də gözümün qabağına gətirəcəkdim. Sonra ovqatımı çulğayan kədərdən yaxa qurtara bilməyib
qayğılanacaqdım. Leylanın vərəm olduğuna inanmırdım, bu, stolun
üstündə yan-yana düzülən
“Sabrani”, “Kent”, “Marlboro”nun işiydi.
- Çay içmək istəyirsən? - Artırmada qurcalana-qurcalana samur dərisindən tikilən şubasını
əynindən çıxarıb, qapıdan mənə uzatdı. “Deməli, tapança paltonun cibində deyil”. - Ürəyimdən
keçdi. Amma cibini yoxlamaqdan da özümü saxlaya bilmədim: Maşın açarı, qəpik-quruş, nanəli
“orbit” saqqızı və yarımçıq valerian!
- Ürəyindən mənə qulluq etmək keçir? - Bir az gecikdirsəm də, uca səslə
soruşdum.
- Yəqin, bundan sonra bir-birimizi görməyəcəyik. Mehriban ayrılaq ki, xatirələrlərimiz tamlı
olsun, - Sağ ol, Leyla, səndən də ağıllı sözlər çıxarmış!!!
- Acı çaydan şirin xatirə qalacaq?
- Axı, özün dedin ki, məni bir stəkan çaya qonaq et. - Artırmadan çıxdı. Qapını ehmalca örtüb
pərdəni çəkdi. - Bağışla, ev tör-töküntüdür. Neçə gündür evə ancaq gecə yatmağa gəlirəm.
- O vaxtacan harda olursan? - eyhamla dillənib cavab gözlədim.
- Çox sual verirsən, yaxşısı budur, gəl su tök, stəkanları yuyum!
Mətbəxə keçər-keçməz krantdan axan suyun şırıltısı, dalınca stəkan-nəlbəki səsi eşidildi. Mətbəx
qapısının kandarında dayanıb uzun-uzadı onun qab-qaşıq yumağına, barmaqlarının ucunda
stəkan sürtməyinə tamaşa elədim. Vaxt vardı, Leylanın evinə soxulub alt paltar saxladığı dolabı
ələk-vələk edən arvadxasiyyət aparıcı, mətbəx işlərindəki səriştəsizliyinə görə onu
el-aləmdə
rüsvay etmişdi. Qızın yanaqlarına çökən qızartını görəndə operatora qaş-göz atıb, “yaxından
götür, pərt olduğunu bütün ölkə görsün,” demişdi. Sonra beş qarın qız doğub onların taleyi üçün
narahat olan ətiacı analar kimi nümayişkaranə şəkildə, daha doğrusu, tənə ilə ağızdan-ağıza
eşitdiyi mətbəx məsləhətlərini onun başına yeritmişdi: “sabah ər qulluğu tutacaqsan, adi şeyləri
bilmirsən. Soyuducudan pis qoxu gələndə bilirsən nə edirlər? Yox, hardan biləsən! Buzxanaya
ya bir tikə çörək, ya da kömür parçası qoymaq lazımdı (Yəqin, bu ağılumulmazın burnu
Leylanın soyuducusundan
pis qoxu çəkmişdi, ona görə belə öfkəliydi). Çörək tez boyatımasın
deyə, yanında kəsilmiş limon saxlayırlar. Yağ qaynayanda tavaya duz səpirlər ki, kənara
sıçramasın”. Özü də Leyla o vaxtlar belə kasıb, divarlarından kədər ələnən evdə yaşamırdı.
Məşhur “Christian Dior” firmasının svarovski qaşlarla bəzədilmiş 3500 manatlıq eynəyini taxır,
əngiboş şou müxbirlərinin yazılarına məhəl qoymayıb ədabazlığından qalmırdı. Hətta and içib
qürrələnirdi ki, mətbəx mebelimi Rumıniyada yaşayan azərbaycanlı iş adamı göndərib;
“Embawud” mağazalar şəbəkəsində 35 min manatdan qara qəpik çıxmırlar. Pərtliyini gizlətmək
üçün gülə-gülə “mənə ərə gələcəklər, mən getməyəcəm” - deyəndə, aparıcı da dilini dinc
qoymamışdı: “Sən əziyyət çəkməzsən, elə uşağı da ərin doğar”.
