi Əziz Əliyevin qızı, Ümumilli Liderimiz
Heydər Əliyevin həyat yoldaşı, hazırkı Prezi-
dentimiz cənab İlham Əliyevin anasıdır.
Zərifə xanımın işıqlı obrazı yüksək
vətənpərvərlik və humanizm rəmzi kimi
həmişə bizimlə qalacaq, onun parlaq
xatirəsi daim anılacaq, qədirbilən xalqımızın
qəlbində əbədi yaşayacaq.
“Mərkəzi Klinika” Ambulatoriyası
Ünvan: Zərifə Əliyeva küç. 5, Az1005
“Mərkəzi Klinika” Xəstəxanası
Ünvan: Parlament pr. 76, Az1006
MƏRKƏZİ KLİNİKA
“Müasir səhiyyə elmi əsaslarla dünyada əldə edilmiş təcrübə əsasında və bir də səhiyyə
sahəsində elmi-texniki tərəqqinin, bu istiqamətdə dünyada yaranmış imkanlar əsasında qurulur”
Heydər Əliyev
BÜLLETEN-6 | APREL 2015
“Azərbaycanda keyfiyyətli, səviyyəli tibbi xidmətin
göstərilməsi üçün bütün imkanlar var!”
İlham Əliyev
Tel: +994 12 492 10 92 | Call center: +994 12 105 | Fax: +994 12 492 41 31 | info@merkeziklinika.az www.merkeziklinika.az www.facebook.com/MerkeziKlinika twitter.com/MerkeziKlinika
ZƏRİFƏ ƏZİZ QIZI ƏLİYEVA
Azərbaycan səhiyyəsinin tarixi
Artıq yaz fəslinin küləkli günlərini yaşayırıq. Bu isə o
deməkdir ki, hava-damcı yolu ilə yayılan xəstəliklər art-
maqdadır. Bu xəstəliklərdən biri də uşaqlıq dövründə
daha çox rast gəlinən suçiçəyi xəstəliyidir. Suçiçəyi
xəstəliyi daha çox 5-10 yaşlı uşaqlar arasında yayı-
lan, qışın sonu və yazın əvvəllərində sıx müşahidə olu-
nan, çox yoluxucu, qızdırmalı, səpgilərin əmələ gəlməsi
ilə xarakterizə olunan kəskin virus mənşəli infeksion
xəstəlikdir. Mövsümi xarakter daşımasına səbəb virusun
günəşin ultrabənövşəyi şüalara davamsız olmasıdır.
Son statistik məlumatlara əsasən, Azərbaycanda 2012-
ci ilin ilk 3 ayı ərzində qeydə alınmış suçiçəyi xəstələrinin
sayı 3871 nəfər olub. 2010-cu ildə bu xəstəliyə yoluxan-
ların ümumi sayı 6963 nəfər idisə, 2011-ci ildə bu rəqəm
artaraq 10448 nəfər təşkil edib. Göründüyü kimi, bu
xəstəliyə yoluxanların sayı ildən-ilə artmaqdadır. Buna
görə də bəzi Avropa ölkələrində suçiçəyi xəstəliyinə qarşı
olan vaksin məcburi peyvənd təqviminə əlavə edilmişdir.
Suçiçəyi xəstəliyinin səbəbi nədir?
Suçiçəyinin törədicisi-Varicella zoster virusudur (VZV).
Bu virusa yalnız insanlar yoluxur və daşıyıcı olur. Virusun
həssas orqanizmlə ilkin təması zamanı özünü uşaqlarda
suçiçəyinin klinikası şəklində göstərir. Suçiçəyi xəstəliyi
keçirən uşaqlarda bu virus aktivləşərsə, kəmərləyici her-
pes xəstəliyi inkişaf edir.
Virus hansı yollarla yayılır?
Xəstəliyin yeganə mənbəyi insandır. Bu virus xəstə uşa-
ğın asqırması, öskürməsi ilə hava-damcı və səpgilərin
möhtəviyyatı ilə birbaşa kontakt yolla ötürülür. Virus hava
cərəyanı ilə ventilyasiya sistemindən bir mərtəbədən digər
mərtəbəyə ötürülür. Hamilə qadınlarda ciftdən dölə də keçir.
Xəstəlik nə zaman yoluxdurucu olur?
Xəstə ilk səpginin əmələ gəlməsindən 2-3 gün öncə
və bütün səpgilərin qabığa çevrilməsinə qədər yoluxucu-
dur. Keçirilmiş infeksiyadan sonra davamlı, ömürlük im-
munitet yaranır.
Xəstə uşaq ilə təmasdan 14-22 gün sonra ilkin
simptomlar əmələ gəlir. Bu əlamətlər qarın ağrısı, 37.5-
39C qızdırma, narahatlıq, iştahasızlıq, halsızlıq ilə özü-
nü biruzə verir. 24 saat sonra səpgi çəhrayı ləkə, sonra
qırmızı-çəhrayı qabarıq şəklində başlar, 1-2 saat sonra isə
yanmış dəri kimi - içərisində maye dolu möhtəviyyatlı
suluqcuqlar halını alır. Səpgilər ilk olaraq gövdədən baş-
layır, sonra baş və üzə yayılır, qollarda və ayaqlarda nadir
hallarda gorülür. Əlin içi və ayaqaltı səthdə səpgi olmur.
Suluqcuğun əmələ gəlməsindən sonra 24-48 saat içində
bu möhtəviyyat yoluxucu olur və çox zaman şəffaf, bəzən
qanlı və ya irinli də ola bilir. Bu suluqcuqlar çox qaşınan
və müxtəlif ölçüdə olur. Hər yeni səpgi elementi əmələ
gələndə temperatur arta bilər. Bütün səpgilər suluqcu-
ğa çevrilməyə bilər. Suluqcuqlar 3 sutka sonra qabığa
çevrilir. Qabıq dövrü yoluxucu deyil və sonrakı 5-10 gün
müddətə çapıq qoymadan keçir. Son çıxan səpgi qabıq-
lanana qədər - 7 gün ərzində yoluxucudur. Ağız boşlu-
ğunun selikli qişasında və cinsi orqan nahiyəsində də
səpgilər əmələ gələ bilər. Ağız boşluğundakı səpginin di-
varı zədələnsə, yerində aftalar əmələ gəlir ki, bu da aftoz
stomatit adlanır.
Xəstəliyin ağırlıq dərəcələri varmı?
Xəstəliyin yüngül forması tək-tək suluqcuqlarla, qızdır-
ma olmadan və ya suluqcuq əmələ gəlmədən də müşahidə
oluna bilər. Daha ağır hallar 2 yaşa qədər və böyüklərdə
ola bilər. Bu zaman suluqcuqların möhtəviyyatının irin-
li, qanlı, qeyri-şəffaf olması mümkündür. Ən ağır forma
generalizə olunmuş-yayılmış formadır. Bu zaman dəri və
selikli qişalarla yanaşı, daxili orqanlar da zədələnir, onlar-
da iltihabi əlamətlər qeyd edilir. Bu əlamətlərə daha çox
yaşlı, immun sistemi zəifləmiş, hormonal dərman qəbul
edən insanlarda rast gəlinir.
