ƏLİ ŞAMİl burul ğ anda n ç ixma q m ü m k ü n d ü r m ü ? B a k ı — 0 1



Yüklə 0,71 Mb.
səhifə1/11
tarix08.01.2018
ölçüsü0,71 Mb.
#20011
  1   2   3   4   5   6   7   8   9   10   11


ƏLİ ŞAMİL

B U R U L Ğ A N D A N

Ç I X M A Q

M Ü M K Ü N D Ü R M Ü ?


B a k ı — 2 0 0 1

76.1 (Аз)

Ш 21

“Burulğandan çıxmaq mümkündürmü?”

kitabı __________________________

_______________________________

_____________________ hədiyyəmdir


Əli Şamil

Ш21

Yaxın tariximizin hadisələrini özündə əks etdirən məqalə və müsahibələri müəllif 1990-1995-ci illərdə qələmə almışdır. Senzor və redaktorların qəzet səhifələrindən çıxardığı məqalələrdən nümunələr daxil edilməsi həmin dövrün ictimai-siyasi durumu haqqında aydın təsəvvür yaratmağa xidmət edir. Rəsmi sənədlərin əlavə edilməsi isə məqalələrdə ötəri toxunulmuş məsələlərə daha da aydınlıq gətirəcəkdir. Müəllifin Azərbaycan və Türkiyə mətbuatında çap olunan məqalələri, verdiyi müsahibələr və mətbuat konfranslarında çıxışları milli azadlıq hərəkatı üzvlərinin mövqeyini özündə əks etdirir.