İndi nə zaman o zamandı, nə də Leyla o Leyla. Nə o gen-geniş ev vardı, nə o əyin-baş, nə bahalı
Rumın mebeli, nə də bəxtəvər günlər... Bircə “Toyota”sını saxlaya bilmişdi ki, qəzetlərin
yazdığına görə, onun da kredit pulunu
ödəyə bilmədiyindən, bank tezliklə maşını geri almağa
hazırlaşırdı. Qızın üstünə çökən bu ümidsizlik ağrısından bilmək olardı ki, səhərləri televiziya
çal-çağırlarında, axşamları şadlıq evlərinin səs-küylü divarları arasında keçən o mümtaz çağları
geri qaytarmaq, ilan ağzından qurbağa almaq qədər çətin idi. Gecə yarı İsmayıl dayının miskin
daxmasına gəlib fağır-fağır ağlayıb-sıtqayırsa, onun qanıistiliyi içinə daş kimi düşüb gözünə qora
gətirirsə, deməli, bu bədbəxt məxluqa inanmaq lazım idi: mənim vəziyyətim sən düşündüyündən
də pisdir, Rəcəb!
Stolun üstündə dığıldayan “Tefal”dan çaynikə isti su töküb yaxaladı. Ağca, ətli baldırları, biçimli
arxası, iri döşlərinə uyuşmayan incə beli canımı sızıldatdı. Hələ hamar boyun-boğazı...
Sinədolusu nəfəs alanda, deyəsən, niyyətimdən duyuq düşdü.
- Darıxma, səbrin olsun.
Sırtıq-sırtıq irişdim.
- Hara köçürsən?!
- Bir yer taparıq.
Diksindim.
- Necə, yəni, bir yer taparıq?! - Qaşlarımı düyünlədim.
- Çayımızı içək, sonra baxarıq...
Zəhmət olmasa, stəkanları apar, gəlirəm.
Stolun üstünü köynəyimin qolu ilə təmizləyib stəkanları, içi bər-bəzəkli şokaladlarla dolu olan
qabı, peçenye nimçəsini səliqəylə düzdüm. “O məni avam yerinə qoyduğunun fərqindədirmi?” -
Maraqlı sualdır! Evə gələndən dər-divara göz gəzdirsəm də, güllənin yerini tapa bilməmişdim.
Görəsən, tapançanın onun əlində açılmağı təsadüf, yəni ehtiyatsızlığı ucbatından olmuşdu,
yoxsa...
Leylanın mahnılarından birini zümzümə edə-edə barmağımın ucunda ensiz foyedən keçib, ikinci
otağa gəldim. Divarlar naşı, pinti ustanın əlindən çıxan qum suvağı ilə suvanmışdı. Tavandan
asılan köhnə dəbli çilçırağın işıq qapaqlarını toz tutmuşdu, girdə lampalardan divarboyu solğun,
tutqun işıq sürünürdü. Ortalıqdakı taxtın güllü-güllü yatacağı dağınıqdı; balışın üstünə iki ət
rəngli lifçik atılmışdı. Sınıq-salxaq şifonerin açıq, güzgülü qapıları
dilənçi əlinə bənzəyir,
asılqandan rəngbərəng paltarlar görünürdü. Döşəməyə atılmış dəri torbadan dağılmış oyuncaqlar
əl-ayağa dolaşırdı: bərbəzəkli kuklalar, cürbəcür maşınlar, su vuran tapançalar...
Mətbəxdən gələn su şırıltısı qızın təmizlik işlərilə baş qatdığını göstərirdi; deməli, iki daşın
arasında olsa da, otağı əlüstü axtara bilərdim. Qapıda, divarlarda, tavanda güllə yeri yox idi.
Görəsən, tapançanı harda gizlədib? Başını birtəhər qatsam, tapa bilərdimmi? Taxtın yuxarı
başına keçib şifonerin içinə boylananda rəngbərəng geyinəcəklərdən biri... tərpəndi. Diksinib
içimi çəkə-çəkə kənara sıçradım. Qorxudan bağırsaqlarım genəldi. Sarı zolaqlı kişi pencəyinin
üstünə örtülən şəffaf sellofan torbanın içində civildəyən siçanın başı göründü: mərci gözlərini
bərəldib üzümə baxırdı. Dizlərimə yayılan əsməcəni canımdan çıxarmaq üçün dərindən nəfəs
alıb içimdəki həyəcanı öldürmək istədim. Elə bil, sinəmə sərin su səpdilər. Aha... Bu nədir belə?