Uşaqlarda hansı ağırlaşmalar
mümkündür?
Ağırlaşmaların olmasına səbəb bu xəstəlikdən sonra
immun sisteminin zəifləməsidir. Daha çox suluqcuqların
qaşınması ilə ikincili infeksiya-stafilokok infeksiyasının
qoşulması və irinləmə ola bilər. Bu zaman qabıqdan son-
ra çapıq qala bilər. Nadir hallarda pnevmoniya (sətəlcəm),
orta qulaq iltihabı, beyin-beyincik iltihabı da ola bilər.
Səpgi əmələ gələndən 4 gün sonra qızdırma düşməyibsə
və ya öskürək, təngnəfəslik, qulaq ağrısı, yuxuya meyilli-
lik, müvazinətin pozulması (yeriyərkən səndələmə) kimi
şikayətlər varsa, mütləq həkiminizə müraciət edin!
Hamilələrdə suçiçəyi
Hamiləliyin I və II trismestrində bu virusa yoluxduq-
da döldə anadangəlmə (kongenital) suçiçəyi yaranır. Bu
zaman embriopatiya-baş beyin qabığının atrofiyası, hid-
ronefroz, ətraflarda sümük-dəri defekti və s. dəyişikliklər
yarana bilir. Bu klinikanın I trismestrində rast gəlmə tez-
liyi 0.7%, II trismestrdə 2% olsa da, III trismestrdə 0%-
dir. Əgər doğuşdan 5 gün öncə və ya 2 gün sonra anada
suçiçəyi klinikası müşahidə olunarsa, bu zaman yeni do-
ğulmuş körpədə su çiçəyinin klinikası (Neonatal varisella)
müşahidə edilir. Buna səbəb bu virusa qarşı əmələ gələn
anticisimlərin ciftdən ötürülmə zamanının qısa olmasıdır.
Diaqnoz nəyə əsasən qoyulur?
Diaqnoz aşağıdakı klinik əlamətlərə görə qoyulur:
- Polimorf səpgilər (eyni zamanda müxtəlif formalı
səpgi-qırmızı ləkə, qabarcıq, suluqcuq)
- Başın tüklü hissəsində, gövdədə, selikli qişalarda
- Səpgilərin qaşınan olması
- Qızdırma
Profilaktika məqsədilə nə etmək
lazımdır?
- Suçiçəyi xəstəliyi olan uşaqlarla təmasda olmamaq;
- Uşağın gigiyenasına, əllərini təmiz saxlamasına diqqət
yetirmək;
- Otağın havasını tez-tez dəyişmək;
- Passiv immunizasiya - bu, xəstəliyi keçirmiş insanla-
rın qanından alınan hazır antitellərlə aparılır. Xəstə ilə
təmasdan 96 saat ərzində immunoqlobin (VZiG) əzələ
daxilinə yeridilir. Bu immunoqlobin hamilə qadınlara
da vurula bilər. Suçiçəyi xəstəliyindən qorunma dövrü
2-4 həftədir.
- Aktiv immunizasiya - xəstə ilə təmasdan 72 saat
ərzində vurulur. Bu, canlı vaksindir və subkutan
(dərialtı) yeridilir. Planlı şəkildə də aparıla bilir. 2 doz
aparılır: I doz 12-15 aylıq, II doz 4-6 yaş arası uşaqlar-
da aparılır. Aktiv immunizasiya canlı vaksin olduğun-
dan hamilə qadınlara əks göstərişdir.
Xəstə uşağı nə qədər müddətə ətraf
mühitdən izolyasiya etmək lazımdır?
- Xəstə uşaqlar axırıncı qabıq düşənə qədər ictimai
mühitə çıxmamalıdır.
Müalicə metodları nələrdir?
- Qızdırma salmağa göstəriş və bunun üçün nə etmək
lazımdır? Əslində qızdırma qoruyucu bir reaksiyadır.
Əgər uşaq özünü yaxşı hiss edirsə, temperatur 38C-ni
keçmirsə və ya baş ağrıları yoxdursa, qızdırma salıcıya
ehtiyac yoxdur. Amma bu tip şikayətlər mövcüddursa,
o zaman Parasetamol tərkibli sirop və ya tabletlərdən
istifadə edilir. İbufen tipli qeyri-steroid iltihab əleyhinə
preparatlar da istifadə oluna bilər. Amma bu preparat
parasetamol kömək etməyəndə istifadə oluna bilər.
Çünki çox uşaqlarda ibufenə qarşı hiperhəssaslıq al-
lergik reaksiya, eləcə də allergiyaya meyilli uşaqlarda
bronxial astmaya təkan verə bilər. Aspirin isə qətiyyən
istifadə edilməməlidir. Əks təqdirdə Reye sindromu-
na (qaraciyər çatışmazlığı, ensefalit) və sonda komaya
səbəb ola bilir.
- Virusun qandakı miqdarını azaltmaq məqsədilə çoxlu
miqdarda maye qəbul edilməlidir.
- Dırnaqların kəsilməsi, hər gün duş almaq, yerli olaraq
səpgilərin qurudulması (Betadin məhlulu və ya brili-
ant yaşılı) yolu ilə ikincili infeksiyanın qarşısı alınır.
- Otaq temperaturu aşağı olmalıdır, əks təqdirdə
tərləmə artır, bu isə qaşınmanın artmasına səbəb olur.
- Qaşınma olarsa, antihistaminik preparatlar istifadə
edilir.
- Ağız içi səpgilərdə antiseptik məhlullarla qarqara (Lo-
roben)
- Daha ağır hallarda hazır immunoqlobin vena daxili
(İviG)
Ən son müalicə prinsipi olan asiklovir preparatının
istifadəsi və göstərişlər:
- Əgər neonatal dövrdə (1 aylıqda) suçiçəyi olubsa,
asiklovir vena daxili.
- Uşaqda leykoz diaqnozu qoyulubsa və ya steroid
preparatlar qəbul edirsə və ya kimyaterapiya qəbul
edirsə.
- Ağciyər və ürəklə bağlı ciddi problemlər varsa.
Göründüyü kimi, suçiçəyi xəstəliyinə yoluxma hal-
ları qaçılmaz olsa da, xəstəliyin ağır fəsadları ilə qarşı-
laşmamaq üçün yuxarıda göstərilən məsləhətlərə əməl
edilməsi tövsiyə olunur.
Həkim-pediatr Ülkər Seyidova
Dr.Nərminə Məmmədova
MƏRKƏZİ KLİNİKA
BÜLLETEN-6 | APREL 2015
2
Suçiçəyi xəstəliyi
MƏRKƏZİ KLİNİKA
BÜLLETEN-6 | APREL 2015
3
Mərkəzi Klinikanın Ümumi Cərrahiyyə
Şöbəsində növbəti böyrək transplanta-
siyası əməliyyatı 22 yaşlı xəstə üzərində
uğurla həyata keçirildi.