İ ç i n d ə k i l ə r
Ön söz əvəzi və ya unutqan oxucu üçün 5

Naşirdən 13

Xalq Cəbhəsinə rəğbətim var 15

Məclis iflic vəziyyətindən çıxır 19

Naxçıvan MR Ali Məclisinin 4 sentyabr 1991-ci il qərarı 24

Naxçıvan MR Ali Məclisinin 4 sentyabr 1991-ci il qərarı 25

Naxçıvan MR Ali Məclisinin 5 sentyabr 1991-ci il qərarı 26

Naxçıvan MR Ali Məclisi sədrinin 6 sentyabr 1991-ci il bəyanatı 28

Heydər Əliyev — L.Petrosyan dialoqu 30

H.Əliyev: Qurultaya teleqram 31

Mənəvi dayaq lazımdır 33

Naxçıvanda DTK-nın sonu 35

AXC Naxçıvan MR şöbəsinin 12 fevral 1992-ci il qərarı 37

AXC Naxçıvan MR şöbəsinin 23 fevral 1992-ci il

protokolundan çıxarış 38

H.Əliyev… Siyasi rəqiblərini aradan qaldırmaq üçün

bütün vasitələrə əl atır 41

Əlvida vəzifə 41

Deputatların çətin günləri 44

Burulğandan çıxmaq mümkündürmü 47

Ordubadda hakimiyyət böhranı 50

Naxçıvan: Sədərəkdə döyüşlər 51

Qarşıdurma artır 52

H.Əliyev Mütəllibovun çağırışına getmədi 52

H.Əliyev: Naxçıvandan çıxmaq fikrim yoxdur 53

Ermənilər yenə aldadır 53

Hərbçilərin növbəti məşqi 53

Döyüşlər səngimək bilmir 54

Sərhəddə döyüşdür, şəhərdə yürüş 55

Döyüşlər səngiyib, amma… 56

Çörək ucuz olsa, basılmaz Vətən 57

Tufanqabağı sakitlik 59

İxracatda “Naxçıvana bahalı mal qovğası” 61

Sessiya baş tutmadı 63

On gün İran zindanlarında 64

Naxçıvanda nə baş verib 65

7 noyabr atəşfəşanlığı 70

Özünə rəva bilmədiyini 71

Müxalifət blokunun bəyanatı 72

Naxçıvan niyə mühasirədədir 73

Müştərək bazar: niyə açılıb, niyə bağlandı 75

Naxçıvanda İran nümayəndəliyi 76

Əliyev keçmişə münasibətini dəyişdirir 78

Gözə kül üfürənlər 81

Məclis iflic vəziyyətindədir 84

Ümidlər göyərmədi 88

Naxçıvanı nə gözləyir 90

Bütün qəhrəmanlıqlara görə zindan 94

Yarımçıq qalmış evin sakini həbsdədir 96

Toy neftdən xəbər verir 97

Prokurorun “unutduğu məsələ” 98

Gözəgörünməz adamlar haradadır 101

Qəzet səhifələrindən çıxarılan yazılarımdan nümunələr 105

İslahatlar asan həyata keçmir 106

Deputat bərabərliyi və ya şəxsi mənafe 110

Deputatlar yuxarılarda qarışıqlıq gözləyirlər 113

Cinayətkar günahsızı ittiham edirsə 116

Çörəyin qiyməti yenə də artdı və ya ucuz şöhrətin nəticələri 119

Senzurbaşının hünəri 121

Naxçıvan: soyuq günlərin qaynar siyasi havası 122

Türkiyə mətbuatında çap olunan müsahibələrim və

mətbuat konfranslarımız 125

Nahçıvan aclığa mahkummu 126

Topraklarımızı geri istiyoruz 129

Aliyev Ruslarla beraber çalıştı 131

Hüseynov’la Aliyev yakınlarda kapışacaklar 147




Ö N S Ö Z Ə V Ə Z İ

v ə y a

UNUTQAN OXUCU ÜÇÜN
Unutqanlıq, yaddaşsızlıq həkimlərə görə xəstəlik əlamətidir. Həkim olmadığımdan bioloji pozuntu nəticəsində yaranmış unutqanlıq, yaddaşsızlıq haqqında da söhbət açmaya­cağam. Sadəcə olaraq, siyasi mənsubiyyətinə və özlərinin yaxın keçmişdəki fəaliyyətsizliklərinə görə ötənləri “unudan”, “unutduq­larına” görə də tez-tez çıxışlarında, yazılarında, danışıqlarında təhriflərə yol verən unutqan oxucuları nəzərə alıb bu kitabı hazırladım.

Qəribədir, bu “unutqan oxucular” dünən də çox gur danışır­dılar, bu gün də. Amma dünən tamam başqa şey deyirdilər, bu gün başqa. Özü də çox hökmlə, hadisələrin canlı şahidi, fəal işti­rakçısı olduqlarını söyləyə-söyləyə. İttihamları elə sərt, elə kəskin olur ki, bə’zən özüm də çaşıram, az qalıram onların dediklərinə inanım. Faktlar, sənədlər isə məni inanmağa qoymur.

Televiziyadan, radiodan eşitdiyim, qəzet səhifələrində oxu­duğum, məclislərdə rastlaşdığım ittihamlara cavab vermək üçün dəfələrlə yaxın keçmişimizlə bağlı xatirələrimi yazmaq istə­mişəm. Həmin dəqiqə onların sifətləri gözlərimin qarşısına gəlib: “Yalan deyirsən! Onda belə demirdin!” səsləri qulağımda cingildəyib. Onda mən və mənimlə eyni cəbhədə olanlar nə deyir, nə düşünür, necə mübarizə aparırdıq? Bu suala ən yaxşı cavab həmin günlərin salnaməsi olan qəzetlərdir. Nə yaxşı onlar var! On minlərlə tirajı olan həmin qəzetlərin tək-tük nüsxələri kitabxanalarda, şəxsi evlərdə yaxşı ki, saxlanılır. Tapa bildiklərimi bir daha gözdən keçirdim. Pis, yaxşı nə varsa, bir yerə toplamağa çalışdım. Əhəmiyyətsiz görünə bilən iki-üç sətirlik xəbəri belə kitaba daxil etməkdən utanmadım. Çünki bu xəbərlər Naxçıvanın ağır vəziyyəti, erməni quldurlarının basqınları, Rus-Sovet əsgər və zabitlərinin özbaşınalığı, hakimiyyətdə olanların isə səriştəsizliyi öz əksini tapıb. Həmin günlərdə isə, elə indi olduğu kimi, “Naxçıvanın yağ içində böyrək” olduğu, “Ermənistan hakimiyyət orqanlarının Naxçıvandakı rəhbərin qorxusundan zağ-zağ əsdiyi” və s. şayiələr nəinki Azərbaycanı bürümüş, onun sərhədlərindən çox-çox uzaqlara yayılmışdı.

Bizi kimisə hakimiyyətə gətirməkdə ittiham edənlərin yadına ötənləri bir də salıb demək istəyirəm: səhv-düz biz belə olmuşuq. Bəs siz həmin günlərdə neyləyirdiniz?