Tapança?! Güllü balışın altındakı qaraltı
gözümə dəyər-dəyməz, özümü irəli atdım. Çərçivənin
içinə salınan şəkil idi, ağzı üstə çevrilmişdi.
“Maestro Vüqar?!”. “Ohooo!!!”. İçimi çəkib, heyrətdən alt dodağımı dişlədim, gözlərim bərəldi.
Mətbəxdən gələn su şırıltısının kəsilməsilə ayaq səsləri eşidildi. Şəkli balışın altına dürtüb,
barmaqlarımın ucunda necə ustufca gəlmişdimsə, eləcə - dodağımın altında mızıldana-mızıldana
yerimə qayıtdım. “Maestro, maestro...”- sinədolusu köks ötürüb, udqundum. “Sənin Leyla ilə
aranda olanları qulağım almışdı, amma şəklinin balış altınacan irəliləməsi, əsl sürprizdi”
- Gəl çayniki apar, çayını iç. Mən çiməcəm.- Adətən, on ilin kəbinli arvadları zəif, məğmun
kişiyə belə əda və hökmlə söz deyir.
Amma səsindəki məhrəmlik, incə ərkyanalıq xoşuma gəldi.
Çayniki gətirmək üçün mətbəxə keçəndə ikinci otaqda şifonerin qapıları cırıldadı. Qorxdum,
əməllərimdən duyuq düşüb özbaşınalığıma görə mənə acığı tutar, indi-indi aramızda yaranan
hörməti, şirin ötkəmliyi-filanı vecinə almayıb özünü qınayar ki, bu çölləmə adamı evimin yuxarı
başına hansı ağılla çıxarmışam? Çıxarıb haracan özümə, ürəyimə yaxın buraxacam, sirlərimi,
qayğılarımı, dərd-ələmimi bölüşəcəm? Bölüşüb içimə çökən rahatlığı nə vədəyədək yaşayıb
sinədolusu nəfəs ala bilərəm? Bəlkə, mərdimazarın, nanəcibin lap elə, cildini dəyişmiş əclafın
təkidir; həyatıma soxulub bədniyyət əməllərinin baş tutması üçün dəridən-qabıqdan çıxır? Özü
də... jurnalistdir. Onsuz da bu zəli tayfasından boğaza yığılmışam. Əsəblərimi pozub günümü-
gündüzümü zəqquma döndərən bu adamlardan başım az çəkməyib... Xatırladınızsa, İsmayıl dayı
bizdən ayrılar-ayrılmaz, şəkil söhbətindən dərhal sonra “Mənim bu hala düşməyimdə
jurnalistlərin də əməyi böyükdür” deyib, istehza ilə gülümsəmişdi.
- Rəcəb, uçurum haqqındakı sözün necə idi,
xoşuma gəldi, bir də de.
- Uğura aparan yollardan biri uçurumdan keçir, Leyla xanım. Bu, bütün yaradıcı və istedadlı
adamların həyatında olur. Depressiyaya qapılmaq dişiylə öz əllərinə düyün vurub, uçurumdan
atılmağa bənzəyir. - Güldü. Ürəyinə yatmışdı.
- Əsl ədəbiyyatçı cümləsidir. - Sağ ol, Leyla!!!
- Sən hara, ədəbiyyat hara?
- Məktəb vaxtı “Yad qızı”nı, “Təhminə və Zaur”u oxuyub o qədər ağlamışam... Kədərli vaxtlar
idi. Mehrab gözümün yaşını quruda bilmirdi. - Yenə gülüş - Axmaq olmuşam da, adam da kitab
oxuyub, ağlayar?
“Aha, Mehrab... şəkildəki oğlan”- düşündüm. “Nə yaxşı, şəkilləri xəbər almır, deyəsən, tamam
yadından çıxıb”.
Qolunun üstündə hamam dəsmalı, göyümtül xalat, qapının ağzında peyda oldu. Birdəncə yetişən
məktəbli qızlarsayaq saçını ortadan ayırıb döşlərinin üstünə atmışdı. Qəşəng görünürdü. Çay
dolu stəkanı yuxarı qaldırıb, içməyini təklif elədim. Başını yellədi, foyedəki güzgünün qabağına
keçib ora-burasına baxdı, barmaqlarını daraq edib saçında gəzdirəndə hiss etdim ki,
altdan-altdan