Əməliyyatın həyata keçirilməsi
üçün Baş həkimin müavini, həkim-
reanimatoloq Sədaqət Bəhrinin sədrliyi
ilə Ümumi Cərrahiyyə Şöbəsinin müdiri
Dr. Zaur Xəlilov, Reanimasiya Şöbəsinin
müdiri Dr. Vüqar Abdulkərimov, Tib-
bi Laboratoriya Şöbəsinin müdiri Dr.
Vəcihə Həziyeva, İnfeksiya-nəzarət
Komitəsinin sədri Dr. Yaqut Qarayeva,
Hüquq Şöbəsinin müdiri Ramin Rzayev,
Tibbi Ekspertiza Komissiyasının sədri
Vüqar Ömərli, həkim-ümumi cərrah
Tariyel Nadirov, həkim-reanimatoloq
Səbinə Qasımovadan ibarət xüsusi ko-
missiya təşkil olunmuşdur. Əməliyyat
isə peşəkar mütəxəssis briqadası
tərəfindən icra edilmişdir.
Dünyada minlərcə insan xroni-
ki böyrək çatışmazlığı səbəbilə orqan
gözləyir. Orqan bağışlamanın istənilən
sayda olmamasına görə bəziləri bu
gözləmənin nəticəsində həyatını iti-
rir. Bəziləri isə, yaxınlarından aldığı or-
qanla həyatlarına davam edir. Dünya
əhalisinin sayı artdıqca xroniki böyrək
çatışmazlığı olan insanlar da artır. Eləcə
də Azərbaycanda hal-hazırda bir milyon
əhaliyə 450-550 böyrək çatışmazlığın-
dan əziyyət çəkən xəstə düşür.
Xroniki böyrək
çatışmazlığı nədir?
Xroniki
böyrək
çatışmazlığı
böyrəklərin işləməsinin yavaşlaması
və dayanması ilə əlaqədar olaraq qan-
da olan su, duz, və digər mineralla-
rın balansının pozulmasıdır. Böyrəklər
işləməyəndə elektrolitlər və artıq
mayelər bədəndə toplaşmağa başlayır
və bu maddələrin səviyyəsi yüksəldikcə
ölümcül nəticələr verə bilər. Böyrək ça-
tışmazlığı zamanı başlanğıc vaxtlarda
hər hansı bir əlamət müşahidə edilməyə
bilər, amma böyrəklərin funksiyaları
pozulduqca bədəndəki su və elektrolit
balansı pozulmağa başlayır, gücsüzlük,
nəfəs darlığı kimi ilk əlamətlər hiss edilir.
Bu zaman insanın ayaqlarından başlaya-
raq bədəndə şişlik əmələ gəlir. Böyrəklər
lazımi funksiyaları yerinə yetirə bilmədiyi
üçün sidik ifrazı çox az olur. Bundan
əlavə, böyrəklər hər cür vəziyyətə asan
uyğunlaşdığı üçün, böyrək çatışmaz-
lığının ciddi əlamətləri, böyrəklər tam
zərər görənə qədər ortaya çıxmaya bilər.
Böyrək çatışmazlığı həyati təhlükəsi və
yüksək məsrəfli olması səbəbilə çətin
bir xəstəlik olduğu üçün nə qədər erkən
diaqnoz qoyularsa, orqan itkisi və ölüm
riski o qədər aşağı olur. Buna görə
də böyrək çatışmazlığının başlanğıc
əlamətləri, diaqnozu, müalicəsinə uyğun
kriteriyaları bilmək həyati əhəmiyyət
kəsb edir. Son illərdə böyrək çatışmaz-
lığının rastgəlmə tezliyi getdikcə art-
maqda və yüksək ölüm riskinə səbəb
olduğundan ciddi bir səhiyyə problemi
halına gəlmişdir.
Xroniki böyrək
çatışmazlığı-nın əlamətləri:
1. Ürəkbulanma
2. Qusma
3. İştahasızlıq
4. Yorğunluq, zəiflik
5. Yuxu pozğunluğu
6. Sidik çıxışında dəyişikliklər
7. Əzələ zəifliyi və əzələ ağrıları
8. Yüksək təzyiq
Xroniki böyrək çatışmazlığı-
nın yaranma səbəbləri:
Xroniki böyrək çatışmazlığı müxtəlif
səbəblərdən yarana bilər. Ən çox
müşahidə edilən səbəb şəkər xəstəliyi,
yüksək təzyiq, nefritlər, uroloji səbəblər
və kistik böyrək xəstəlikləridir. Səbəblərin
sıxlığı ölkələrə görə dəyişir. Onların
içərisində 39 % şəkərli diabet, 26 % hi-
pertenziya və 11 % qlomerulonefritlər
üstünlük təşkil edir. Uşaq yaş qrupun-
dakı xəstələrdə isə böyrək çatışmazlığı-
na yol açan əsas səbəb vezikuloureteral
rekluks, təkrarlayan urinar infeksiyalar,
xroniki glomerulonefritlərdir. Yüksək
təzyiq fonunda böyrək içindəki na-
zik damarlarda tıxanıqlıq yaranır. Artan
qan təzyiqinə görə böyrəklər kiçilərək
funksiyasını itirir və böyrək çatışmaz-
lığı yarana bilir. Buna görə təzyiqə tez-
tez nəzarət olunmalıdır. Yüksək təzyiq
nəzarətə götürüldükdə böyrək çatış-
mazlığı riski xeyli aşağı düşür. Səbəbi
bilinən yüksək təzyiq xəstələri əsasən
böyrək xəstəliklərinə bağlı olur.
Risk faktorları hansılardır?
Xroniki böyrək çatışmazlığından heç
kim sığortalanmayıb. Daha doğrusu
bu xəstəliklə hər kəs üzləşə bilər. Təbii
ki, hər bir xəstəlikdə olduğu kimi bu
xəstəliyə də risk yaradan bəzi elementlər
vardır. Məsələn: diabet, yüksək təzyiq,
ürək problemləri, siqaret çəkmək, kök-
lük, qanda xolesterin səviyyəsi, ailədə
rast gəlinən böyrək problemləri, 65 və
ondan yuxarı yaşda olmaq.
Xroniki böyrək çatışmazlığına
necə diaqnoz qoyulur?
Xəstələrin çoxu erkən və ya orta
mərhələdə olub, bu mərhələlərdə
şikayətləri ya çox az və ya heç olmur.
Bu səbəblə bu cür xəstələrin diaqnozu
klinik müayinə, biokimyəvi analizlər və
sidik anazlizinə əsasən qoyulur.
Xroniki böyrək çatışmazlığı-
nın gedişatı necədir?