Xatirələrdən qaçmağa nə qədər çalışsam da, görünür, onsuz keçinə bilməyəcəyəm. 1991-ci il sentyabrın 3-də axşam əlində heç bir hakimiyyəti olmayan, gücü bir sözə çatan Əbülfəz Elçibəyə zəng vurdum. Naxçıvandakı durumu anlatmağa çalışdım. Bir az da sərt: — Tədbir görməsəniz, vəziyyətimiz çox pis olacaq. Meydana toplaşanlar daha bizi eşitmir. Meydan başqa hava oxuyur — dedim. O da eyni əsəbiliklə: — Çox pis! Demək yaxşı işləmə­yibsiniz. Xalqla yaxşı ünsiyyətdə olmayıbsınız! Xalqa yaxşı başa salma­yıbsınız ki, bu vəziyyət yaranıb” — deyə cavab verəndə mən özümü saxlaya bilməyib: — Bu, xalq deyil! Aldadılmış bir qrupdur. Bunlar sonra peşman olacaqlar, dönüb yenə bizim yaxamızdan yapışacaqlar — dedim.

Elçibəy çox sakitliklə: — Demokratiya, demokratiya deyirsiniz, indi onu niyə istəmirsiniz? Demək onlar sizdən çoxdur ki, Bakıya zəng vurub kömək istəyirsiniz. Siz güclü olanda heç zəng vurub kömək istəyirdiniz? Fikrinizi deyin, mitinqdə çıxış edib izah edin. Amma çoxluğun tələbi əleyhinə getməyin. Zor işlətməyə təşəbbüs belə göstərməyin. Qoy xalq kimi istəyir, onu da seçsin — dedi.

1991-ci il sentyabrın 3-4-də Naxçıvanda keçirilən mi­tinq­lər zamanı AXC Naxçıvan Vilayət Təşkilatının mövqeyi həmin günlərdə çap olunan “Varlıq” qəzetində öz əksini tapıb. Kütləvi ictimai təşkilat olan AXC-nin hər hansı bir üzvünün dediyinə əsaslanıb onun öncüllərinin fikrinin üstündən xətt çəkmək olmaz. Gün yalnız bu gün deyil. Gələcək var!



Əbülfəz Elçibəy Cülfada keçirilən mitinqdə
Heydər Əliyev Naxçıvan Muxtar Respublika Ali Sovetinə sədr seçiləndən sonra Azərbaycanda belə bir fikir formalaşdırıl­mağa başladı: Naxçıvanda qurd-quzu ilə otlayır, bolluq-firavan­lıqdır, ədalət zəfər çalıb, ermənilər də bu tərəflərə nəinki güllə atmır, qorxularından yön də çevirmirlər.

Həmin günlərdə Naxçıvanın sərhəd kəndləri işğal olunur, döyüşdə insanlar ölürdü. Haqsızlıq baş alıb gedirdi. Bu kitaba kiçik xəbərləri daxil etməkdə də məqsədimiz bir daha oxucunu o günlərə qaytarmaqdır. Naxçıvanda kiçik miq­yasda baş verənlər sonralar Azərbaycanda geniş şəkildə özünü göstərdi. Biz vəzifəyə görə, şəxsi güzəranımızın yaxşı olması naminə gündə bir dona girib, rəhbər vəzifəyə təyin olunana yaltaqlanıb, vəzifədən çıxarılan­ların arxasınca danışmırdıq. Nəyi doğru hesab edirdiksə, onu da deyirdik. Sözümüzlə işimiz bir olurdu. Var səsimizlə oxucunu oyatmağa çalışırdıq. Naxçıvanın müstəqil dövlət kimi idarə edilməsinə etirazımızı bildirir, bunun Azərbaycan dövləti üçün təhlükə törədəcəyini, sabah Dağlıq Qarabağa da belə bir status veriləcəyinə hazırlıq olduğunu görür və xalqa çatdırırdıq. Uzun müddət tərifə, alqışa, üzdə bəli deyib, arxada söyməyə alışmış insanlarsa bunu qəbul etmirdilər. Yaltaqlıq, yalanı alqışlamaq, formalizm sanki onlara hava və su kimi gərək idi. Yaltaqlanmağı, alqışlamağı pisləyəndə, onu aradan qaldırmağa çalışanda onlar sudan kənara atılmış balıq kimi çabalayırdılar.

