Fridrix Vilhelm Yozef Şellinqin naturfəlsəfəsi
Fridrix Vilhelm Yozef Şellinq (1775-1854) klassik alman fəlsəfəsində obyektiv
idealizmin görkəmli nümayəndələrindən biridir. Şellinqin əsas əsərlərindən
“Transsendental idealizm sistemi” (1800), “Naturfəlsəfə sisteminin ilk cizgiləri”
(1799) –nin adlarını çəkmək olar.
Şellinqin fəlsəfəsi aşağıdakı şəkildə dövriləşdirilir:
naturfəlsəfə;
praktiki fəlsəfə;
irrasionalizm.
Şellinq öz fəaliyyətinə Fixte fəlsəfəsinin davam etdiricisi kimi başlamışdır. Lakin
o, tezliklə Fixtenin subyektiv idealizminə qarşı çıxmış və özünün obyektiv
idealizm sistemini yaratmışdır. Onun fikrincə, təbiəti izah edən əvvəlki
konsepsiyalar (Fixtenin “qeyri-mən”i, Spinozanın substansiyaları) həqiqi deyillər.
Çünki birinci halda (məsələn, subyektiv idealistlərin, Fixtenin fəlsəfəsində) təbiət
insan şüurundan ifadə olunur, qalan hallarda isə (məsələn, Spinozanın
substansiyalar nəzəriyyəsində) təbiətin məhdudlaşdırılmış izahı verilir, yəni
filosoflar çalışırlar ki, təbiəti hər hansı çərçivələrə sığışdırsınlar. O, ruh və təbiətin,
subyekt və obyektin eyniliyinə dair özünün obyektiv idealizm fəlsəfəsini
yaratmışdır. Şellinqin fəlsəfi sistemində bütün mövcudiyyətin özəl başlanğıcı nə
materiyadır, nə də fərdin şüuru. Şellinqə görə, təbiət “absolyutdur” - hər şeyi əhatə
edən, hər şeyin ilk səbəbi və ilk başlanğıcıdır. Onun fikrincə, hər şeyin mənbəyi
əbədi ağıl, zəka və mütləq “mən”dir. Şellinqə görə, bütün dünyanın ruhu var.
Aləmin müxtəlif formaları ruhun, ağlın ifadəsi və əyani təzahürüdür. Mütləq ağıl,
mənəvi və maddinin, subyektiv və obyektiv ilkin əsası və mənbəyidir. Şellinq
materiya və təbiətin ruhdan, şüurdan kənarda və ondan asılı olmadan mövcud
olması fikrini qəbul etmirdi. O deyirdi ki, materiya yalnız mütləq ruhun, ağılın
xüsusi halıdır. Şellinqin fikrincə, materiya və ruhu qarşı-qarşıya qoymaq olmaz,
çünki onlar mahiyyət etibarilə eynidirlər. Materiya və ruh eyni bir mütləq ağlın
müxtəlif vəziyyətləridir. O, subyektiv və obyektivin, mənəvi və maddinin
idealistcəsinə eyniləşdirilməsi haqqında öz təliminə əsaslanaraq mahiyyət etibarilə
maddini mənəvidə əritmişdir.
Şellinqin fəlsəfəsində idealist dialektika öz əksini tapmasa idi, onun fəlsəfi sistemi
öz-özlüyündə heç bir maraq doğurmaz və klassik xarakter kəsb etməzdi. Şellinq
fəlsəfəsinin çıxış nöqtəsini bir-biri ilə mübarizədə olan əksliklər, öz mahiyyəti
etibarilə ziddiyyətli olan bir şey kimi xarakterizə edirdi. O göstərirdi ki, “mən”də
ilkin əksliklər kimi - subyekt və obyekt mövcuddur. Onların hər ikisi bir-birini