Son
vaxtlarda
xroniki
böyrək
xəstələrinin çoxunda böyrək çatışmaz-
lığı meydana çıxır. Bu xəstəliyin gedişatı
boyunca nefroloqun məsləhət gördüyü
vaxtlarda müayinə edilməli və şikayətlərdə
dəyişiklik olduğu halda dərhal müraciət
etmələri son dərəcə vacibdir.
Xroniki böyrək çatışmazlığı-
nın müalicəsi nədir?
Son vaxtlarda böyrək çatışmazlığının
müalicəsində 2 metod vardır:
1. Dializ müalicəsi - Bu üsul özü də
iki formada icra edilir. Hemodializ xəstə
qanının damardan alınaraq, təmizlənib
təkrar xəstəyə verildiyi sistemdir. He-
modializ üçün xüsusi tibbi aparatlar
istifadə olunur və xəstənin ehtiyacına
görə, həftədə 1-3 dəfə olur. Digər me-
tod isə periton dializidir ki, bu zaman
qarın boşluğuna verilən mayeyə zərərli
maddələrin keçməsi və daha sonra bu
mayenin boşaldılması ilə icra edilir.
2. Böyrək transplantasiyası isə, uy-
ğun canlı vericisi olan xəstələrdə həyata
keçirilir. Eyni zamanda bəzi ölkələrdə be-
yin ölümü keçirmiş xəstələrdən orqanları
alınaraq uyğun xəstələrə köçürülməsilə
də böyrək transplantasiyası həyata ke-
çirilir. Dünyada ilk dəfə böyrək trans-
plantasiyası əməliyyatını 1954-cü ildə
Joseph E. Murray etmiş, 1990-cı ildə isə
bu kəşfinə görə Nobel Tibb Mükafatına
layiq görülmüşdür. Böyrək transplanta-
siyası xroniki böyrək çatışmazlığının ən
ideal müalicə metodudur.
Olduqca sevindirici və qürürverici hal-
dır ki, artıq Mərkəzi Klinikada da böyrək
transplantasiyası uğurla həyata keçirilir.
Belə ki, mart ayında Ümumi Cərrahiyyə
şöbəsində növbəti uğurlu böyrək trans-
plantasiyası həyata keçirildi. 22 yaş-
lı xəstə böyrək çatışmazlığı səbəbilə
xəstəxanamıza müraciət etmişdi. Xəstə 6
yaşındaykən bir böyrəyi xəstəlik səbəbilə
cərrahi əməliyyatla çıxarılmış, bir il bun-
dan əvvəl isə səbəbi bilinməyən böyrək
çatışmazlığından ikinci böyrəyi də öz
funksiyasını itirərək xroniki böyrək ça-
tışmazlığı yaranmışdır. Son bir ildə xəstə
həftədə 3 dəfə olmaq şərtilə dializə
qəbul edib. Bu da xəstənin getdikcə
ümumi vəziyyətinin pisləşməsinə gətirib
çıxarmışdı. Aparılan müayinələrdən son-
ra böyrək transplantasiyasının vacibliyi
barədə xəstə məlumatlandırılmışdır. Bu
zaman xəstə donorunun olduğunu bil-
dirmişdir. Anasının qohumu olan 30 yaşlı
donor da xəstəxanaya müraciət edərək,
könüllü olaraq öz böyrəyinin birini qo-
humuna vermək istədiyini qeyd etmiş-
dir. Bundan sonra xəstənin və donorun
qanının eyni qan qrupu olmasını nəzərə
alaraq hər ikisinə geniş müayinələrin
aparılmasına başlanılmışdır. Aparılan
müayinələrin nəticəsinə əsasən, donorun
böyrəyinin xəstəyə köçürülmək üçün uy-
ğun olduğu müəyyənləşdirilmişdir. Apa-
rılan tam əməliyyatönü hazırlıqdan sonra
cərrahi briqadamız tərəfindən donorun
sol böyrəyi götürülərək xəstəyə köçürül-
müş və əməliyyat uğurla başa çatmışdır.
Hal-hazırda həm donorun, həm dfə
xəstənin ümumi vəziyyəti normaldır.
Xəstə artıq dializ qəbul etmir. Nefrolo-
qun nəzarəti altında mütəmadi olaraq
müayinələrə gəlir.
Son olaraq onu qeyd etmək istərdik
ki, böyrək çatışmazlığı xəstəliyinin ən
ideal müalicəsi böyrək transplanta-
siyasıdır. Hər kəsi öz yaxınlarında bu
xəstəlikdən əziyyət çəkən varsa, or-
qan bağışlayıb həyatını xilas etməyə
çağırırıq!
Ümumi Cərrah, Transplantoloq
Tariyel Nadirov
Dr. Səmra Mehdiyeva
BÖYRƏK TRANSPLANTASİYASI ƏMƏLİYYATI
NÖVBƏTİ DƏFƏ UĞURLA HƏYATA KEÇİRİLDİ
HƏR ORQAN TRANSPLANTASİYASI YENİ BİR HƏYATDIR. ORQAN BAĞIŞLA, HƏYAT VER!!!
Məlum olduğu kimi, Mərkəzi Klinikada xalqımıza yüksək
səviyyəli tibbi xidmət göstərilməsi davam edir və gündən-
günə inkişaf edir. Xəstəxanamızda bütün istiqamətlər üzrə
təkmilləşmə işləri aparılır, xidmətlərimizin keyfiyyəti, növləri
və istiqamətləri daim genişləndirilir, yeni layihələr həyata ke-
çirilir. Müasir tibbin ən son nailiyyətlərindən peşəkarcasına
istifadə etməklə xalqımıza yüksək tibbi xidmət göstərmək
fəaliyyətimizin əsas prinsipinə çevrilir.
Qeyd olunanların məntiqi davamı kimi, 01.04.2015-ci il
tarixdə Mərkəzi Klinikanın yeni Stomatologiya Mərkəzinin
istifadəyə verilməsini göstərmək olar. Mərkəz Bakı şəhəri,
Xəqani küçəsi 90D ünvanında fəaliyyətə başlamışdır. Mərkəz
yüksək səviyyəli, xarici ölkələrdə təhsil almış və kurslar keç-
miş mütəxəssislər və ən son texnologiyalara uyğun tibbi
avadanlıqlarla təmin olunmuş, tibbi xidmətlə bağlı bütün
şərait yaradılmışdır.
Stomatoloji Mərkəzin ümumi sahəsi 527,71 m2 olmaq-
la, şöbədə 9 tibbi xidmət, 2 laboratoriya, 1 sterilizasiya
otağı mövcuddur. Yüksək keyfiyyətli və beynəlxalq stan-
dartlara cavab verən stomatoloji xidmət zamanı aşağıdakı
məsələlərə xüsusi tiqqət verilir.
Klinikada əsas üç məsələyə diqqət yetirilir:
• Tibbi personalın mütəxəssislik səviyyəsi;
• Peşəkar tibbi xidmət;
• Etibarlı sterilizasiya.
Xəstələrə 6 həkim, 8 tibb işçisi və müxtəlif sahələrdə
məşğul olan 6 inzibati-texniki heyət üzvü xidmət göstərir.