Naxçıvan Muxtar Respublika Baş nazirinin müavini Məmməd Abbasov muxtar respublika Ali Məclisinin sədri H.Əliyevin ünvanına geniş bir məktub göndərmişdi. Məktubda çörəyin qiymətinin qaldırılmasının vacibliyini faktlarla əsaslan­dı­rırdı. 6 ay öncə qəbul edilmiş qərara yenidən baxıb dəyiş­di­ril­məsini xahiş edirdi. Həmin məktubdan bir həftə keçmiş mənim “Azad­lıq” qəzetində “Çörək bol olarsa, basılmaz vətən!” (məqaləni redak­si­yaya “Ucuz şöhrət və ya deputat səriştəsizliyi” adı ilə göndər­mişdim — Ə.Ş) məqaləm çap olunan da H.Əliyev Naxçıvan MR Ali Məclisinin iclasını çağırdı. Deputatların əksəriyyəti məqaləni pislədi, qəzet haqqında hədyanlar söylədilər, müəllifi təhqir etdilər. Ən qəribəsi bu idi ki, onların arasında Məmməd Abbasov da vardı. 5-10 gün öncə yazıb Ali Məclisin sədrinə göndərdiyi məktubu sanki unutmuşdu. Naxçıvanda çörəyin qiymətinin qalxmamasını muxtar respublika Ali Məclisi sədrinin müdrik siyasəti kimi qiymətləndirirdi.

Əslində üzümçülükdə, taxılçılıqda, heyvandarlıqda, pam­bıq­çı­lıqda “pripiska”ya alışmış bu adamlar indi də “çörək pripis­kası” ilə məşğul idilər. Əməllərinin faş edildiyini görəndə isə beləcə hay-haray salır, xalqı çaşdırırdılar.

Naxçıvan MR Ali Məclisinin 1992-ci ilin 22 fevralında keçirdiyi sessiyada “Naxçıvan—Türk Bankı Anonim Şirkəti adı altında bir bankın yaradılması haqqında qanun” layihəsini müzakirə edirdi. Xalq Cəbhəsindən olan deputatlar kəskinliklə Türkiyədəki Matson Dış Ticarət Anonim Şirkəti ilə, xüsusən də onun İstanbul idarə heyətinin prezidenti İbrahim Aydınla birlikdə bank qurulmasına etiraz edir, fikirlərini əsaslan­dırmaq üçün ortaya çoxlu sənədlər qoyurdular. Ali Məclisin sədri Heydər Əliyev isə məharətli manevrlər edərək qanunun qəbul edilməsinə çalışırdı.

Onsuz da çətin vəziyyətdə qalmış Naxçıvan MR əhalisinin başına hansı oyunlar açılacağını görən AXC Naxçıvan Vilayət Təşkilatının sədri Arif Rəhimoğlu millət vəkili olmasa da, çətinliklə söz alıb “Matson Dış Ticarət Anonim Şirkəti”nin fırıldaqlarını inandırıcı dəlillərlə ortaya qoydu. Bu çıxışdan sonra millət vəkillərinin qanunun qəbuluna səs verməyəcəklərindən ehtiyat edən sədr mətləbə dəxli olmadan “Bünyamin Lülqəmbərli” məsələsini ortaya atdı. Bu atmaca C.Cabbarlının “Almaz” pyesindəki “Ocaqqulunun axsaq qatırı” atmacası kimi bir əks-səda verdi. Aləm qarışdı. Millət vəkili Bünyamin Qəmbərli ilə Heydər Əliyev arasında höcətləşmə uzandı. Əsas məsələ yaddan çıxdı. Höcətləşmədən bezmiş millət vəkilləri salondan canlarını qurtarmaq üçün hansı sənədə desən qol çəkməyə, hansı qərarı desən qəbul etməyə razı idilər. Beləliklə H.Əliyev istədiyi qərarın qəbuluna nail oldu.

Türkiyənin Eksim bankı tərəfindən Naxçıvana ərzaq almaq üçün ayrılmış 10 milyon dollar kreditə Matson Dış Ticarət Anonim Şirkəti vasitəsilə bazarda olduğundan baha qiymətə ərzaq alınanda haray çəkməkdən başqa əlimizdən heç nə gəlmədi. (Bax: “İxracatda Naxçıvana bahalı mal qovğası”, “Azadlıq” qəze­ti, 1992, 29 iyul. Məqalə Türkiyədə dərc edilən “Milliyyət” qəze­ti­nin 1992-ci il 9 iyulunda çap olunmuş yazı əsasında hazır­lanmışdı — Ə.Ş).