Həkimlər yüksək ixtisaslı və müasir səviyyədə tibbi bilik və
bacarığa malikdirlər. Mütəmadi olaraq müxtəlif xarici və yer-
li kurs və seminarlarda iştirak edirlər. Xarici ölkələrdə sto-
matologiya üzrə böyük nüfuza malik mütəxəsislər vaxtaşırı
olaraq dəvət edilərək burada xidmət göstərmələri təmin
edilir. Mərkəzdə stomatologiya sahəsində olan ən son tex-
nika və texnologiyalardan istifadə etməklə dəqiq və düzgün
tibbi xidmət göstərilir.
Xəstələrin tibbi xidmət üçün müraciətləri əvvəlcədən
qeydiyyat (randevu) sistemi əsasında və dəqiq vaxtla apa-
rılır. Xəstə Mərkəzə daxil olandan beş dəqiqə ərzində pro-
sedura götürülür. Prosedurun müddəti qabaqcadan təyin
edilir ki, bu da xəstələrə öz günlük planlarını daha dəqiq
qurmağa şərait yaradır. Müraciət edən xəstələrə check-
up müayinəsindən sonra müalicə planı hazırlanır, onlara
mövcud diş problemləri izah edilir və müalicəyə başlanılır.
Prosedur vaxtı həkim və assistentin birgə professional işi
sayəsində onlar heç bir narahatlıq hiss etmir. Həkimlər və
assistentlərin işi rotasiya sistemi (hər prosedurda kabinet və
assistent dəyişir) əsasında aparılır ki, bu da iş prosesində
yarana biləcək səhvlərin qarşısını almağa, personalın daha
məsuliyyətli və dəqiq işləməsinə şərait yaradır.
Mərkəzdə aşağıda qeyd edilən tibbi xidmətlər göstərilir:
• Check–up müayinə;
• Ağız boşluğunun gigiyenik təmizlənməsi (diş daşları və
piqment ləkələri);
• Dişlərin ağardılması;
• Estetik restavrasiyalar;
• Kariyesin müalicəsi;
• Endodontik müalicə (kanal müalicəsi);
• Keramik taxmalar (in lay, on lay);
• Vinir, luminir (Almaniya, İvoclar);
• Qapaqlar – metalkeramika – keramika, preslənmiş kera-
mika, zirkon (Almaniya, İvoclar) ;
• Protezlər – akril, neylon, valoplast, bügel və s.
Mərkəzdə uşaq stomatologiyasına xüsusi yer verilir.
Uşaqlarda ağrısız müalicə işləri uşaqların klinikaya həvəslə
gəlməsinə səbəb olur. ABŞ istehsalı olan müalicəvi plomb-
lardan və profilaktika vasitələrindən istifadə olunur. Profi-
laktika məqsədi ilə hermetizasiya (silant), remineralizasiya
(dişlərin kalsium və ftorla zənginləşdirilməsi) prosedurları
aparılır.
Tibbi xidmət zamanı sterilizasiya məsələlərinə xüsu-
si əhəmiyyət verilir. Amerika üsulu ilə aparılan sterilizasiya
aşağıda qeyd olunan beş mərhələdə həyata keçirilir:
• Tibbi alətlərin yuyucu məhlulda saxlanması;
• Axar su altında xüsusi fırça ilə təmizlənməsi;
• Ultrasonik aparatında dezinfeksiyası;
• Aftoklavda sterilizasiya (121°C, 134°C);
• Alətlərin reviziyası.
Mərkəzdə VİP kabinet, 8 prosedur otağı, rentgeno-
loji kabinet, texniki laboratoriya fəaliyyət göstərir. Bütün
avadanlıqlar dünyada lider sayılan SİRONA firmasına aid-
dir. VİP kabinetdə CEREC aparatının təqdim etdiyi CAD/
CAM sistemi quraşdırılıb. Bu sistem vasitəsi ilə müxtəlif
restavrasiyalar (keramik qapaqlar, körpülər, inley, onlay)
kliniki şəraitdə kompyuter texnologiyasının köməkliyi ilə
xüsusi proqram əsasında və 3D dizaynda hazırlanır. Bu da
pasientlərin vaxtına qənaət etməyə, qısa müddət ərzində
(1 saat) hazır diş konstruksiyalarını təqdim etməyə imkan
verir. Xidmət otaqlarında (kabinetlərdə) quraşdırılan Sİ-
RONA C4+ və C8+ avadanlıqları pasientlərə və həkimlərə
maksimum komfort təşkil edir. Avadanlıqda quraşdırılmış
viziograf (ağızdaxili kamera) vasitəsi ilə xəstələrə kliniki
halları monitor vasitəsilə (22 düymlüq ekran) ətraflı izah
etməyə imkan verir. Hər kabinetdə endodontik müalicə
üçün VDV gold cihazları quraşdırılıb. Bu cihaz vasitəsi ilə
kanal müalicəsi dünya standartlarına uyğun şəkildə aparılır.
SİRONA Orthophos XG plus DS/ceph panoram və tomoq-
rafik (bütün alt və üst çənə nahiyəsini, gicgah-çənə oyna-
ğını və burun ətrafı cibləri) çəkilişlər edə bilir və 12 proq-
ramı var. SİRONA Helident DS rəqəmsal dental rentgen
aparatı intraoral və dişləm halında (Bitening) rentgen edir.
Bu aparatın digər şirkətlərin istehsal etdiyi rentgen apa-
ratlarından əsas üstünlüyü onun təhlükəsizliyidir. Bu apa-
rat bütün təhlükəsizlik standartlarına cavab verir. Tubusun
başlıq hissəsinə xüsusi qurğu (kollegmator) yerləşdirilir ki,
bu da şüalanmanı məhdudlaşdırır. Bu rentgenlər əsasında
karies ən ilkin mərhələdə aşkar edilir və müalicə olunur.
Yuxarıda qeyd olunanlardan göründüyü kimi, Mərkəzi
Klinikanın Stomatologiya Mərkəzində beynəlxalq standar-
lara uyğun tibbi xidmət imkanları yaradılmışdır. Bu imkan-
lardan istifadə edərək xalqımıza layiq olduğu stomatoloji
xidmət göstərməkdən qürur duyuruq.
Zeynəb Qəmbər qızı Allahverdiyeva - 24 Oktyabr 1983-cü
ildə Bakı şəhərində anadan olmuşdur. 2001-ci ildə Azərbaycan
Dövlət Tibb Universitetinin Müalicə-Profilaktika fakültəsinə
daxil olmuş, 2007-ci ildə həmin universiteti bitirmişdir. 2008-
2009-cu illərdə Milli Onkologiya Mərkəzində Onkoloq ixtisası
üzrə İnternatura kursu keçmişdir. Bu müddət ərzində elmi konf-
ranslarda və simpozumlarda fəal iştirak etmişdir. 08.11.2010-cu
il tarixdə Azərbaycan Onkoloqları Elmi Cəmiyyətinin iclasında
məruzəçi kimi çıxış etmişdir. 2009-2010-cu illərdə Rusiya Fe-
derasiyası Rostov şəhəri Onkoloji Mərkəzində Onkoginekolo-
giya üzrə kurs keçmişdir. 2010-2011-ci illərdə Milli Onkologiya
Mərkəzində, 2011-2012-ci illərdə Avstriya Respublikası, Vyana
şəhəri Algenmine Krancenhouse Klinikasında Kimyaterapiya
üzrə kurs keçmişdir. Bu müddət ərzində "Bəd xassəli şişlərin
daha müasir üsullarla müayinə və müalicəsi" istiqamətində
təkmilləşmişdir. Hər il mütəmadi olaraq müxtəlif beynəlxalq
elmi konfranslarda iştirak edir. Bunlardan Avstriya Respublikası Vyana şəhərində “Krebstag”
və Türkiyə Cümhuriyyəti İzmir şəhərində keçirilmiş “EHOS ” konqreslərini xüsusi qeyd etmək
lazımdır. 2012-ci ildən Avropa Onkologiya Birliyinin (Europan Society of Oncology) üzvüdür.
2011-ci ildən Mərkəzi Klinikada həkim-onkoloq kimi fəaliyyət göstərir.
Könül Rəsul qızı Namazova – 17.06.1976-cı ildə Bakı
şəhərində anadan olmuşdur. 1999-cu ildə Pediatriya
fakültəsinə daxil olmuş, 2005-ci ildə həmin ixtisası bitir-
mişdir. 2005–2006-ci illərdə Azərbaycan Tibb Universite-
tinin Kliniki Tibbi Mərkəzində anesteziologiya-reanima-
tologiya ixtisası üzrə internatura keçmiş və 2007–ci ildə
Mərkəzi Klinikada uşaq anestezioloqu kimi işə başlamış-
dır. 2008-ci ildə Türkiyə Cümhuriyyəti Bursa şəhəri Uludağ
Universiteti Tibb Fakultəsinin Anestezioloqiya-Reanimato-
loqiya kafedrasında pediatrik-anesteziya üzrə 6 aylıq kurs
keçmişdir. Bu müddət ərzində “Neonatal Rezustasiya Kur-
su”, “Pediatrik EKQ Dəyərləndirmə kursu” və s. mövzülar
üzrə təkmilləşmə kurslarında iştirak etmişdir. 16.09.2009-
cu ildən 23.07.2010-cu il tarixinədək “Türkiyə Cümhuriyyəti
Sağlık Bakanlığı Şişli Etfal Eğitim və Araştırma Hastanesi
Baştabipliği” xəstəxanasında və “Türkiyə Cümhuriyyəti İs-
tanbul Universiteti Cerrahpaşa Tıp Fakültəsi” Anesteziologiya kafedrasında "Uşaqlarda
ümumi və regional anesteziya texnikalarının fərqli yönlərdə istifadəsi" üzrə kurs keşmişdır.
2010-cu ildən etibarən Mərkəzi Klinikada Əməliyyatxana şöbəsində həkim-anestezioloq
kimi fəaliyyətini davam etdirir. O, pediatrik anesteziya üzrə ixtisaslaşmışdır.
MƏRKƏZİ KLİNİKA
BÜLLETEN-6 | APREL 2015
4
Dr. Zeynəb Allahverdiyeva
həkim-onkoloq
Dr. Könül Namazova
həkim-anestezioloq
Həkimlərimizi tanıyaq
Həkimlərimiz beynəlxalq konfrans və kurslarda
MK Həkim-onkoloqu
Azər Quliyev 22-
27 aprel 2015-ci il
tarixlərdə Türkiyə
Cümhuriyyəti Antalya
şəhərində "XXI Ulusal
Kanser" konqresində
iştirak etmişdir.
MK Həkim-
neyrocərrahı Vüqar
Mirzəliyev 17-22 aprel
2015-ci il tarixlərində
Türkiyə Cümhuriyyəti
Antalya şəhərində
"XIX Neyrocərrahiyyə"
konqresində iştirak
etmişdir.
MK Həkim-uroloqu
İlkin Nəsirov 27 aprel
– 07 may 2015-ci il
tarixlərində Türkiyə
Cümhuriyyəti Antalya
şəhərində "XI Ulusal
Androloji" konqresində
iştirak edəcək.
MK Kardiologiya
Şöbəsinin müdiri, Həkim-
kardioloq Firdovsi İbrahi-
mov 24-27 aprel 2015-ci
il tarixlərdə Türkiyə
Cümhuriyyəti İstanbul
şəhərində "TKD Girişimsel
kardioloji" toplantısında
iştirak etmişdir.
STOMATOLOJİ XİDMƏTLƏRDƏ YENİ İNKİŞAF MƏRHƏLƏSİ
MƏRKƏZİ KLİNİKA
BÜLLETEN-6 | APREL 2015
5
Sevda xanım uzun illərdir ki, pediatriya ilə məşğulsuz,
daha doğrusu uşaqların sağlamlığının keşiyində daya-
nırsiz. Uşaqlarla işləmək insanda hansı hisləri oyadır?
- Uşaqları müalicə etmək olduqca məsuliyyətli, çox
çətin və bir o qədər də şərəfli işdir. Bizim sahədə çətinlik
ondan ibarətdir ki, uşaqlar öz ağrılarını, narahatlıqlarını
böyüklər kimi dəqiq ifadə edə bilmirlər. Bununla birlikdə
uşaq orqanizmi çox həssasdır, o kiçik xətaları belə ba-
ğışlamır. Ancaq xəstə uşaqları müalicə etmək, onların və
valideynlərinin sevincinin şahidi olmaq tamam başqa bir
hissdir, əvəzolunmaz qürur və şərəf hisidir. Ona görə də
mən işimin bütün gərginliklərinə, məsuliyyətinə baxmaya-
raq, seçdiyim peşəni çox sevirəm.
Pediatriya, daha doğrusu neonatologiyada ən başlıca
problemlərdən biri vaxtından əvvəl doğulmadır. Vaxtın-
dan əvvəl doğulmanın səbəbi nədir?
- Vaxtından əvvəl doğulmanın bir sıra səbəbləri var. Bu,
həm anadan, həm də uşağın öz problemlərindən qaynaq-
lana bilər. Ananın bəzi xroniki xəstəlikləri – hipertoniya,
böyrək xəstəliyi, müəyyən genetik, xromosom patologiya-
ları nəticəsində uşaq vaxtından əvvəl doğula bilər. Burada
stress faktorunun da böyük rolu var. Əgər uşaq 37 həftədən
əvvəl dünyaya gəlirsə, bu hal vaxtından əvvəl doğuş sayı-
lır. 1500 qramdan aşağı doğulan uşaqlar isə ekstremal az
çəkili uşaqlar hesab edilir. İndi artıq 22 həftənin üstündə
doğulmuş uşaq, diri doğulma sayılır. Uşaq nə qədər vax-
tından tez doğularsa, bir o qədər problemləri çox olur. Belə
uşaqlarda ağ ciyərin açılması, vital funksiyaların qoşulması
və adaptasiyası daha çətin keçir. Bu gün klinikamızda vax-
tından əvvəl doğulmuş uşaqlara lazım olan bütün tədbirlər
aparılır ki, o gələcəkdə heç bir fəsad yaşamasın. Tədbirlər
nə qədər doğru-düzgün yerinə yetirilərsə həmin uşağın bir
o qədər fəsad yaşama ehtimalı azalır.