Naxçıvandakı demokratik qüvvələr mitinqlərdə, yığın­caq­larda vəziyyəti xalqa anlatmaqla kifayətlənmirdilər. Matson Dış Ticarət Anonim Şirkətinin fırıldaqları haqqında müxtəlif qəzetlərdə oxuduqlarını tərcümə edərək yerli qəzetlərdə çap etdirirdilər (Bax: Matsona görə biznes və ya Türk Marşı. “Hürriyyət” qəzeti, 1992, 11 sentyabr). Onda bizləri eşidən, səsimizə səs verən demək olar ki, yox idi. Əksinə, həvəslə banka pul qoyanların sayı çox idi.

1997-ci ilin fevralın 10-da bankın rəhbəri, Türkiyə vətəndaşı Osman Mehmed Sezginin şübhəli şəkildə ölüm xəbəri yayıldı. Əmanətçilər narahat oldular. Pullarını geri almaq istədilər. Mə’lum oldu ki, bankda pul yoxdur. Qəzetlərə yazdılar, şikayət etdilər. Bir nəticə hasil olmadı. Bankdan itən pulların sirri Osman Mehmed Sezginlə birlikdə qəbrə getdi.

Bu gün “məlum region” termini az qala düşmən obrazı kimi təqdim edilir. Hakimiyyətdə olan beş-on nəfərə və onlara yaltaqlanan bir dəstəyə görə bir bölgə haqqında dayanmadan təb­li­ğat aparmaq nə dərəcədə düzdür? Bunun özü bölgəçilik, bir böl­gəni başqasına qarşı qoymaq, Azərbaycanda istiqlalçı, millətçi, demokratik qüvvələri parçalamaq demək deyilmi? Parçalanmış, zəifləmiş qüvvə ilə məgər belə güclü rəqibə qalib gəlmək olar?

“Məlum region” deyə-deyə gecə-gündüz dad qılanlar görəsən bir dəfə papaqlarını qarşılarına qoyub fikirləşir, faktları, rəqəmləri tutuş­du­rurlarmı. Nədən “məlum region”dan siyasi mənsubiyyətinə görə həbs olunan, tə­qib­lərə məruz qalan in­sanların zəhmətini heçə endirirlər? Desək də, deməsək də, istəsək də, istəməsək də, həmin bölgədən olan mübarizlərin sayı çox olduğundan çox da həbs olunur, çox da təqiblərə məruz qalır­lar.

Bu günkü iqtidarın yeritdiyi siyasətdən narazı qalanlar əsasən onu qohumbazlıqda, tayfabazlıqda, yerlibazlıqda ittiham edirlər. Qəzet səhifələrini dolduran, məclislərdə, toplantılarda gur-gur danışan həmin şəxslərdən soruşmaq istəyirəm: — Qardaş oğlu yaxın qohumdur, yoxsa bacı nəvəsinin əri? Nədən qardaşı oğulları gözəgirən vəzifələrdə deyil, bacısının nəvələrinin ərləri həmin vəzifələrdədir? Yaxşı nədən elə həmin bacının oğlunun oğlanları, yəni oğul nəvələri sıravi işdədir, bacı qızının qızlarının ərləri yüksək vəzifələrdədir?

İqtidarı tayfabazlıqda ittiham edənlərdən soruşmaq istə­yi­rəm: nədən rəhbər vəzifələr, xüsusən də rüşvət mənbəyi kimi tanınan vəzifələrdə kəngərlilər yoxdur? İstər naxçıvanlı kəngərlilərdən olsun, istər tərtərli kəngərlilərdən, istərsə də başqa bölgədə yaşayan kəngərlilərdən?

İqtidarı yerlibazlıqda ittiham edənlərdən tanıdıqları nax­çı­­vanlıları gözləri önünə gətirmələrini istərdim. Nədən on­la­rın savadlı, işbacaran, qabiliyyətli, vətənsevər kimi tanı­dıqlarından birisi rəhbər vəzifədə yoxdur?

Nədən hər şeyi öz adı ilə çağırmayaq? İqtidardakıları mənafe birliyi birləşdirdiyini söyləməyək? Ötən müddətdə hakimiyyətdə olanların, bir komandanın üzvü sayılanların hər hansı birinin mənafeyinə toxunanda necə hay-küy saldığı gözlərimiz qarşısında baş verib. Onları qohumbaz, tayfabaz, yerlibaz deyil, mənafebaz adlandırmaq daha doğru olmazmı?!

Hakimiyyətdə olanlar sosial dayaqlarını möhkəmlətmək üçün özlərini qohumbaz, tayfabaz, yerlibaz kimi göstərə bilərlər. Bunu təbliğ etmək, bölgələri bir-birinə qarşı qoymaq elə onlara xidmət etmək deyilmi? Mən nə siyasi xadim, nə tanınmış qələm əhliyəm. Azərbaycanda yaşayan, Azərbaycan vətəndaşı olan yüzlərlə qəzet əməkdaşından biriyəm. İstər Azərbaycanda, istərsə Türkiyədə 1991-1995-ci illərdə çap olunmuş məqalələrim və müsahibələrimi bir araya gətirmək, bu kitabda toplamaqla demək istəyirəm: əzizlərim, mənim dostlarım, tanışlarım, oxucularım! Vaxtı ilə bu məqalələri çap etdirəndə, məqalədə yazdığım fikirləri şifahi şəkildə genişliyi ilə söyləyəndə də məni ittiham edir, düzgün fikirdə olmadığımı, oxucuya yanlış yol göstərdiyimi söyləyirdiniz və deyirdiniz: “Niyə istəmirsən dünya şöhrətli siyasətçi, təcrübəli dövlət adamı millətsevər insan gəlib millətimizi və vətənimizi xilas etsin?!”

Güzəranımız pisləşdikdə, vətən torpaqları əldən getdikdə, milli hiss söndürülüb, insanlarda bir biganəlik formalaşdıqda və s. isə deyirsiniz: “Siz bunu hakimiyyətə gətirməsəydiniz, belə günə qalmazdıq!”

Onda adamın içindən Mirzə Cəlilin “Ölülər” pyesindəki Kefli İskəndərin monoloqunu söyləmək keçir. Şeyx Nəsrullah aradan çıxandan sonra çox mətləblər aşkarlanır. Mətləblərin aşkarlanması üçün Şeyx Nəsrullahların aradan çıxmasını gözləməliyik?

Biz kimisə hakimiyyətə gətirməkdə ittiham edənlərə birincisi: “Bu kitabda toplanan məqalə və müsahibələr bizim fəaliyyətimizi özündə əks etdirib. Bunları bir daha diqqətlə oxuyun. Görün buna hakimiyyətə gətirmək demək olarmı? İkincisi: Biz gətirirdik, siz daha ağıllı və tədbirli çıxıb qarşımızı kəsəydiniz, qoymayaydınız!” — demək istəyirəm.

Belə bir əhval-ruhiyyə ilə Əli Şamilov, Ə.Şamilov, Əli Şamiloğlu, Ə.Hüseynoğlu imzaları ilə və imzasız çap olunan məqalələr və müsahibələr toplayıb “Burulğandan çıxmaq müm­kündürmü?” adı altında bir daha sizin mühakimənizə verirəm.

Kitabda məqalə və xəbərlər yazılma tarixinə görə ardı­cıl­lıqla verilir. Orada adı çəkilən və informasiyanın daha anla­şıqlı olması üçün bəzi rəsmi sənədləri də əlavə etdim. Əlavə etdiyim rəsmi sənədləri — bəya­natları, qərarları da həmin yazıların yanında verməyi münasib saydım. Redaksiyalarda edilən düzəlişlərdən doğan qeyri-dəqiqliyə və yanlışlığa toxunmadım. Yalnız korrektura səhvləri nəti­cəsində yaranmış yanlışlığı aradan qaldırdım. Senzurun çıxar­dığı parçaları da bərpa edə bilmədim. Həmin yerlərin senzur tərəfindən kəsilib çıxarıldığını bildirmək üçün qayçı işarəsi qoydum.
21. 12.2000



NAŞİRDƏN
Vaxt vardı Sovet mətbuatı bir-biri ilə sanki yarışırdı (ənənəsinə indi də sadiqdir): Rəhbərlərin çıxışlarını, məruzələrini, adi danışıqlarını çap etmək uğrunda.

Müxbirlər, redaktorlar həftələrlə kabinet qapılarında növbə gözləyirdilər: Rəhbərlərin məktublarını təşkil etmək, rəhbərlərin əvəzindən yazmaq uğrundan yarışanlar vardı. Şairlər, yazıçılar onların hər bir sözünü havadaca qapıb “bədii nümunə”lərə çevirirdilər. Daha oxunaqlı və nisbətən demokratik qəzet kimi tanınan: “Literaturnaya qazeta” Azərbaycan KP MK-nın birinci katibi H.Ə.Əliyevin “Qoy ədalət zəfər çalsın” məqaləsini təntənə ilə təqdim edir, ona rəylər təşkil edirdi.