Bəs vaxtından əvvəl doğulan uşaqların sağ qalma ehti-
malı nə qədərdir?
- Təbii ki, bu, bir statistikadır. Dediyim kimi, uşaq nə
qədər vaxtından erkən doğularsa, bir o qədər fəsad vermə
ehtimalı yüksəkdir. İl ərzində orta hesabla 450-500 yeni do-
ğulan usaq klinikanın uşaq reanimasiyası şöbəsindən keçir.
Keçən il 130 uşaq vaxtından əvvəl doğulmuşdu və onların
çəkiləri 1500 qramdan aşağı idi. Keçən il vəziyyətdən çıxar-
dığımız ən balaca uşağın çəkisi 500 qram, hestasiya yaşı
25 həftə 5 günlük idi. 9 uşağımız var idi ki, onların çəkiləri
630-700 qram idi. Onların içərisində 9-u yaşayır, yalnız 1
uşağı həyatda saxlaya bilmədik. Dinamik müşahidələrdə
də o uşaqların heç bir fəsad almadığını görürük. Onların
görmə, eşitmə funksiyaları yoxlanılır, sinir sistemlərinə
diqqət yetirilir, reabilitasiyaları aparılır. Onlar öz yaşıdla-
rından ciddi fərqlə geri qalmırlar. Həmin uşaqların psixo-
loji və fiziki inkişafları normaldır. Bir yaşına qədər onlarda
müəyyən geriqalmalar müşahidə etsək də, bir yaşdan son-
ra digər uşaqlarla bərabərləşirlər.
Bəzən yeni doğulan uşaqlarda sarılıq xəstəliyinə rast
gəlinir. Bunun səbəbi nədədir?
- İlk mərhələdə tam normal doğulmuş uşaqların belə,
üçüncü sutkalarından fizioloji sarılıqları başlayır. Uşaq
bətndaxili ana qanı ilə təmasda olur, doğulduqdan sonra
fetal hemoqlabin parçalanır və bunun nəticəsində billiru-
bin ifraz olunur. Bu da uşaqların rəngini sarıya boyayır. Bu
proses normal keçdiyi halda biz o sarılığı cüzi görürük. La-
kin billirubinin xaric olunması bir qədər çətinləşəndə təbii
ki, sarılıq daha da şiddətli keçir. Patoloji sarılığın isə bir sıra
səbəbləri var. Buraya ana və uşağın qan qrupu və rezus
faktorunun uyğun olmaması, anada tiroid xəstəlikləri, bəzi
infeksion xəstəliklər, uşaqda polisitemiya, eritrosit patolo-
giyaları və s. kimi səbəblər aid edilir. Həmçinin, ana südü
ilə bağlı olan sarılıq da var ki, bu sarılıqlar müalicə tələb
etmir və uşağın 1 ayına qədər keçir.
Ağlayan uşağın dili yoxdur ki, dərdini desin. Elə isə
həkimlər körpələrdə ən çox hansı problemləri üzə çıxa-
rırlar?
- Əgər yeni doğulmuş uşaq vaxtında və normal doğu-
lubsa, onun demək olar ki, problemi olmur. Bəzi transistor
hallar qeyd edilir ki, hiperemiya, sarılıq, dərilərinin səpkili
olması, döş vəzilərinin şişməsi, sidik turşusu kristallarının
ifraz olunması və s. bunlar müalicə tələb etmir və keçici-
dir. Bəzən isə bunlara müdaxilə etməyə və lazım olmayan
müalicəyə cəhd edirlər. Belə halda körpənin adaptasiya-
sı pozulur və problemlər başlayır. Yeni doğulmuş uşaq
ağ səhifə kimidir, biz ona nə qədər az müdaxilə etsək və
adaptasiyasının düzgün getməsinə çalışsaq, bir o qədər o
uşağın inkişafını düzgün yönəldə bilərik. Lakin uşaqda na-
rahatlıq baş verdikdə, uşaq valideynləri tərəfindən mütləq
həkim müayinəsinə gətirilməli və aşkar olunan problemlər
mütəxəssis tərəfindən aradan qaldırılmalıdır.
İndi qüsur ilə doğulan uşaqlara çox rast gəlinir. Körpələrdə
bu cür problemlər nədən qaynaqlanır?
- Statistik olaraq qüsurla doğulan uşaqların sayı art-
mayıb, sadəcə daha dərin müayinələr aparıldığı üçün
bu qüsurlar hamiləlik dövründə aşkarlanır. Təbii ki, hər
şey hamiləliyin təqibindən və hamiləliyə hazırlıqdan
baş verir. Qadınlar planlaşdırılan hamiləlikdən öncə uy-
ğun müayinələrdən keçməli, hamilə olduqdan sonra isə
təqiblər düzgün aparılmalıdır. Bətndaxili qüsurlar aşkar ol-
duqda, belə bir uşağın doğulması gözlənildikdə, neonata-
loji briqada məlumatlandırılır və onlara hansı müdaxilələr
olacağını ilk andan tənzimləyirik. Ümumiyyətlə, bütün
uşaqlarımız doğulduqda lazımi müayinələr aparılır. Təsbit
etdiyimiz hansısa problem varsa, uşaq cərrahları, kardio-
loqlar, kardiocərrahlar, neyrocərrahlar, nefroloqlarımız və s.
dar ixtisas sahibi kolleqalarımız komandamıza dəstək olur
və uşaqda lazımi korreksiyalar aparılır.
Necə bilirsiniz, qadının və kişinin öz orqanizmindən erkən
xəbəri olması üçün maarifləndirmə yetərincədirmi?
- Düzdür, indi məktəblərdə bu istiqamətdə
maarifləndirmələr başlanılıb. Mənim fikrimcə, artıq məktəb
dövründən qız və oğlan uşaqları özlərinin gigiyenalarından
və orqanizmlərində baş verən digər proseslərdən xəbərdar
olmalıdırlar. Bunu onlara tam açıq şəkildə dərk etdirmək la-
zımdır. Bəzən məktəblərdə o dərsləri utanaraq keçirlər, an-
caq bu stereotiplər aradan qalxarsa, artıq uşaqlar məktəb
dövründə hazır ola bilərlər. Hər şeydən əvvəl onlar düzgün
inkişafın nə demək olduğunu biləcəklər. Bunu ifrat dərəcədə
deyil, elmi dərəcədə uşaqlara çatdırmaq lazımdır.