Bu gün isə “çərxi fələk tərsinə dövran edir”. Vəzifədən çıxarılmış, rəhbərliyin gözündən düşmüş H.Ə.Əliyevin məqalə və müsahibələrini nəinki “Literaturnaya qazeta” çap etmir, heç bir sovet mətbuatı yaxın durmur. Sovetlər ölkəsində bu təbii sayılır. Çünki həmişə belə olub.

Keçmiş rəhbərlərə söz demək, fikrini xalqa çatdırmaq imkanı verilmədikdə onlar haqqında miflər yaradılır, şəxsiyyətlərinə maraq artır.

Sovet mətbuatı hazırkı rəhbərliyin yeritdiyi siyasətə uyğun məqalələr çap etdikcə xalq arasında keçmiş rəhbərlər daha çox mübahisə, müzakirə mövzusuna çevrilir. H.Əliyev isə susurdu. Axır ki, qanlı yanvar faciəsindən sonra dözə bilməyib uzun illər adət etdiyi partiya etikasını pozdu. Azərbaycan SSR Nazirlər Sove­tinin Moskvadakı nümayəndəliyinə gəlib etiraz səsini ucaltdı. Xarici müxbirlərə müsahibə verdi.

Çıxış və müsahibələr bir daha sübut etdi ki, 13-ilə yaxın Azərbaycan KP MK-nın birinci katibi, 5 il SSRİ Nazirlər Sovetinin birinci müavini, Sov. İKP MK-nın Siyasi Bürosunun üzvü H.Əliyev “Azərbaycan xalqının oğlu” olmaqla yanaşı dövrü­nün oğlu olub. “Mən belə hesab edirəm ki, bu qərarı (Bakıdakı qırğın haqqında — Ə.Ş.) qəbul etmiş adamlar böyük səhvə yol veriblər” — deyən H.Əliyev fikrini axıradək açıqlamır. Tez günahı aşağı vəzifələrdəkilərin üzərinə yıxmağa çalışaraq deyir: “Bu cür qərar qəbul etmiş Azərbaycan rəhbərliyi buna görə məsuliyyətə cəlb edilməlidir. Və hamısından əvvəl dünən Azərbaycandan qaçmış Vəzirov öz xalqı qarşısında cavab verməlidir. Ölkənin ali rəhbərliyinə səhv məlumat vermiş adamlar məsuliyyət daşımalıdır”.

İnanmaq olmur ki, H.Əliyev bu qədər sadəlövh olsun. Məgər o bilmir ki, “ölkənin ali rəhbərliyinə” məlumat bir mənbədən de­yil, bir neçə mənbədən özü də dəfələrlə yoxlanılmış və dəqiq­ləş­­dirilmiş mənbələrdən daxil olur! Sovet dövlətinin tarixi təcrü­bəsinə nəzər salsaq vəzifədə olan “ali rəhbərin” günah­la­rı­nın aşağıdakıların ayağına dəfələrlə yazıldığının şahidi olarıq.

H.Əliyev də bütün partiya rəhbərləri kimi, partiyanın, qurulu­şun naqisliyini, səhvlərini ayrı-ayrı xadimlərin ayağına yazmaq praktikasından uzaqlaşa bilmir. Odur ki, deyir: “...Azər­baycan KP əksəriyyət çoxluğu öz xalqına, Sovet hakimiy­yətinə, sosializm ideallarına sadiq adamlardır və mən onların özlərini nüfuzdan saldığını deyə bilmərəm. Özünü nüfuzdan salan ayrı-ayrı rəhbər işçilər və hamıdan əvvəl diktatorluq üsulu ilə işləyən Vəzirovdur.” Burada da sualsız keçinmək olmur. Bu necə nüfuzlu partiyadır ki, bir nəfər “diktatorluq üsulu ilə işləyən Vəzirovun” öhdəsindən gələ bilmədi, xalqı qırğına verdi?! Bu necə nüfuzlu, demokratik təşkilatdır ki, bir diktator Stalinin, bir volyuntarist Xruşşovun, bir şöhrətpərəst və ətalət basmış Brejnevin, bir Mir Cəfər Bağırovun, bir... öhdəsindən gələ bilməyib?.

Əliyevin müsahibəsində deyir ki, heç olmasa üç ay əvvəl Azərbaycanda rəhbərlik dəyişilsə idi respublikaya ordu yeridilməsinə də ehtiyac qalmazdı. Bəli, doğru deyir. Amma onu demir ki, bu mümkün deyildi. Çünki diktaturanın hökm sürdüyü bir ölkədə milli azadlıq hərəkatını boğmaq, xalqın gözünü qorxuzmaq üçün yuxarılar qan tökməyə bəhanə axtarırlar. Tapmayanda da özləri bu bəhanəni hazırlayırlar. Buna Əli Bayramlıda, Lənkəranda, paytaxtdan çox-çox uzaq və dincZəngilanda Bakı faciəsindən xeyli sonra xalq cəbhəsi fəallarının öldürülməsi və həbs edilməsi sübut deyilmi?! Həmin rayonların “özlərini nüfuzdan salmış” kommunistləri onda niyə demirdilər “Bəsdir, dayandırın bu qəddarlığı!”. Onlar yaxşı bilirdilər ki, desələr də əhəmiyyəti yoxdur. Eşidən olmayacaq. Necə ki, heç Vəzirovun özünü yuxarılarda eşidən olmadı. Çox hay-küy salsalar onları da Xalq Cəbhəsinin üzvlərinə qatıb Ulyanovskinin, Omskinin həbsxanalarına göndərəcəklər. Çünki yuxarıdan göstəriş Azərbaycanı susdurmaqdır.

H.Əliyevin son müsahibə və çıxışını oxuduqda gözlərimiz qarşısında öz xalqı üçün narahat olan, ona kömək əli uzatmağa çalışan, lakin müstəmləkəçilərin eyiblərini üzlərinə çırpa bilməyən bir insan surəti canlanır. Daxilində baş qaldırmış burulğanda boğulan bir insan. Bütün hüquqları əlindən alınmış bir insan!!! Onun xalqının taleyi üçün seçdiyi mübarizə yolu da çox bəsitdir. Bu isə yalnız H.Əliyevin faciəsi deyil. Müstəmləkə boyunduruğu altında inləyən xalqların özlərindən təyin edilmiş rəhbərlərinin faciəsidir.



Xalq cƏbhƏsinƏ rƏğbƏtim var
Heydər Əlirza oğlu Əliyev 1990-cı ilin iyul ayının 22-də heç kimə xəbər vermədən ata-baba yurdu Naxçıvana gəlmişdir. Onu aeroportda yalnız yaxın qohumları qarşılayaraq evlərinə gətirmişlər.

Gəlişindən xəbər tutan şəhər sakinləri axın-axın H Əliyevin görüşünə gəlmişlər. Axşamüstü isə camaat Naxçıvan şəhərinin Mərkəzi meydanına — Azadlıq meydanına toplaşaraq H.Əliyevlə görüşmək istədiklərini bildirmişdir.

H.Əliyev görüşə gedərkən yolüstü H.Cavidin məzarını ziyarət etmiş, qəbrin üstünə gül dəstəsi qoymuş və təəsüf hissi ilə bildirmişdi; Biz çox çətinliklə H.Cavidin cənazəsini Sibirdən doğma vətəninə qaytara bildik. Məqsədimiz burada onun üçün əzəmətli bir qəbirüstü abidə ucaltmaq idi”.

Azadlıq meydanına gələrkən H.Əliyev başı üzərində ucaldılan üçrəngli, ay-ulduzlu bayrağı görüb onu öpmüşdür. Görüşdəki çıxışında H.Əliyev xalqı azad, müstəqil, demokratik Azərbaycan uğrunda mübarizəyə səsləmişdir.

Görüşdə 50 min nəfərə yaxın kişi, qadın, məktəbli və hətta kiçik yaşlı uşaqlar iştirak etmişdir.

İyulun 23-də Nehrəm kəndində keçirilən çoxminli görüşdə H.Əliyev Azərbaycan SSR Ali Sovetinə xalq deputatlığına namizəd irəli sürülmüşdür.
***
Sizdən müsahibə alan AXC Naxçıvan Vilayət Şö’bəsinin orqanı Varlıq qəzetinin əməkdaşıdır. Bu həmin qəzetdir ki, gah Sizin müsahibələrinizi verir, gah da Sizə tənqidi mövqedən yanaşır. Siz qəzetin belə mövqeyinə necə baxırsınız?

Yüklə 0,71 Mb.

Dostları ilə paylaş:
  1   2   3   4   5   6   7   8   9   10   11




Verilənlər bazası müəlliflik hüququ ilə müdafiə olunur ©www.genderi.org 2024
rəhbərliyinə müraciət

    Ana səhifə