Bəzən uşaq və ana ölümü halları baş verir. Bu cür
hadisələrdə daha çox həkimləri qınayırlar.
- Hesab edirəm ki, hər bir hadisəyə fərdi prizmadan
yanaşmaq lazımdır. Ola bilər ki, müəyyən yerdə han-
sısa səhvlər buraxılsın və o səhvlər pis nəticəyə gətirib
çıxarsın. Ümumilikdə götürdükdə, son illərdə ölkəmizdə
tibb sahəsi xeyli inkişaf edib. Neonatoloq kimi görürəm
ki, bu sahəyə diqqət artib. Son illər ölkəmizdə perinatal
mərkəzlər qurulur və müasir texnologiyaya uyğun ava-
danlıqlarla təchiz olunur. Ancaq qeyd edim ki, neonato-
logiya sahəsində inkişaf etməyə başladığımız dövr çox
qısadır. Hesab edirəm ki, müəyyən invaziv prosedurları
daha təcrübəli mərkəzlərdə təkmilləşdirmək lazımdır.
Məsələn, əvvəllər hestasiya yaşı 28 həftədən az olduq-
da bu hal gecikmiş düşük hesab edilirdi. Lakin bu gün
amillər dəyişib, artıq 22 həftəsini tamamlamış uşaq diri
doğulmuş hesab olunur. Təbii ki, belə az hestasiya yaşlı
uşaqların ölüm riskləri çox yüksəkdir.
Bəs, bu sahədə kadrların təcrübə toplaması üçün hansı
tədbirlər görülür?
- Bizim klinikada yenidoğulmuşların reanimasi-
ya şöbəsi 10 ildir ki, fəaliyyət göstərir. Bu illər ərzində
personal mütəmadi olaraq müxtəlif ölkələrin qabaqcıl
universitetlərində (Türkiyə Cümhuriyyəti, Avstriya Respub-
likası, Almaniya Federativ Respublikası və digər ölkələrdə)
uzunmüddətli təkmilləşmə kurslarında təcrübə keçmişdir.
Bu təkmilləşmə kurslarında nəinki həkim-neonatoloqlar,
həmçinin dar ixtisaslar üzrə həkim personalı və tibb ba-
cıları hazırlanmışdır. Bu bir adamın yetişməsi demək deyil,
bunun üçün briqada yetişməlidir. Çünki burada iş 7 gün/24
saat davamlı getməlidir. Bu səbəbdən, neonatoloq-reani-
matoloqlarla birgə, bizim kardioloqlar, kardiocərrahlar,
uşaq cərrahları, neyrocərrahlar, oftalmoloqlar, nevropoto-
loqlarımız yetişdi. Bu gün demək olar ki, ən ağır vəziyyətdə
olan uşaqlar bizim klinikaya gətirilir və burada öz sağlam-
lıqlarına qovuşurlar.
Bəs uşaq evə buraxılandan sonra hər hansı bir fəsadın
yaranmaması üçün valideynlər profilaktik tədbirləri necə
yerinə yetirirlər?
- Ağır doğulmuş uşaqlar xəstəxanadan evə yazıldıqdan
sonra biz onlara evdə xidmət təşkil edirik. Tibb bacıları hər
gün bu uşaqları görür və onlar vaxtaşırı klinikaya həkim
müayinəsinə gətirilirlər. Həmçinin, bizim yeni doğulanlar
üçün Check-up proqramımız da var. Bu da körpələrin pa-
toloji hallarını aşkar etməkdə bizə yardım edir. Beləliklə, bu
uşaqlar pediatrların nəzarətindən başqa, kardioloq, nev-
ropatoloq, oftalmoloq, fizioterapevtlərimiz tərəfindən də
lazımi müayinələrdən keçirlər. Nəzarətimizdə olan uşaqlar
tam reabilitasiya keçdikləri üçün heç bir fəsadla üzləşmirik.
Dünyaya uşaq gələndə ananın keçirdiyi hiss məlumdur.
Bəs, o anda həkimlər hansı hissləri yaşayırlar?
- Məsuliyyət... Təbii ki, hər doğulan uşaq bir sevincdirsə,
bunun yanında da ciddi bir məsuliyyət var. Bütün canlı-
ların içərisində ən çox qayğıya ehtiyacı olan yeni doğul-
muş körpədir. Hər hansı bir uşağın fiziki və psixi inkişafının
getməsində pediatrlar da valideynlər qədər məsuliyyətli
olmalıdırlar.
Müsahibəni hazırladı:
Qızılgül Məmmədova
Dr. Sevda Əsədova: "Uşaqları müalicə etmək olduqca
məsuliyyətli, çox çətin və bir o qədər də şərəfli işdir"
Baş həkimin müavini, Pediatriya şöbəsinin müdiri, pediatr-neonatoloq Sevda Əsədova ilə müsahibə
Xəstə uşaqları müalicə etmək, onların
və valideynlərinin sevincinin şahidi
olmaq tamam başqa bir hisdir,
əvəzolunmaz qürur və şərəf hissidir.
Personalın yaradıcılığı
həkim-kardioloq
İlahə Məmmədova
MƏRKƏZİ KLİNİKA
BÜLLETEN-6 | APREL 2015
6
Asqıran zaman insan ürəyi bir neçə
saniyəlik fəaliyyətini dayandırır. Ona
görə asqıran zaman insana "Sağlam
ol!" deyirlər.
Anatidaefobiya elə bir qorxudur ki, bu
qorxudan əziyyət çəkən insanlar elə
zənn edirlər ki, onları hansısa ördək
izləyir.
Hər iki milyard insandan yalnız biri
116 ildən çox yaşaya bilir.
Günəş altında qaralarkən damarlar elə
zədələnir ki, onların bərpasına 4-15 ay
vaxt lazım gəlir.
Bir timsahın ömrü boyu 3 minədək
dişi çıxır və düşür.
İngiltərədə qadınların nəqliyyat
vasitələrində şokolad yeməsi qada-
ğandır.
Diş fırçası ilk dəfə 1938-ci ildə meyda-
na gəlmişdir. Lakin bizim dövrümüzdə
istifadə olunan formaya düşməsi üçün
uzun illər vaxt sərf olunmuşdur. Çün-
ki bu formada olan fırçalar ilk olaraq
1498-ci ildə Çində yaranmışdır.
Hazırladı: Leyla Mirzəzadə
Təsisçi:
Mərkəzi Klinika
Baş redaktor: Toğrul Adıgözəlov
Redaksiya heyəti: Kamran Musayev, Həsən Qəndilov, Nikbin Yusifov
Bülleten ayda bir dəfə nəşr olunur.
Tiraj: 500
Tel: +994 12 492 10 92 | Call center: +994 12 105 | Fax: +994 12 492 41 31 | info@merkeziklinika.az www.merkeziklinika.az www.facebook.com/MerkeziKlinika twitter.com/MerkeziKlinika
MARAQLI FAKTLAR
Əl işləri
Dostları ilə paylaş: |